සඳ එළියේ අසිපත ( 2 )

මෙහි එන නම් ගම් සියල්ල මනඃකල්පිතය
19වන සියවසේ මුල් භාගයේ වැල්ලබඩ පත්තුවේ එක්තරා ග්‍රාමයක සිදුවූ සත්‍ය සිදුවීමක් ආශ්‍රයෙනි




පසුගිය කොටසෙන්

" චූඩාමාණික්කය කෑලි කෑලිවලට කැඩිලා ගුරුන්නාන්සේ . හතරැස් කොටුව දේවතා කොටුව කොත් කැරැල්ල නම් හදන්න පුළුවනි . ඒත් චූඩාමාණික්කයක් හොයන්න නම් ලේසි වෙන එකක් නැහැ "

" රත්නපුරේ පැත්තේ වලව් කීපයක්ම මම අඳුරනවා ගුරුකම් වලට ගිහිල්ලා . ඒ වලව් වලින් මට මේ වෙලාවේ උදව්වක් ගන්න පුළුවන් වෙයි හාමුදුරුවනේ "

මේ අතරේ වෙද සීයා ගම්මුන් සමග කතාවට වැටුණු අතරේ ලත් අවස්ථාවෙන් නායක ස්වාමීන් වහන්සේ උපරිම ප්‍රයෝජනය ගත්හ .

" අරනෝලිස් . නිවීහැනහිල්ලේ වෙලාවක චූටි පුතා එක්ක පන්සලට එන්න . හතරැස් කොටුව කෑලි කෑලිවලට කැඩිලා විසිවෙනවා මම ඇහැටම දැක්කා . හතරැස් කොටුවේ තිබුණු නිධන් පෙට්ටිය කළුගල් පෙට්ටියක් . මම ඒක කාටවත් පෙන්නේ නැතිවෙන්න එවෙලේම වැස්සේ තෙමි තෙමීම අරගෙන ඇවිත් ආවාස ගෙයි මගේ කුටියේ තැම්පත් කළා . ධාතුන් වහන්සේලා වැඩ ඉන්නවා ඇත්තෙත් මේ පෙට්ටියේ වෙන්න ඕන . ඒක ආයෙත් තැම්පත් කරන්න කලියෙන් මට ඒක විවෘත කරලා බලන්න හිතයි . මේ ළඟදී මම හීනයක් දැක්කා ඔය සම්බන්ධව . මේකේ පෙරනිමිත්තක් වෙන්න බැරි නැහැ ඒ හීනෙන් කියවුනේ කියලා මට හිතෙනවා "

අද එතැන් සිට

" ඉතින් හාමුදුරුවනේ නිධන් පෙට්ටිය ඔබවහන්සේට තනියම උස්සාගන්න පුළුවන් උනාද ? "

" අඩි එකහමාරක් විතර දිග පළල ඇති මයේ හිතේ . ඒත් වැඩිය උස නැහැ . ඒ නිසා මම පුළුවන් හැටියට නිධන් පෙට්ටිය ආවාසගෙට අරගෙන ගියා "

" හාමුදුරුවනේ මේවා වෙන කවුරුවත් දැක්කේ එහෙම නැත්ද ඉතින් ? "

" පොඩිඋන්නාන්සේලා හොඳටම නිදි . ඇබිත්ත උන්නැහේත් සනීප නැතිව නිදාගෙන හිටියේ . ඒ නිසා දකින්න නැහැ කවුරුවත් . දැක්කත් ඉතින් ඒක එච්චර ගැටළුවක් වෙන්නේ නැහැ අරනෝලිස් . මොකද එවෙලේ මොකවත් පේන්නෙවත් නැහැ . ඒ වෙලාවට මිනිස්සුන්ගේ අවධානය වැඩිපුරම යොමු වෙන්නේ නිධන් පෙට්ටියට නෙවෙයි , චෛත්‍යයේ කැඩිච්ච කොත් වහන්සේ පැත්තට "

