උල් අඩි සෙරෙප්පුව







ලැබ් එක ඉවර වී ගිය සිකුරා දා මා
ගෙදරට එන්න අටියෙන් දක්නට අම්මා
බසයට ගොඩ උනා මිණිපුර මහරගමා 
අසුනට බර උනෙත් වට පිට බලමින්මා

දෙතුන් දෙනයි හිටියේ මුළු බසයටම
නමුත් විනාඩිය දෙක ගතවන කොටම
ආවා සෙනග දොර දෙකොනෙන් පිරෙන්නම
ඩ්‍රයිවර් අයිය පෑගුවනේ ලැල්ලටම

දැන් ටික ටික බස් එක ගමනේ යනවා
මගෙ ටික ටික නිදි නැති ඇස් පියවෙනවා
හිස ටික ටික මගෙ පහලට යොමුවෙනවා
කොට්ටාවට ටික ටික දැන් ලං වෙනවා

කොන්දයියා ඇවිදින් මා සිටි තැනට
තට්ටු දෙක තුනක් දැම්මා පිට මැදට
මල්ලි ගෙදර යනවා වාගේ ජයට
දෙන්න ටිකට් ගන්න සල්ලි කිව්ව මට

කොට්ටාවේ බස් නැවතුම අසල සකී
බසය නැවැත්තුවෙ ගන්නට සෙනග සකී
සුන්දර දිගැසියක් බසයට එනව සකී
දැක්කම මගේ නිදිමත උඩ ගියා සකී

කොණ්ඩය ඇගේ ලේයර් කරලා තිබුණා
කොන්ඩ කටුත් රන් වන් පැහැයෙන් දිලුනා
සිහින් කෙස් රොදක් විත් නළලට තිබුණා
ඇස් දෙක මගේ ඈ වෙත කැරකී තිබුණා

සිහින් නළල් තල ඇගෙ හඳ පළුව වගේ
ඇස් දෙක ඇගේ බ්ලූ සෆාය මැණික් වගේ
චූටි නහය බට්ටිච්චගේ හොටය වගේ
කටට දෙන්න උපමාවක් නැතුව වගේ

අළු පාටයි ඇය හැඳ සිටි බ්ලවුස් එක
විලේ හංස ජෝඩුව ඇත නොනින්දක
ඉඟටිය ගන්නට අකුලා එක මිටක
ගන්නට නොසිතයි ඇය දුටු කෙනෙක් සැක

මැද පොල්ලේ එල්ලෙන සොඳ මහතුන්නේ
අල්ල පනල්ලේ ඇයි එක තැන ඉන්නේ
කරුණාකර පස්සට යමු කියමින්නේ
කොන්දයියා හරි හයියෙන් මොර දෙන්නේ

ටික ටික ටික මැද පොල්ලේ ඉන්න අය
පස්සට යන්නේ කොන්දට රවමින්ය
සුන්දර දිගැසියත් ඒ හා ඇදෙමින්ය
ඇවිත් නැවතුනේ මට අඩි තුනකින්ය

එකවර ඇය මා දෙස ඇගෙ ඇස හරවා
බලනා බව මට මීටර් වී නැතුවා
ගන්නට මගෙ ඇස් දෙක ඇවෙතින් හරවා
ඇදෙස බලා සිටි මා චාටර් වූවා

රතු තොල් ඇති මුව සරසා නැති උපමා
දසන් විදා සිනහව පා ඇය හා මා
අහකට නෙත් යුග ගත්තේ සිතකින් මා
නොව එය නොකරා ඉන්නට බැරියෙන් මා

සුන්දර දිගැසියේ ඔබ යන්නේ කොහිද
අහන්නට සිතයි ඒ බව කියනවද
ඒත් හිත භයයි නාගන්නට වෙයිද
කියලා හිතන්නට තව මොකවත් නැතිද

අවි උස්සපු වේල්ල වෙත බස් රථය
දන්නේ නැති ලෙස එය දැන් ලං වීය
වයසක අම්මෙක් නැග්ගේ එහිදීය
කතාව ඇරඹුනෙ මචන්ලා මෙහිදීය

වයසක අම්මා මා ඉන්නා අසල
සිටගෙන ඇති බව දැක මගෙ හද සසල
වී දුන්නා මගෙ ආසන නොව ලොල්ල
රූබර දිගැසියත් ඇත දැන් මා අසල

ඇගෙ සුකොමල මුහුණ මගේ උර හිසට
තිබ්බේ දෑඟුලක් පමණකි සම වෙන්ට
හිසට කලින් හිත මුල් තැන අරගන්ට
හිත කිව්වේ මට ඇය දෙස බලන්නට

ආයෙත් ඇය මගෙ දෙස දෙවරක් බලලා
රතු තොල්පෙති විවර කරා එකල් බලා
අයියා යන්නේ මිණි පුරටද කියලා
ඇසුවේ මා ගන්න කලින් මුල පුරලා

මගෙ කට කණ සොයමින් යන බව දැනිලා
දන්නෙම නැති පැණි මුට්ටිය ඉවත හලා
ඔව් නංගියෙ මම මිණිපුර යමි කියලා
දුන්නා පිළිතුරක් තව පැන එයි කියලා

හිතුව වගේ දිගැසිය දැන් විඩෙන් විඩ
මගෙන් එව්වා මෙව්වා අහනවා හැඩ
මමත් ඇයට දාමින් මගෙ නොයෙක් වැඩ
කතා කරේ බලමින් ඇය දුන්න හැඩ

අයියේ මම කුරුවිට හරියෙන් බැහැලා
යන්නම් එහෙනම් ගෙදරට පිය මැනලා
මම ඉන්නේ NIBM කියලා
දිගැසිය මට කිව්වා යන්නම් කියලා

යන්න එපා ස්වීටි නගේ මා දාලා
මිණිපුර ගිරිහෙල් අරඹේ ඇති නිමලා
මගෙ නිවසට කැන්දන් යන්නම් පැනලා
කියන්නටම කිව්වා මගෙ සිත සැලිලා

දිගැසිය මට සමුදී යන්නම් කියලා
වම් පස සිටි ඇය මගෙ දකුණට පැනලා
බසයේ දොර වෙත යන්නට පිය මැනලා
ඇරඹුවෙ මගෙ පිටි පතුලට කෙලවාලා