" හාමුදුරුවනේ එහෙනම් අපි මේ කතාව මෙතනින් නවත්තමු . මම වෙලාවක නිවී හැනහිල්ලේ පන්සලට එන්නම් . කොහොමත් නිධන් පෙට්ටිය විවෘත කරනවානම් ඒක චෛත්‍යය අලුත්වැඩියා කරන්න කලින් කරලා අහවර කරන්න වෙයි . මොකද හතරැස් කොටුව ඉක්මනටම හදන්න මුල පුරන්න වෙන නිසා නිධන් පෙට්ටිය ඉකමන්ටම බලන්න වෙයි හාමුදුරුවනේ "

" පන්සල පැත්තේ එන්නකෝ අරනෝලිස් එහෙනම් වෙලාවක "

" අපිට අවසර "

" සුවපත් වේවා ! "

සීයාත් මමත් පන්සල් වත්තේ රැඳෙමින් එහි වූ කීප දෙනෙක් සමග චෛත්‍යයේ වැඩකටයුතු පිළිබඳව කථිකා කර පැය කීපයක් ගතවීමෙන් අනතුරුව නැවතත් වලව්වට පිටත්වී ගියෙමු . ගම්මුන් සමහරෙක් මෙම අකුණු පහර පිළිබඳව පවසන ලද්දේ මෙය ගමට වූ දේව ශාපයක් ලෙසය . එහෙත් නායක ස්වාමීන් වහන්සේගේ සිහිනය සහ මෙම අකුණු පහර අතර කුමන හෝ සම්බන්ධයක් තිබිය යුතු බව මගේ විශ්වාසය විය .

" චූටි පුතේ "

" ඇයි සීයේ ? "

" අපි අංජනම ඇරලා බලමුද මොකක්ද මේ ගල් පෙට්ටිය කියලා ? "

" ඔව් නේද සීයේ . මටත් හිතෙනවා මොකක් හරි දෙයක් ඇති කියලා "

" දවල්ට කාලා නාලා කියලා ලැස්ති වෙන්නකෝ එහෙනම් . අපි බලමු මේක මොකක්ද කියලා "

සීයාටද යම් කුතුහලයක් ඇතිවූවිට එය විසඳා නිරාකරණය කරගන්නා තුරු නිවනක් නැති බව එයින් මොනවට පැහැදිළි වේ . පන්සලේ සිට ආ මොහොතේ සිට මම එතරම් වැදගත් රාජකාරියක් නොකළ අතර වැඩිමනත් කාලය ගත කලේ වත්ත පිටියේ අවිදමින්ය . අනතුරුව දවල් ආහාරවේල නිමවූ බව අම්මා කී විගස මම බත් කෑමෙන් පසුව ලිඳට ගොස් නා පිරිසිදුවී කාමරයට පැමිණියෙමි . පෙට්ටගම විවෘත කර අංජනම අතට ගත් මම සීරුවට පෙට්ටගම වසා සීයාගේ කාමරයට ගියෙමි .

" සීයේ අපි අංජනම ඇරලා බලමු එහෙනම් "

" එහෙනම් පුතා මල් බුලත් අඹ කොළ අත්තක් එහෙම තියලා මල් ආසනයක් හදන්නකෝ "

" හොඳමයි සීයේ "

අවසර ලත් ඇසිල්ලේ මල් බුලත් ආසනයක් සාදා නිම කල මම අංජනම එහි තබා මන්තර මතුරන්නට සැරසෙන විට සීයා මා වළකා සීයා විසින්ම මන්තර මැතිරීම ආරම්භ කළේය .

..... ආතාල බන්ධ පාතාල බන්ධ සිවුකොන අටකොන සොළොස්කොන බන්ධ බන්ධාමි හනුමන්තා දේව රාජා බන්ධාමි අදත් මාගේ මෙරඟ මඩලට දිෂ්ටි ලා ගිනි ගිනි හනුමා දේවරාජා සෙල්ලුම් ක්‍රලාඩි බාහේස් ගුරුලා වන්දනේ ඉරන්ද පෝනුම් සුවරවර වරියේ වෙල්ලක් කොන්ඩු ඉරිනුත්තු සෙල්ලුම් පේසු වර වර දේව රාජා පුර මෙත්ත පුඩයුම් කයිවීර හනුමා දේව රාජා බන්ධ බන්ධාමි වර වර ඒස්වාහඃ ...... ඕන් හරගුරු හනුමා දේවරාජා වර වර ...............