ඇගෙ සෙරෙප්පු ජෝඩුව පොෂ් එකක් නිසා
උල් අඩි දෙක තිබුණේ ඊ තල විලසා
යනවිට ඇය මා හද පෙම් මල් ගවසා
ඇනුනේ මගෙ ඇඟ නංවා හිරි වරුසා

ඇගෙ සුකොමල වත මට අමතක වීය
සුළුදිය පහවන්නට මෙන් සිත් වීය
එච්චර චාටර් වන්නට නොම වීය
දන්නා හැම කුණු හරුපම සිත් වීය

තෝ පරට්ටි &$%^%#^%&* නීයන්
මට රිදවූ සෙරෙප්පු දෙක *#&&^නීයන්
යන යන තැන තෝ &&%$$&**() නීයන්
අවසානේ තොගෙ %#@%^&&(&^ නීයන්


ලැබ් එක ඉවර වී ගිය සිකුරා දා මා ගෙදරට එන්න අටියෙන් දක්නට අම්මා බසයට ගොඩ උනා මිණිපුර මහරගමා  අසුනට බර උනෙත් වට පිට බලමින්මා දෙ...

මුදු මුහුණේ සුව දැනුනේ මගෙ විතරද ?






ගීතයක් ගැන ලියන්න ඕන කියලා හිත හිත හිටියට ලියන්න තරම් වැදිච්ච සිංදුවක් මේ දවස් වල තිබුණේ නැහැ . මේ දවස්වල වැඩියෙන්ම අහන්නේ වාදන . රවි ශංකර් , අනුෂ්කා ශංකර් , සකීර් හුසේන් , පන්නලාල් ගෝෂ් , හරිප්‍රසාද් චෞරසියා වගේ අයගේ වාදන තමයි ඒ වාදන ලිස්ට් එකේ තියෙන්නේ . අපේ ගෙදර ටිකක් සද්ද බද්ද වැඩියි . මොකද පොඩි චරිතයක් නිතරම ගෙදර ඉන්න නිසා .

ඒ නිසා පොතක් කියවන්න ගත්තත් කේන්දරයක් බලන්න ගත්තත් fb ආවත් හැමවෙලේම වගේ මම ඔය වාදනයක් හෝ ගීතයක් දාගෙන හෙඩ් සෙට් එක කනේ ගහගෙන තමයි වැඩ කරන්නේ . මේ ගීතය මතක් වුනේ දවසක් කේන්දර ලියලා තියෙන පොත පෙරලනකොට .

ජ්‍යෝතිෂ විද්‍යාව එදා ඉඳලා අද දක්වා පරිණාමය වුණේ සෘෂි වරුන්ගේ න්‍යායාත්මක දැනුම සහ ඒ ඒ කාලවල පහළවෙච්ච විශාරදයින්ගේ පරීක්ෂණ මත . ඒ නිසා මමත් ලැබෙන හැම කෙනෙක්ගෙම කේන්දර එදා ඉඳලාම පොතක ලියනවා එකතු කරලා විශ්ලේෂණය කරලා මොනවා හරි අලුත් දෙයක් කරන්න . 

ඒ නිසා ඒ ඒ අයගේ විශේෂතා කේන්දරේම ලියලා තියෙනවා . වෙලාවක් ලැබුණු වෙලාවේ මම මේක දවසක් ආයෙත් මුල ඉඳලා පෙරලලා බැලුවා . ඔය බලන අතරේ දකින්න ලැබුණු කේන්දරයක් තමයි අද කතාවට මාතෘකා වෙන්නේ . ඊට පස්සේ අපි එමු ගීතයට . 


ගිය අවුරුද්දේ අන්තිම මාසේ දවසක මට කෙනෙක් කේන්දරයක් මගේ fb එකවුන්ට් එකට මැසේජ් කරලා තිබුණා ඒකෙ ගුණ අගුණ කොහොමද කියලා කියන්න කියලා . මම ඊට පස්සේ ඕක බලන්න ලොකු කාලයක් ගත්තා . මොකද ඒක ලැබෙන්න කලින් ගොඩක් කේන්දර ලැබිලා තිබුණු නිසා . 

ලැබුණු පිළිවෙලට තමයි මම බලන්නේ ඒක සාධාරණ නිසා . දවසට කේන්දර දෙකක් විතරක් බලන්න තමයි මම වෙලාව තියාගෙන ඉන්නේ . එතකොට අනිත් දේවලුත් සමබර කරගෙන කරන්න පුළුවන් නිසා . ඒත් මේ කේන්දරේ බලන්න ගොඩක් කල් ගියා . ඊට පස්සේ දවසක් ඔන්න මෙයා මට ආයෙත් මැසේජ් කරලා තිබුණා . 

ඒ මැසේජ් එකේ කියලා තිබුණේ එයාගේ පවුල් ජීවිතයේ ප්‍රශ්නයක් තියෙනවා . ඒක තවම විසඳගන්න ලැබුණේ නැහැ ඒ නිසා කේන්දරේ ඉක්මණට බලලා දෙන්න කියලා . 

එයා විවාහක කෙනෙක් . ඉතින් හදිස්සියි කිව්ව නිසා මම ඒක ඉක්මණට බැලුවද ? . නැහැ . වයලීනෝ එහෙම කෙනෙක් නෙවෙයි නිසා හරියට පිළිවෙලට බලාගෙන ඇවිත් ඔන්න හරි තැනදී ඒකත් බැලුවා . කේන්දර බලනකොට කේන්දරේ ගන්න වෙලාවේ මම කේන්දරේ දෙන කෙනාගෙන් අහන විශේෂතම ප්‍රශ්නය තමයි මගේ පළාපල කථනය හරහා විශේෂයෙන් දැනගන්න උවමනා මොනවාද කියන එක . මොකද එයාලට අවස්තාවක් දීමෙන් වඩාත් හොඳ විස්තරයක් ලබාදෙන්න පුළුවන් නිසා . 