" සීයේ හනුමා ආවා . දැන් මොනවද අහන්න ඕන ? "

" අහන්න පන්සලේ කොත් කැරැල්ලට අකුණු පහරක් වැදුනේ ඇයි කියලා "

" සීයේ හනුමා කියනවා අකුණු පහර වැදුනේ හාමුදුරුවන්ට පෙර දීපු දැනුම් දීමක් සිහියට ගත්තේ නැති නිසාය කියලා . මොකක්ද කියලා නම් කියන්නේ නැහැ "

" එහෙනම් දැන් අහන්න අර කළුගල් පෙට්ටියේ මොනවද තියෙන්නේ කියලා " 

" සීයේ ඒ කළුගල් පෙට්ටියේ සර්වඥ ධාතුන් වහන්සේලා තැම්පත් කරලා තියෙන දඹ රන් කරඬුවක් තියෙනවා කියනවා . ඊට අමතරව රන් පත්තිරුවල ලියලා තියෙන සන්නසක් තියෙනවා කියලාත් කියනවා . ඒ සන්නස හාමුදුරුවන් ලවා කියවන්න කියලා කියනවා . ඒක දුටුගැමුණු රජතුමාගේ කාලෙ ලියලා තැම්පත් කරපු සන්නසක් කියලා කියනවා . ඒ සන්නස ලියලා තියෙන අකුරු කියවන්න හාමුදුරුවන්ට පුළුවන් කියලාත් කියනවා " 

" හා එහෙමද . එහෙනම් අපි ඒ කළුගල් පෙට්ටිය විවෘත කරලා බලමු . දැන් අහන්න ඒ පියන අරින්නේ කොහොමද කියලා . මොකද ඕකට කුළුගෙඩි පහරවල් ගහන්නත් බැරි නිසා " 

" සීයේ සීයාගේ පොත්වල එක පොතක තියෙනවා කියනවා බාල ලෝහවලින් රත්තරන් හදන බෙහෙත් වට්ටෝරුවක් . ඒ වට්ටෝරුවට තව බෙහෙත් වර්ග කීපයක් දාලා බෙහෙත වෙනස් කරලා හදලා අඹරලා ගල් පියනේ ගාලා අව්වේ තිබ්බට පස්සේ පියන බුරුල් වෙලා අරින්න පුළුවන් වෙයි කියලා කියනවා " 

" එහෙනම් පුතේ අහන්න කොහොමද ඒ බෙහෙත් වට්ටෝරුව වෙනස් කරන්නේ කියලා "

" සීයේ , එහෙනම් සීයා ලියාගන්න මම අහලා කියන ඒවා " 

හනුමා විසින් පවසන ලද බෙහෙත් වට්ටෝරුව වෙනස් කිරීමේ විධිය සම්පූර්ණයෙන්ම සටහන කරගත් සීයා දෙවියන්ට පිං දී අංජනම වසා එම කාර්යය අවසාන කළේය . 

" පුතේ එහෙනම් මේ බෙහෙත් වට්ටෝරුව වෙනස් කරනහැටි ඔය ඉඩ තියෙන හොඳ බෙහෙත් ලියලා තියෙන පොතක ලියලා තියන්න . මේ වතාවේ වගේම අපිට කවදාහරි ආයෙත් උවමනා වෙන්න බැරි නැහැ . ඒ නිසා ඕක රහසක් විදියට පවත්වාගන්න මතක තියාගන්න හොඳද ? " 

" හොඳයි සීයේ " 

" එහෙනම් එන්න බලන්න අපි පෙට්ටගමේ පොත් පෙරළලා බලමු අර රත්තරන් හදන බෙහෙත් වට්ටෝරුව කොහොමද කියලා " 

සීයාත් මමත් පෙට්ටගමේ ඇති පොත් පෙරලා බලමින් අවසානයේ අවශ්‍ය බෙහෙත් වට්ටෝරුව සහිත පොත සොයාගතිමු . එම පොත මම පෙට්ටගමේ උඩට වන්නට තබා පොත් සියල්ල නැවත අසුරා පොත් වලට වැඳ පෙට්ටගම වසා යතුර කරකැවීමි . " ටක්ස් " යන ශබ්ධය නංවමින් පෙට්ටගමේ අගුලු හිරවිය .

දින කීපයක් ගතවිය . සීයා සහ මම ඉර අවරට යන්නට හෝරා කිහිපයක් තබා පන්සලට පයින්ම ගමන් කළෙමු . 

" පුතේ නායක හාමුදුරුවන්ට ගල් බෙහෙත් ගැන දැන්මම මොකවත් දැනගන්න තියන්න එපා . ඒක එච්චර නුවණට හුරු නැහැ කියලයි මමනම් හිතන්නේ . අපි පස්සේ උවමනා උනොත් විතරක් ඒක කියමු " 

" හොඳයි සීයේ " 

" මමනම් හිතන්නේ මේ නිධන් පෙට්ටියත් මොකක් හරි වැදගත් හෝඩුවාවක් තියාගෙන තමයි හතරැස් කොටුවෙන් පිටතට එන්න ඇත්තේ . බලමුකෝ මොකද වෙන්නේ කියලා " 

අපි පන්සල වත්තට ඇතුළුවන විට නායක ස්වාමීන් වහන්සේ සාමණේරයන් වහන්සේ නම සමග ආවාසගෙයි දොරකඩ අසල වැඩ සිටියහ . සාමණේරයන් වහන්සේ පොතක් අතේ තබාගෙන වැඩ සිටි අතර නායක ස්වාමීන් වහන්සේ අවවාදාත්ම ස්වරූපයෙන් සාමණේරයන් වහන්සේ අමතමින් සිටියහ . 

" හා පොඩි නම මේ පිරිත් සූත්‍ර ටික පාඩම් කරලා ආයෙත් පාඩම් දෙන්න ඕන හොඳද ? . දැන් යන්න එහෙනම් ආවාස ගෙට " 

" අවසර හාමුදුරුවනේ " 

" සුවපත් වේවා " 

" අරනෝලිස් එහෙනම් එන්නකෝ ආවාසගෙට " 

" චූටි පුතේ , පුතත් එන්න ඇතුළට " 

" අරනෝලිස් මම ඉන්නගමන් මේ පෙට්ටගම විවෘත කරන්න උත්සාහ කළා . ඒත් ලේසියෙන් අරින්න බැහැ . ඒ නිසා මම එහෙමම තියෙන්න ඇරලා නිකං උන්නා  . මේක මම හිතන්නේ ගල් බෙහෙත් ගාලා උණු කරලා අලවලා තියෙන්නේ . ඒ නිසා එක්කෝ කුළුගෙඩි පාරවල් ගහලා මේක කඩන්න ඕන . නැත්නම් පියන අරින්න විදියක් කල්පනා කරන්න ඕන " 

" හා ! හා ! හාමුදුරුවනේ . මේකේ සර්වඥ ධාතුන් වහන්සේලා වැඩ ඉන්නවා කියලා තමයි මට අංජනමෙන් දැනගන්න ලැබුණේ . ඒ නිසා මේකට කුළුගෙඩි පාරවල් ගහන්න එපා . අපි පියන අරින්න වෙන විදියක් කල්පනා කරමු " 

" අරනෝලිස් එහෙනම් මටත් වඩා ඉක්මන් වෙලා වගේ . ඒක හොඳයි . නැත්නම් මම බැරිවෙලාවත් මේකට කුළුගෙඩි පාරවල් ගහලා කොච්චර පාප කර්මයක්ද කරගන්නේ " 

" හාමුදුරුවනේ මේ පෙට්ටියේ තියෙනවා කියන්නේ ධාතු කරඬුවක් එක්ක සන්නසක් . මොකක්ද කියලා දන්නේ නැහැ . ඒක කියවන්න හාමුදුරුවෝ දන්නවා කියලා තමයි හනුමා කිව්වේ " 