මෙයා ඒකට කියලා තිබ්බේ එයාගේ පවුල් ජීවිතය කොහොමද , දරු පල කොහොමද ? , එයාගේ වෙනත් සම්බන්ධතා ඇතිවීමේ හැකියාවක් තියෙනවද ? එයාගේ බිරිඳට වෙනත් සම්බන්ධතා ඇතිවෙන්න හැකියාවක් තියෙනවද කියන එක . ඔය ප්‍රශ්න ඔක්කොටම මම ළඟ කේන්දරේ හරහා උත්තර තිබුණා . මම ලවා කේන්දර බලවාගත්ත අය දන්නවා ඇති මම කියන කතා , ඔයවගේ ඒවා ගැන . 

ඇඟට දැනෙන්නේ නැතිවෙන්න මම කියන ඔය වගේ දේවල් තේරුම් ගන්නේ බොහොම පොඩ්ඩයි . තේරුම් ගත්තේ නැති වුණාම සමහර අයට මම ඒක අන්තිම මොහොතේ තේරුම් කරනවා . එහෙම කරන්නේ ඉගෙන ගත්ත යමක් කමක් තේරුම් ගන්න මොලයක් තියෙන අයට විතරයි . නැත්නම් පවුල් අවුල් වීම වෙන නිසා ඒවා කියවෙන්නේ නැහැ . 

ඔන්න ඉස්සෙල්ලම පිරිමි කෙනාගේ කේන්දරේ බැලුවා . හරි අවුලක් නැහැ . ඒකෙ තියෙනවා වෙනත් සම්බන්ධතා ඇතිවෙන්න පුළුවන් කියලා එයාට . ඊට පස්සේ ඒ ගැන කිව්වා . කිව්වට පස්සේ මිනිහත් කිව්වා ඔව් එහෙම එකක් තියෙනවා කියලා. ඊට පස්සේ මෙයා කිව්වා තමන්ට බිරිඳගේ කේන්දරේ බලවාගන්න ඕන කියලා . මම ඊට පස්සේ කිව්වා මම බලලා දෙන්නම් හැබැයි ටික දවසක් දෙන්න කියලා . 

ඔන්න ඔය ටික දවසට තමයි මෙයා පිස්සු නටන්න ගත්තේ . හැමදාම මට මැසේජ් කරන්න ගත්තා බිරිඳ පිට යන්න පුලුවන්ද කියලා අහලා . ඒ අස්සේ අහනවා තමන්ට මීටත් අමතරව වෙනත් සම්බන්ධතා ඇතිවෙන්න පුලුවන්ද කියලා . මම බිරිඳගේ සහ සැමියාගේ කේන්දර දෙක එකට තියලා බැලුවා මොකක්ද අවුල කියලා . දෙන්නා වෙන් වෙන්න පුළුවන් . ඒත් බිරිඳ චරිතය නසාගන්නවා කියලා පෙන්නුම් කරන මොකවත තිබුණේ නැහැ .




ඔය මැසේජ් ටික සාවධානයෙන් බලපු මම ඒත් හිටියා එයාගේ අවස්ථාව ආවම එයාගේ බිරිඳගේ කේන්දරේ බලලා දෙනවා කියලා හිතාගෙන . මෙයා එන්නේ මෙයාගේ හිතේ තියෙන දේවල් වලට මගේ පළාපල විස්තරේ අවියක් කරගන්න කියලා මට තේරුම් ගිය නිසා මම ඒ කේන්දරය බැලීම ප්‍රතික්ෂේප කරා . 

පස්සේ එයා බැගෑපත් වුණත් මම ඒක ප්‍රතික්ෂේප කරා . ඇත්තටම හොඳ බිරිඳක් එයාට හිමිවෙලා තිබුණා . එයාට තිබුණේ වෙනත් ගෑණු පස්සේ යන්න තියෙන උවමනාවට හිත හදාගන්න හේතු හොයන්න තිබ්බ උවමනාවක් .

කේන්දර බැලීම ප්‍රතික්ෂේප කලත් මම එයාට කිව්වා ඔයාට වඩා ඔයාගේ බිරිඳගේ කේන්දරේ හොඳයි . ඒ කියන්නේ එයාගේ ජීවිතය හොඳයි  . ඔයා බැන්දට පස්සේ තමයි එයාට දුක් විඳින්න වෙනවානම් වෙන්නේ කියලා . එයා ඒක පිළිගත්තා . ඒත් ඊට පස්සෙත් ප්‍රශ්නය වුණේ බිරිඳ පිට යනවද කියන එක . ඉන් එහා මම ඒ ගැන මොකවත් අදහස් දක්වන්න ගියේ නැහැ .

ඔයවගේ අත්දැකීමක් මට ලැබුණාමයි . 

මෙතන පිරිමියා රැකියාවක් කරන්නේ නැහැ . ඉගෙනගෙනත් නැහැ . බිරිඳ තරමක් ඉගෙනගෙන . රැකියාවක් කරනවා . උපයනවා . බිරිඳ උපයන සල්ලිවලින් කකා , තව බිරිඳ පිට යනවද කියලා සැක කරන එක කොච්චර පහත් වැඩක්ද . ඊටත් වඩා පිළිකුල් සහගත දේ තමයි ජීවිතය සාර්ථක කරගන්න පාරවල් කියලා දෙන ජ්‍යෝතිෂ විද්‍යාව වගේ ඉගැන්වීමක් ඇයි මේ මිනිස්සු ජීවිතේ නැති කරගන්න නාස්ති කරගන්න පාවිච්චි කරන්නේ කියන එක . 

බිරිඳ පිට ගියා කියමුකෝ , ඒක හොයාගන්න කේන්දරෙන් පුළුවන් වුණත් එයාගේ අරමුණ මොකක්ද කියලා පැහැදිලි නිසා මම කිව්වේ නැහැ . අවසාන වශයෙන් මම කිව්වේ බිරිඳ පිට යනවානම් කොන්දක් තියෙනවනම් කෙලින්ම පස්සෙන් ගිහින් හොයාගන්න කියන එක . එතනින් ඒ කතාව අවසන් වුණා . 

කේන්දර බලන්න ගිහින් සමාජය ගැන මාර දේවල් තමයි අහන්න දකින්න ලැබුණේ . 75% වගේම තියෙන්නේ අන්ධ වීම නිසා ජීවිතේ විනාශ කරගත්ත අවස්ථා . ඒත් 25 % වගේ තියෙනවා හොඳ තත්වයක් . මේ ගතවුණු කාලයටම සැලකිය යුතු ප්‍රශ්න නැති එකම එක පවුලක් මට හම්බෙලා තියෙනවා .