" ඔය සෙල්ලිපි එහෙම ලියලා තියෙන අකුරු නම් කියවන්න මමත් ඒකාලේ ඉගෙනගත්තා . අපි එහෙනම් මේ සන්නස අරගෙන බලමු මොනවද තියෙන්නේ කියලා " 

" හාමුදුරුවනේ , හාමුදුරුවෝ දන්නේ එහෙම නැත්ද ඔය කළුගල් උණු කරන්න ගන්න බෙහෙත් ගැන එහෙම ? "

" මම මහන වෙන්න කලින් දවසක් අපේ ධම්මරුචි නායක හාමුදුරුවෝ ඔයගැන දවසක් මමත් එක්ක කිව්වා මතකයි . ඒත් ඒවා හරියට මමත් දන්නේ නැහැ අරනෝලිස් . චූටි ගුරුන්නාන්සේට ලැබුණේ නැත්ද පොත් ගුලේ තිබිලා ඒ ගැන ලියවිලා තියෙන පොත් පත් එහෙම ? " 

" මටනම් මුකුත් ඒ සම්බන්ධව කියවන්න ලැබුණේ නැහැ හාමුදුරුවනේ " 

" හ්ම්ම්ම් ඒකත් එහෙමද ? "

" කමක් නැහැ හාමුදුරුවනේ . මම පොඩ්ඩක් හොයලා බලන්නම් . සමහරවිට හොයාගන්න බැරිවෙන එකක් නැහැ මේ වෙනුවෙන් මොනවා හරි . මම දන්නා වෙද මහත්තයෙක් ඉන්නවා ඈත පළාතක . ඒ වෙද මහත්තයාගෙන් හරි මම මේ ගැන අහලා බලන්නම් "

" ඒක හොඳයි අරනෝලිස් "

" හාමුදුරුවනේ අපිට ඔය නිධන් පෙට්ටිය බලාන්න අවසරද ? "

" එන්නකෝ අරනෝලිස් . මම ආවාසගෙයි ඇතුල් කාමරේ තමයි ඒක තැම්පත් කරලා තියෙන්නේ "

නායක ස්වාමීන් වහන්සේ මමත් සීයාත් කැටිව ඇතුළු කාමරය වෙත ගමන් කළහ . එය කාලෙකින් අතුපතුගා සුද්ද කර නැති එහෙත් සැලකියයුතු තරම් අපිරිසිදු ස්ථානයක්ද නොවේ . නිධන් පෙට්ටිය ලෙස හැඳින්වූ එම කළුගල් පෙට්ටිය සිවුරු රෙද්දකින් වසා තිබිණි .

" මේ තියෙන්නේ අරනෝලිස් ඒ නිධන් පෙට්ටිය තමයි "

" චෛත්‍යයේ උඩ තැම්පත් කරලා තියෙනකොට මේක තැම්පත් කරන්න තරම් හතරැස් කොටුව විසාලද කියලාත් හිතෙනවා . ඒත් බලනකොට හතරැස් කොටුව තරමක් ලොකුයි නේද හාමුදුරුවනේ ? "

" ඒක නෙවෙන්නන් අරනෝලිස් . මමත් පන්සලේම උන්නට මොකද මටවත් එච්චර නිච්චි නැහැ මේ චෛත්‍යයේ හතරැස් කොටුව මේ තරම් විසාලයි කියලා "

" හාමුදුරුවනේ මට ඩිංගිත්තක් මේ නිධන් පෙට්ටිය බලන්න අවසරද ? "

" කමක් නැහැ අරනෝලිස් . මේක ඉතින් කොහොමත් අරනොලිස්ට තමයි පරීක්ෂා කරලා බලන්නේ වෙන්නේ "

සීයා නිධන් පෙට්ටිය අසලට ළං වෙන විටදී මමද සීයා සමග ඒ අසළට ළං වීමි . සැබවින්ම එය ඉතාමත් සුමට ලෙස නිමවා තිබුණු කළුගල් පෙට්ටියකි . එහෙත් එහි එක් පැත්තක් තරමක් පළුදු වූ ස්වභාවයක් ගෙන තිබිණි .