ඒවගේම තමයි බිරිඳගේ ඉතිහාසය හොඳ නැති ඒත් වර්තමානය හොඳ නිසා අනාගතයත් හොඳ වෙයි කියලා බලාපොරොත්තුවෙන් හිත හදාගෙන ඉන්න , තමන්ගේ ඉතිහාසයත් හොඳ නැති නිසා බිරිඳට ඇඟිල්ල දිගු කරන්නේ නැතිව වර්තමානය හොඳින් ගත කරන දෙවිවරු වගේ චරිතත් මට හමුවෙලා තියෙනවා .

ස්වාමියාගේ වැරදි ඉවසාගෙන ඒවා ටික ටික හදාගෙන දියුණුවෙන්න බලන ධෛර්යවන්ත් කාන්තා චරිතත් මට හමුවෙලා තියෙනවා . ඒ හැමෝම තමන් ගත කරන ජීවිතය උපේක්ෂාවෙන් බලලා ගොඩ යන්න ගන්නා උත්සාහය හරිම ප්‍රශංසනීයයි .





ඒ හැමදේම ගැන හිතලා බලනකොට අවසානයේ පේන්නේ තමන්ගේ හිත පාලනය කරගන්න බැරි වීම නිසා තමයි හැමදේටම ප්‍රශ්න අරගෙන එන්නේ කියලා . ලැබුණු දේ හොඳයි කියන මතයෙන් ඉදිරිය ගැන කල්පනා කරලා වැඩ කරන්නේ නැතුව ලැබුණු දේවල වල වැරදිත් නොලැබුණු දේවල් ගැනත් හොයන එකයි හොඳ නැතිම දේ . අනික තමයි අනුන්ට ඇඟිල්ල දිගු කරන්නේ නැතිව ඉස්සෙල්ලම තමන් හොඳට ඉන්න ඕන කියන දේ . තමන් කරන පැමිණිල්ල හෝ දෝශාරෝපනය සාධාරණ එකක් වෙන්නේ අන්න එතකොටයි .

කේන්දර පොත පෙරලන වෙලාවේ ඔන්න ඕවා එක්ක තමයි මෙන්න මේ ගීතය මතක් වුණේ . ඊට පස්සේ ගීතය ගැන හොයලා බැලුවාම එක එක වර්ගයේ මත තිබුණා . ඒත් මම හිතුවා ඒ කේන්දර කතාවෙන් ලැබුණු ආරම්භයත් එක්ක මේ ගීතය ගැන ලිව්වනම් හොඳයි කියලා .

ඉස්සෙල්ලම අපි ගීතය අහලා ඉමු . හෙඩ් සෙට් දාගෙන ගීතය අහන්න . නැත්නම් ගීතයේ හොඳ සංගීතය ඇඟට දැනෙන එකක් නැහැ .





මුදු මුහුණේ සුව දැනුනේ
පිය ලඳුනේ මට විතරද
ඔබෙ සුසුමේ සුව දැනුනේ
හිමි සඳුනේ මට විතරද...

පුළුලුකුලේ සුව යහනේ
නිදි වැරුවේ මන් විතරද
උර තලයේ හිස රන්දා
සුව වින්දේ මන් විතරද...

ඉඟ නෙරියේ රැළි බින්දේ
පිය ලඳුනේ මන් විතරද
ඉඟ නෙරියේ රැළි සැදුවේ
හිමි සඳුනේ මගෙ විතරද...

පද රචනය -මහින්ද දිසානායක



සංගීතය     -ගුණදාස කපුගේ



ගායනය     -දීපිකා ප්‍රියදර්ශණී / කරුණාරත්න දිවුල්ගනේ







මේ ගීතය විවාහක යුවලක් අතර සිදුවෙන ගැටීමක් විදියට සමහරෙක් අර්ථ දක්වලා තිබුණා . ඒවගේම තවත් කෙනෙක් ලියලා තිබුණා මේ ගීතයෙන් කියවෙන්නේ අවිවාහක යුවලක් ඒත් ලිංගික හැසිරීමක් වෙනුවෙන් සූදානම් වන අවස්ථාවක දෙන්නාගේ හිතේ ඇතිවෙන ප්‍රශ්න සමුදායක් ගැන කියලා . මොකද හදිස්සියේ හෝ සැලසුම් කරලා හෝ ඒ වෙනුවෙන් වෙලාවක් හදාගෙන මේ දෙන්නා හමුවෙන වෙලාවේ මේ පිරිමියාට මේ කාන්තාව කෙරෙහි ආදරයක් ඇතිවෙනවා . පෙනුමට හෝ හැසිරීම නිසා වෙන්න ඇති . ඒ ආදරය නිසා මේ සම්බන්ධය තව දුරටත් අරගෙන යන්න හෝ විවාහ වෙන්න පුළුවන්ද කියලා ප්‍රශ්න කරන ස්වභාවයෙන් මේ ගීතය නිර්මාණය වෙලා තියෙනවා කියලා තමයි එතැන විස්තර කරලා තිබුණේ .

මේ ගීතය අහනකොට මටනම් හිතෙන්නේ විවාහක යුවලක් පවුල් ප්‍රශ්නයක් ආරම්භ කරගන්න සූදානම් වෙන අවස්ථාවක් මේ ගීතයේ සඳහන් වෙලා තියෙනවා කියලා තමයි . විවාහක යුවලක් කියලා කියන්න මම මෙන්න මේ දේවල් තමයි හේතු කරගත්තේ .

ගණිකාවකට " පිය ලඳුනේ " කියලා ආමන්ත්‍රණය කරයි කියලා විශ්වාස කරන්න බැහැ . ඒවගේම තමයි හදිස්සියේ මුණ ගැහුණු දෙන්නෙක් අතරේ මේ දෙබස වෙනවානම් පිරිමියා කාන්තාවට " පිය ලඳුනේ " කියලා ආමන්ත්‍රණය කරන්නත් කාන්තාව විසින් පිරිමියාට " හිමි සඳුනේ " කියලා ආමන්ත්‍රණය කරන්නත් හැකියාවක් නැති නිසා . අනිත් කාරණාව තමයි පුළුලුකුලේ සුව යහනේ නිදි වැරුවේ මං විතරද කියලා ප්‍රශ්න කිරීම . අවිවාහක යුවලක් නම් ඔය ප්‍රශ්නය අහන්න අවශ්‍ය වෙන්නේ නැහැ . ගණිකාවක් නම් ඒත් අහන්න උවමනාවක් වෙන්නේ නැහැ .

ගීතය ගැන පොදුවේ මෙන්න මෙහෙම අදහසක් තමයි මම දරන්නේ . විවාහක යුවලක් විවාහ වෙලා ටික කාලයක් ගතවුණාට පස්සේ ඒ දෙන්නා ගැන දෙන්නටම සැක හිතෙනවා . ගීතයෙන් කියවෙන්නේ සැකයේ ආරම්භය . ඒ කියන්නේ හිතෙන් සැක කරන අවස්තාව ගැන . සමහර වෙලාවට පෙම්වතුන් අතරෙත් මේ වගේ ප්‍රශ්න ඇතිවෙනවා . ඒක වගකීම් රහිත ප්‍රශ්න ඇතිවීමක් . පෙම්වතුන් අතරේ සැකය ඇතිවීමෙන් වෙන් වුණා කියනවාට වඩා ලොකු ප්‍රශ්නයක් ඇතිවෙනවා විවාහ වෙලා ඉන්නා දෙන්නෙක් අතරේ ප්‍රශ්නයක් ඇතිවෙලා වෙන් වුණාම . ඒ නිසා සැකයේ වාසියට ඉඩ දීම නෙවෙයි වැදගත් වෙන්නේ හරියටම අදාළ කාරණය ගැන හොයලා බලලා වැඩ කරන එක තමයි වැදගත් වෙන්නේ . අපි බලමු ගීතය ගැන .





මුදු මුහුණේ සුව දැනුනේ
පිය ලඳුනේ මට විතරද

ඔබෙ සුසුමේ සුව දැනුනේ
හිමි සඳුනේ මට විතරද...

ස්වාමියා අහනවා බිරිඳගෙන් ඔබගේ මෘදු මුහුණේ සුවය දැනුනේ මට විතරද කියලා . ඒ කියන්නේ මුහුණ සිප වැලඳ ගත්තේ ස්වාමියා විතරද කියලා . එතකොට බිරිඳටත් තියෙනවා ඒවගේම ප්‍රශ්නයක් . ඒ තමයි ඔබෙ සුසුමේ සුව දැනුනේ හිමි සඳුනේ මට විතරද කියන ප්‍රශ්නය . 

ස්වාමියා බිරිඳගෙන් ප්‍රශ්න කරනවාට වඩා සැර ගතිය වැඩි අර්ථයක් තමයි බිරිඳ ස්වාමියාගෙන් කරන ප්‍රශ්නයෙන් මම දකින්නේ . ඔබෙ සුසුමේ සුව දැනුනේ කියලා කියනකොට එතනින් වක්‍රාකාරව ලිංගික එක් වීමක වේගවත් සුසුම් පහර වුණත් අර්ථවත් කරන්න පුළුවන් . කොහොමත් බිරින්දෑ වරුන්ගේ ප්‍රශ්න කිරීම් සැර නිසා ඒ තර්කය සාධාරණ වෙන්න ඕන . 

දෙන්නට දෙන්නා සැක කරනවා . තවම ගිනි පත්තුවෙලා නැතත් ගිනි පත්තු වෙන්න ඔන්න මෙන්න වගේ තමයි තියෙන්නේ . දෙන්නම ගින්න අවුලව ගන්න මාවතක් හොයනවා කියලා තමයි ගීතයෙන් පේන්නේ . ගීතයේ සංගීතය ගැන කියනකොට මට ඒකට හොඳ සාක්ෂි තියෙනවා . අපි එතකොට බලමු ඒ මොනවද කියලා . 





පුළුලුකුලේ සුව යහනේ
නිදි වැරුවේ මන් විතරද

උර තලයේ හිස රන්දා
සුව වින්දේ මන් විතරද...

ඊළඟට පිරිමියා ප්‍රශ්න කරන්නේ බිරිඳගෙන් , ඇයගේ උකුල් තලයේ හිස තියාගෙන නිදි වැරුවේ ස්වාමියාම විතරද කියලා . නිදි වරනවානම් , මුලින් කිව්වා වගේ ගණිකාවක් හෝ ප්‍රේම වන්තියක් නොවෙයි නම් . මේ ගීතයෙන් විවාහක යුවලක් ගැන කියවෙනවා කියන එක සාධාරණයි කියලා මම ආයෙත් මතක් කරනවා .

එතකොට බිරිඳටත් ඒවගේම ප්‍රශ්නයක් එනවා තමන්ගේ ස්වාමියාගේ උර තලයේ හිස තියාගෙන ඒ සුවය වින්දේ තමන් විතරමද කියලා . ගීතය මුල ඉඳලා ක්‍රම ක්‍රමයෙන් උච්චත්වයට ගමන් කරනවා වගේ තමයි පේන්නේ . අපි බලමුකෝ දෙවෙනි අන්තරා කොටස කොහොමද කියලා .





ඉඟ නෙරියේ රැළි බින්දේ
පිය ලඳුනේ මන් විතරද

ඉඟ නෙරියේ රැළි සැදුවේ
හිමි සඳුනේ මගෙ විතරද...

ගීතයේ අර්ථයේ පිළිවෙලින් ගලායාමේ උච්චම තැන තමයි මේක . ප්‍රශ්න කිරීමේ ඉහළම ප්‍රශ්නය . ඉඟ නෙරියේ රැළි බින්දේ පිය ලඳුනේ මං විතරද ? . ඉඟ නෙරියේ රැලි බිඳිනවා කියන එකෙන් කියන්නේ ශරීරයේ වස්ත්‍ර ඉවත් කිරීම . 