" හාමුදුරුවනේ මේ මෙතන පළුදු වෙලා තියෙන්නේ වැටිච්ච පාරට වෙන්නැති නේද ? "

" ඔව් දරුවෝ . නැත්නම් බලන්න වෙන කිසිම තැනක් කිසිම පළුද්දක් ඇතිවෙන්නේ නැතිවෙන්න මේ නිධන් පෙට්ටිය හදලා තියෙනවා නෙව "

" ඒත් කමක් නැහැ . නිධන් පෙට්ටිය විනාස වෙලා නැති නිසා දුකක් නැහැ "

" හාමුදුරුවනේ . මම මේකට විසඳුමක් බලන්නම් . පියනක් වහලා කියලා කියන්න බැහැ මේ තියෙන හැටි දැක්කම . බලන්න පිහිටි ගලක් තියලා වගේම තමයි පියන වහලා ගල් බහෙත් වලින් උණු කරලා තියෙන්නේ "

" ඒක තමයි අරනෝලිස් . ඒ කාලෙ මිනිස්සු කොච්චර් දේවල් කරලා තියෙනවද . ඒ අතින් අද කාලෙ අයට සුද්දගේ ආයුධේ නැත්නම් කිසිම දෙයක් කරගන්න බැරිවෙලා තියෙනවානේ . මේ වගේ ගම්වල තමයි මේ ශිල්ප ටිකක් හරි රැකිලා තියෙන්නේ . එහෙනම් අරනෝලිස් මොකක් හරි පිලියමක් බලන්නකෝ . මම චෛත්‍යය හදන වැඩේ පහු කරන්න තමයි හිතාගෙන ඉන්නේ මේ රාජකාරිය අහවරක් වෙන්න ඕන නිසා "

" මේ සුනු විසුණු වෙලා තියෙන දේවල් අස්පස් කරන්න ටික කාලයක් යයිනේ හාමුදුරුවනේ . ඒ නිසා අපිට කාලෙ ඇතිවෙයි . අපි එහෙනම් ගිහින් එන්නම් හාමුදුරුවනේ "

" හොඳයි අරනෝලිස් , සුවපත් වේවා ! "

සීයා සහ මම පන්සලෙන් පිටත්වීමට සැරසෙන විට රෑබෝ වී තිබිණි . හුළු අත්තක් පත්තුකරගත් සීයාත් මමත් වලව්වට එන අතරතුරේ මගේ සිත්ගත් රුවැත්තිය පිලිබඳ කතාවක් ආරම්භ විය .

" චූටි පුතේ , අර වෙද ගෙදර ඉන්න ගෑණු ළමයා දහම් පාසලේ වැඩ කටයුතු හොඳට කරගෙන යනවද ? "

" ඔවු සීයේ , සඳමලී නංගිට උගන්වන්න ටිකක් පුළුවන් කියලා මටත් හිතෙනෙවා . සමහරවෙලාවට මට ඇහෙනවා නංගි ළමයින්ට උගන්වන හැටි "

" වෙදගෙදර පිරිමි ළමයි කවුරුවත් වෙදකම ඉගෙන ගත්තේ නැති නිසා මම හිතන්නේ ඔය කෙල්ලට තමයි වෙදගෙදර වෙදකම උගන්වන්න හිතාගෙන ඉන්නේ . දවසක් මාත් එක්ක වෙද උන්ද කිව්වා එහෙම දෙයක් "

" ඔව් සීයේ සඳමලී නංගිට තමයි වෙදකම් උගන්වන්නේ . මම වෙදකම් ඉගෙනගන්න ගියාම සමහරවෙලාවට වෙද සීයා එයාටත් වෙදකම් කියලා දෙනවා . දවසක් නංගි මගෙන් විෂ බස්සන මන්තර ගැන ඇහුවා . මට කියලා දෙන්න වෙලාවක් උනේ නැහැ "

" ඒවානම් කියලා දුන්නට කමක් නැහැ . ඒත් දන්නවනේ ? . රහස් රහස්ම තමයි . විශේෂයෙන්ම මේ ශිල්පය සම්බන්ධව කාන්තා පාර්ශවයත් එක්ක වැඩ කටයුතු පරෙස්සමට කරන්න ඕන හොඳද පුතේ . අමනුස්සයෝ සම්බන්ධ මන්තර මොකවත් කියන්න යන්න එහෙම ඕන නැහැ "

" හොඳයි සීයේ "

" සීයේ අපි දැන් අර බෙහෙත් හදන්නේ අපි හදනවා කියලා කියන්නේ නැතිවද ? "

" ඔව් . මම හිතාගත්තේ එහෙම කියන්න . මොකද ඕක පිට අය දැනගන්න ඕන නැහැ . නැත්නම් පස්සේ කරදර වෙනවා "

සීයාත් මමත් ඉන් පසු දින කීපයෙක වෙහෙසවෙන ලද්දේ කළුගල් උණුවී මෙලෙක්වී යන වටිනා ඖෂධය සෑදීමේ කටයුතු කිරීමටය . ඊට අවශ්‍ය බෙහෙත් වර්ග , පාසානම් වර්ග සෙවීම ලේසි පහසු කාර්යයක් නොවීය . සමහර බෙහෙත් වර්ග ගමේ සමහර උදවිය ලවා සොයාගැනීමට හැකිවිය . එහෙත් ඒ කුමන අරමුණක් සඳහාද යන්න මුවින් නිදහස් නොකිරීමට මමද සීයාද වගබලා ගතිමු .

බෙහෙත් වර්ග සොයා අඹරා කළයුතු සියලු දේවල් සිදුකර අවසානයේ කළුගල් මෘදු කරනු ලබන එක මාහැඟි ඖෂධය සාදා අවසන් කරන ලදී . මෙම ඖෂධය පරීක්ෂා කරබැලීමට සීයා දිනක් කටයුතු කළේය . බෙහෙත් ගෑ කළුගල් කැබැල්ල සීයා විසින් පිරිමැද බැලුවේය . පුදුමයකි . එය මැටි පිඩක් සේ මෙලෙක් වී තිබිණි .

" සීයේ හරිම පුදුමයි නේද ? "

" ඒ කාලෙ ලොකු ලොකු බුදුපිළිම නෙලන්න , ගල් කැටයම් නෙළන්න මේ වගේ බෙහෙත් තමයි පුතේ උදවු උපකාර වෙන්න ඇත්තේ . නැත්නම් කොහොමද ඒ තරම් සුමුදුවට ඒ කැටයම් නෙලන්නේ "

" මටනම් හරිම පුදුමයි සීයේ "

" එහෙනම් අපි නිධන් පෙට්ටිය විවෘත කරන්න සූදානම් . හෙටම යමු පන්සලට "

සීයාත් මමත් පසුදා පන්සලට ගියෙමු . නායක ස්වාමෙන් වහන්සේගේ අනුදැනුම ඇතිව නිධන් පෙට්ටිය විවෘත කිරීමට කටයුතු කරන ලද්දේ සීයා විසිනි . එම කාලය තුල මා කරන ලද්දේ පැත්තකට වී බලා සිටීම පමණි . සීයා පළමුව පිරිසිදු පොල් කොස්සක් රැගෙන ගල් පෙට්ටියේ පියන වටා හොඳින් පිරිසිදු කළේය . ඉන්පසුව ඖෂධ කුප්පිය රැගෙන එය විවෘත කර පියන වටේටම එම බෙහෙත් ආලේප කළේය . පසුව අව්ව වැටීමට සැලසීම ගැටළුවක් විය . ඒ නිසා සීයාත් මමත් නායක ස්වාමීන් වහන්සේත් එක්ව නිධන් පෙට්ටිය ආවාස ගෙයින් පිටතට රැගෙන විත් නැවත ආවාසගෙය තුලට රැගෙන ගියෙමු .

මද වෙලාවක් සිට සීයා තම හඬ අවධි කළේය .