හැබැයි වස්ත්‍ර දෙකක් තියෙනවා නෙරිය තියන . එකක් චීත්තය . අනික තමයි ඔසරිය . විවාහයෙන් ඔසරියත් , පසු කාලීනව චීත්තයේ නැත්නම් සේලයේ නෙරියේ රැලි බින්දේ ස්වාමියා විතරද කියලා තමයි ඒ ප්‍රශ්න කරන්නේ . ඒ ආකාරයෙන් වක්‍රව අහන්නේ ලිංගික ඇසුරක් පැවතුනේ ස්වාමියා එක්කමද කියන එක . 

බිරිඳ අනික් අතට අහනවා ඉඟ නෙරියේ රැළි සැදුවේ හිමි සඳුනේ මගෙ විතරද කියලා . ඒකෙන් කියන්නේ ස්වාමියා ලිංගික ඇසුරක් පවත්වලා තියෙන්නේ තමා එක්කම විතරද කියන කාරණාව . ගීතය මේ ආකාරයට අවසාන වුණත් මේ ගීතයේ හොඳ තැන් කීපයක් තියෙනවා මතක් කරන්න . 

කලින් කිව්වා වගේ මේ ගීතයේ සිප ගැනීම , උකුලේ හෝ උර තලයේ නිදි වැරීම , අවසානයේ ලිංගික ඇසුර කියන පිළිවෙලට ගීතයේ අර්ථය පහළම තැන ඉඳන් උච්චතම අවස්වථා දක්වා ගමන් කරලා තියෙනවා . ඒක විශේෂයි ගීතයේ . 

ඒවගේම තමයි මේ ගීතයේ මාත්‍රා විසිහතරේ විරිත රැකලා තියෙනවා අපේ වචනයෙන් කියනවනම් ආයේ නෑ සුපිරියටම . 

මුදු මුහුණේ සුව දැනුනේ පිය ලඳුනේ මට විතරද
ඔබෙ සුසුමේ සුව දැනුනේ හිමි සඳුනේ මට විතරද...

පුළු ලුකුලේ සුව යහනේ නිදි වැරුවේ මන් විතරද
උර තලයේ හිස රන්දා සුව වින්දේ මන් විතරද...

ඉඟ නෙරියේ රැළි බින්දේ පිය ලඳුනේ මන් විතරද
ඉඟ නෙරියේ රැළි සැදුවේ හිමි සඳුනේ මගෙ විතරද...


සමහර තැන් වල අවශ්‍ය විදියට හල් අකුරු වැටිලා තිබුණත් විරිත රැකිලා තියෙනවා . ඒ විරිත රැකිලා තියෙන නිසා ගීතය නිකං කියවාගෙන ගියත් ඇඟට දැනෙන්නේ අමුතුම ගතියක් . සිංහල භාෂාවේ තියෙන ගතිය ඒක තමයි . කවි ලිවීමේදී භාවිතාවෙන මේ විරිත් ගීත වලට භාවිතා වීම සංගීත නිර්මාණය කරන සංගීතඥයාට වඩාත් උදවු වෙන දෙයක් . මොකද ගීතය මාත්‍රා වලට හරියට කඩන්න පුළුවන් නම් තනුව දාන්න ලේසියි . මට මතකයි මගේ සංගීත ගුරුවරයා , ගුණපාල විතානගේ සර් ගීත වලට තනු දානකොට සමහර වෙලාවට කියනවා මේ වචන හරිම අප්සැට් කියලා . ඒත් සර් ඒ ගීත වලට තනු නිර්මාණය කරන්නේ සංගීතඥයා කෙතරම් දක්ෂද කියලා පෙන්වන්න තියෙන එක සාධයක් තමයි ඒක කියන එක පෙන්නුම් කරමින් .





අපි එහෙනම් ගීතයේ සංගීතය ගැන බලමු . මේ ගීතය මම අහන්න ගත්තෙත් සංගීතය නිසාම තමයි . රාත්‍රී කාලයේ හදවතට දැනෙන සංගීතයක් තමයි මේ ගීතයේ නිර්මාණය වෙලා තියෙන්නේ . ඇත්තටම මේ ලිපියේ වචන ගැන මම ලිව්වේ උදේ කාලයක . එත් සංගීතය ගැන ලියන්න තියෙන තැනට ඇවිත් ලිපිය නතර කරලා තිබුණේ රාත්‍රී කාලයේ සංගීතය ගැන ලියන්න ඕන කියලා . සංගීතය ඇඟට දැනෙන්නේ ඒ වෙලාවට තමයි හොඳට .

මුලින්ම අපි බලමු ගීතයේ තාල වාදනය ගැන අපි සලකලා බලමු . මගේ ගීත විචාර කියවලා තියෙන අය දන්නවනේ මම ඉතින් තාල වලට අලුත් පද හදනවා කියලා . මේ ගීතයේ ප්‍රධාන තාලය වාදනය කරන්නේ එකොස්ටික් ඩ්‍රම් එකකින් . ඒවගේම ඔක්ටර් පෑඩ් එකක් ඒ එක්කම හරි හරියට වාදනය කරනවා . ඒ දෙක වෙන් කරලා අඳුරගන්න ටිකක් අමාරුයි . ඒත් විමසිල්ලෙන් අහන්න .

එතකොට වෙන් කරලා අහන්න පුළුවන් . ඒ වගේම තාල වාදනයේ ප්‍රධාන තැනක් ගන්නවා බොංගෝ ඩ්‍රම් එක . ඒකත් එකපාරටම ඇහෙන්නේ නැහැ . ගීතයේ බීට් එක කඩලා නැවතත් බීට් එකට ගන්න තැන්වල ඒ භාණ්ඩය වෙන් කරලා හඳුනා ගන්න පුළුවන් . හයිහැට් එකෙන් වාදනය කරනවා

ටික් කිටි ටික් ටිස්
ටික් කිටි ටික් ටිස් 
ටික් කිටි ටික් ටිස් 
ටික් කිටි ටික් ටිස් 

කියලා ගීතය පුරාවටම . අපිට නොදැනෙන එත් ගීතයට ලොකු සේවයක් ඒ හයිහැට්ඒ බීට්ව එකෙන්ගේ කෙරෙනවා . නැත්නම් ප්‍රධාන තාල වාදන භාණ්ඩ වල වාදනය කැපිලා පේන්නේ නැහැ .  රිදම් ගිටාර් එකෙන් හොඳ සහයෝගයක් දෙනවා තාල වාදනයට . ඒක නම් හොඳට කැපිලා පේනවා ගීතයේ . 