" හාමුදුරුවනේ පොඩ්ඩක් බෙහෙත් ගලවපු හරියෙන් අත තියලා බැලුවනම් "

" හරිම පුදුමයි අරනෝලිස් . හරියට දැන් අනාපු මැටි වගේ මුර්දු වෙලා "

සීයා ඉනේ ගසා සිටින කිස්නිස්ස රැගෙන දොදොල් කපන්නා ගානට සීරුවට බෙහෙත් ගලවපු ස්ථානය වටේ පිහියෙන් කපාගෙන ගියේය . ඉන්පසුව සෙමෙන් සෙමෙන් පියන එසවීමට තැත් කරත්දී මමද ඊට සහාය විමි . මද ආයාසයකින්ම පියන විවෘත විය .

ගල් පෙට්ටිය පිරෙන්නම සෑදුනු රත්රන් පෙට්ටියක් ඒ තුල විය . එහි අගුලු ලා තිබුණේ නැත . පියන ඔසවා ඉවත් කිරීමට හැකි අයුරින් එය නිමවා තිබිණි . සීයා එහිද පියන විවෘත කළේය . අංජනමෙන් කියවුණු සධාතුක කරඬුව , සන්නස ඇතුළුව තවත් පූජා භාණ්ඩ කීපයක් ඒ තුල අන්තර්ගතවී තිබිණි . ඒ අතර මාගේ සිත් ගත් දෙයක් වූයේ එහි වූ කුඩා රත්රන් කඩුවයි .

" හාමුදුරුවනේ එහෙනම් ඔන්න අපි අමාරුම රාජකාරිය ඉෂ්ට සිද්ද කරගත්තා "

" අරනෝලිස් . ධාතු කරඬුව තැම්පත් කරන්න ඕන බුදු කුටියේ . අරනොලිස්ම ශාතු කරඬුව හිස මතට ගත්තනම් තමයි හොඳ "

" හොඳමයි හාමුදුරුවනේ "

සීයා සධාතුක කරඬුව රැගෙන හිසමත වඩා හිඳුවා ඇත දෙකෙන්ම එය අලාගෙන බුදුකුටියවෙත සංයමයෙන් යුතුව ගමන් කළේය . නායක ස්වාමීන් වහන්සේ එය සීයාගේ හිස මතින් රැගෙන බුදු කුටියේ බුද්ධ රූපයේ දෑත් මත තැම්පත් කළහ .

" සාධු සාධු සාධු !!!!! "

" දැන් ගමේ උදවියට කියන්න ඕන ඇවිත් ධාතුන් වහන්සේලා වැඳ පුදාගන්න ඇවිත් යන්නය කියලා . ආයේ කවදා ඉතින් මේ වගේ අවස්ථාවක් ගමේ උදවියට ලැබෙනවා කියලද ? "

" හාමුදුරුවනේ සන්නස කියවන්න දැන් වෙලාවක් නැහැ නෙව . ඒ නිසා පන්සලේම ඒවා තැම්පත් කරලා තියාගන්න . මමයි චූටි පුතයි එන්නම් ආයෙත් වෙලාවක . නැත්නම් හාමුදුරුවෝ ඒ දේවල් පොඩ්ඩක් කියවලා බැලුවනම් හොඳයි කියලා තමයි මට හිතෙන්නේ . කොහොමත් ඒ භාෂාව මම දන්නෙත් නැහැ . ඒ නිසා හාමුදුරුවන්ට තමයි ඒක කියවලා බලන්න වෙන්නේ "

" මම අද රෑටම ඒක කියවන්න පටන් ගන්නවා අරනෝලිස් . අපි එහෙනම් ගිහින් නිධන් පෙට්ටියේ පියන තියලා තියමු . දැන් මට ඒක උවමනා වෙලාවට බලන්නත් පුළුවන් නිසා ඕන වෙලාවක සන්නස අරගෙන කියවලා බලන්න පුළුවන් "

මමත් සීයාත් නායක ස්වාමීන් වහන්සේත් ආවාසගෙය තුලට නැවත ඇතුල්වීමු . සන්නස ගැනීමට නායක ස්වාමීන් වහන්සේ නිධන් පෙට්ටිය තුලට අත දමනවිටම සීයා කෑගැසුවේය .

" හාමුදුරුවනේ බලාගෙන ඔන්න ඔතන නයෙක් "

ඊළඟ කොටසින් හමුවෙමු .

ඔබ සැමට සමන් දෙවිඳුගේ පිහිට ලැබේවා !