එහෙනම් අපි හාහාපුරා කියලා ගීතයේ මුල ඉඳලා රස විඳිමු . 

ගීතයේ තේමා වාදනය ආරම්භ වෙන්නේ වයලීන් වාදනයකින් . මම ගීතයේ කැමතිම වාදනය ඒක තමයි . සැකය බිය ශෝකය මිශ්‍ර වෙච්ච මේ ගීතයේ තේරුම ඇඟට දැනෙන්නේ ඒ වයලීන් වාදනයෙන් . අනිත් ඒවායිනුත් දැනෙනවා . ඒත් මේ වයලීන් වාදනයත් ඒ වාදනය ඇතුලේ වාදනය වෙන චෙලෝ වාදනයත් හරිම සහයෝගයෙන් ගීතයේ හැගීම් ඉස්මතු කරලා පෙන්නනවා . 








ගීතයේ තියෙන හදවතට දැනෙන බර ගතිය දැනෙන්නේ මේ වාදන කාණ්ඩ වල තියෙන චෙලෝ සහ බේස් ගිටාර් වාදනයෙන් . ඒවායින් වාදනය වෙන පහල ස්වර නිසා තමයි ගීතය පිරිලා තියෙන්නේ . සමහරවිට ස්වර දෙකතුනක් තමයි එහා මෙහා වෙවී වාදනය වෙන්නේ . ඒත් ඒ ස්වර නිසා වයලීන් සහ සැක්සෆෝනයේ වාදනය වෙන ස්වර ඉස්මතුවෙලා පේනවා . 





ඔන්න සැක්සෆෝනය කිව්වම තමයි ඒකත් වාදනය වෙන්න ගන්නේ . වයලීන් වාදනයට පස්සේ සැක්සෆෝනයෙන් වාදනයක් කෙරෙනවා . ඒකෙ නම් තියෙන්නේ දුක් මුසු ගතියක් . ඊට පස්සේ වයලීන් වලින් ගීතයේ ගායනය වෙන්න පටන් ගන්නා ස්වර වලට අරගෙන ඇවිත් ගායකයාට ආරාධනා කරනවා ගීතය පටන් ගන්න . කලින් වගේම චෙලෝ සහ බේස් වාදන මේ වයලීන් වාදනයේත් ඉස්මතුවෙන්න ඕන තැන් නියමෙටම ඉස්මතු කරලා පෙන්නනවා . 

ඔන්න දැන් ගීතය ගායනා වෙනවා . 

මුදු මුහුණේ කියනකොට සැක්ස ෆොනයෙන් බිට් පාර්ට් එකක් වාදනය කරනවා . සුව දැනුනේ කියනකොටත් සැක්ස ෆෝනය වාදනය වෙනවා . පිරිමියාගේ තියෙන හැගීම්වල රළු බව ඒ සැක්ස ෆෝන වාදනයෙන් ඉස්මතු වෙනවා . පිය ලඳුනේ මට විතරද කියන පේලියේ විත කියන අකුරු දෙකත් එක්කම වයලීන් වලින් රන් එකක් වාදනය කරගෙන සැක්ස ෆෝනයේ ගීතයට කරන සේවාව වයලීන් විසින් භාර ගන්නවා . 

ඊට පස්සේ ගීතයේ වචනත් එක්කම වයලීන් එකෙන් කවුන්ටර් පාට් එකක් වාදනය වෙනවා . කවුන්ටර් කියන්නේ ගීතය ගායනා වෙන අතරේම ගීතයට හානි නොවෙන්න ඒ ශෘති වලට අදාළව වාදනය වෙන ස්වර වාදන වලට . දීපිකා මහත්මිය ගායනා කරන සියුමැලි හැගීම් සහිත ඒ වචන පේලි දෙකේ හැගීම් ඉස්මතු කරන්න වයලීන් වලින් සමත් බවක් දක්වලා තියෙනවා . 

මේ ගීතයේ තියෙන අලංකාර බව වැඩිවෙලා තියෙන තවත් හේතුවක් තමයි එකොස්ටික් ගිටාර් එකකින් කෝඩ්ස් වලට අදාළ ස්වර බීට් එක තියාගෙන වාදනය කිරීම . ගීතය ගායනා වෙන වෙලාවට අහගෙන ඉන්න ටිකක් . ටිකි ටිකි ටිකි ටිකි කියලා ගීතයේ වචන වලට යටින් ගිටාර් වාදනය ඇහෙනවා . වතුර ගලාගෙන යනවා වගේ තමයි ඒ වාදනය වාදනය වෙන්නේ . ගීතයේ මම කැමතිම තවත් අංගයක් තමයි ඒක . 





ඔන්න ඊට පස්සේ අතුරු වාදනය පටන් ගන්නවා . අතුරු වාදනයත් පෙර වාදනයම තමයි . අතුරු වාදන වෙනස් කරලා ගීතය සංකීර්ණ වෙනවට වඩා මේ විදිය හොඳයි කියලා තමයි මම හිතන්නේ . ඔයාලාගේ අදහසුත් දක්වන්න බලන්න ඒ ගැන . 

ඔන්න දැන් ගීතයේ අන්තරා කොටස ආරම්භ වෙනවා . අන්තරා කොටසේ මුල කොටස ඒ කියන්නේ පළවෙනි පේලිය දෙසැරයක් ගායනා කෙරෙනවා දිවුල්ගනේ මහත්මයා විසින් . ඒකෙන් පළවෙනි වතාවේ ගායනා කෙරෙනකොට කවුන්ටර් පාට්ස් වාදනය වෙන්නේ නැහැ . ගීතයේ වචන එහෙමම ගායනා වෙනවා . තාලය වාදනය වෙනවාත් එක්කම සාමාන්‍ය විදියට . 

දෙවෙනි වතාවේ ගායනා කරනකොට වයලීන් තමන්ගේ වැඩ පටන් ගන්නවා . ඒ පද පේලිය පුරාවටම වයලීන් වලින් ගීතයේ විරිතේ අඩු තැන් ඇදෙන තැන් පුරවනවා . ඊට පස්සේ සැක්සෆෝනය විසින් වයලීන් වල කාර්යය භාරගන්නවා . එත් වයලීන් වලින් ඒක එකපාරටම දෙන්නේ නැහැ . වයලීන් වල සහයත් ඇතිව තමයි සැක්ස ෆෝනයෙන් බිට්ස් පාට් දෙකක් වාදනය වෙන්නේ . ඊට පස්සේ ආයෙත් වයලීන් වලින් කවුන්ටර් වාදනය කරලා ගීතයේ අන්තරා කොටස අවසන් වෙනවා . ආයෙත් අතුරු වාදනය විදියට පෙර වාදනයම තමයි වාදනය වෙන්නේ . 





ගීතයේ සංගීත නිර්මාණය අතිනුත් හරිම අලංකාර විදියට නිර්මාණය වෙලා තියෙනවා . මම හිතනවා මේ විස්තරය හරහා ඔයාලට ඒ වාදනයත් එකින් එක රසවිඳින්න පුළුවන් කියලා . භාවනාවක් කරනවා වගේ ඒ වාදනය රස විඳින්න . 

ගීතයේ ගායනා කරන අවස්ථාවල මම කැමතිම අවස්ථා දෙකක් තියෙනවා . 

එකක් තමයි " සුව යහනේ " කියන තැන . අනික තමයි " රැලි බින්දේ " කියන තැන . ඒ තැන්වල ගායකයා තමන්ගේ සියුම් කටහඬ පාවිච්චි කරලා ගීතයේ අලංකාරවත් බව සහ සංවේදී බව වැඩි කරලා තියෙනවා . 

කාලෙකට පස්සේ තමයි ගීතයක් ගැන ලිව්වේ . 

එහෙනම් කියවලා බලලා අඩුපාඩු කියන්නකෝ . 

ආයෙත් ලිපියකින් හමුවෙමු . 

ඔබ සැමට සමන් දෙවිඳුගේ පිහිට ලැබේවා !

ගීතයක් ගැන ලියන්න ඕන කියලා හිත හිත හිටියට ලියන්න තරම් වැදිච්ච සිංදුවක් මේ දවස් වල තිබුණේ නැහැ . මේ දවස්වල වැඩියෙන්ම අහන්නේ වාදන . රවි...

වෙඩින් කේක් / Wedding Cake





අද ගොඩක් දෙනෙක්ට වැදගත් වෙන්න පුළුවන් දෙයක් තමයි ලියන්න යන්නේ . ඒත් මේක ලියනවාම නෙවෙයි . අපිත් ඉගෙන ගත්ත ලිපියක් ඔයාලටත් කියවන්න සලස්වන්න තමයි හදන්නේ . මගේ ලිපි හොරෙන් කොපි කරලා ටීවී එකේ පොරවල් වගේ කේන්දර ගැන ටෝක්ස් දෙන අය , එයාලාගේ දේවාල කියන හොර ගුබ්බෑයම්වල රාජතරංගනී හෙනරාජ තෙල් විකුණනවා වගේ නෙවෙයි මේ. මම අදාළ අයගෙන් අවසර අරගෙන තමයි ලියන්නේ ; නෑ කොපි කරලා දාන්නේ . ඒ අක්කාගේ වචනයෙන්ම මේ කතාව කියනවානම් හොඳ නිසා තමයි එහෙම කරේ .

විවාහ මංගල උත්සවයක කවුරුත් කතාවෙන දෙයක් තමයි වෙඩින්කේක් කියන්නේ . කවුරුත් බලන්නේ වෙඩින් කේක් එකට දෙකක්ම උස්සගෙන යන්න . සිංදුවාගේ වෙඩින් එකේදී ඔය වෙඩින් කේක් මැනේජ් කරලා වෙනමම පළපුරුද්දක් ලබාගත්තා මම වෙඩින් කේක් ගැන . ඒ තරමටම වෙඩින් කේක් එක මිනිස්සුන්ට වටිනවා . ඒවගේම තමයි වෙඩින් කේක් වල මිල ගණනත් . ඒකත් එක්තරා ආකාරයක ගානක් තමයි .

වයලීනි තමයි මේ ලිපිය ලියන්න මට අදහසක් දැම්මේ . වයලීනි හැදුවා වෙඩින් කේක් , ඉගෙන ගන්නත් එක්ක . ඒ රෙසපි එක නියමෙට ආවා . ඒ නිසා තමයි ඒක බ්ලොග් එකෙත් දැම්මනම් හොඳයි කියලා මමයි වයලීනියි කතා වුණේ . වයලීනි ෆලෝ කරපු රෙසපි එක තමයි මේ .

ඔයාලත් කියවලා හදලා බලන්න . තමන්ගේ වෙඩින් එකට , හෝම්කමින් එකට තමන්ම වෙඩින් කේක් හදාගන්න බලන්න . එකට එකක් ලාභයි කියලා තමයි අපිට නම් තේරුම් ගියේ . ඒවගේම තමයි ව්‍යාපාරයක් වශයෙන් කරන්න පුළුවන් නම් ගෙවල් වලට වෙලා ඉන්න ගමන් මේකත් කරන්න පුළුවන් . ටිකක් විතර මහන්සි වෙන්න ඕන ඔය පලතුරු කපන්න , චොප් කරන්න , සහ බීට් කරන දේවල් බීට් කරගන්න . ඒත් ලාභය කොහොමද කියලා තේරුම් යනකොට ඔයාලටම හදන්න හිතේවි . මෙතන ඉඳලා මම ඒ අක්කාගේ වචනයෙන්ම ලිපිය දිගට අරගෙන යනවා .



වෙඩින් කේක් / නත්තල් කේක්

මේ තියෙන්නේ මම වෙඩින් කේක් හදන විදිහ.
වෙඩින් කේක් කෑල්ලක් දෙද්දි හරියටම මැනලා දෙන එක තමයි හොද.එතකොට හැම කෑල්ලම එක බර.
උඩට යොදන අයිසින් තට්ටුව වැඩිකරන්නත් එපා.උපරිම අගල් කාලක් වගේ ඇති.

අවම බර 75g තිබ්බනම් හරි එක කෑල්ලක..

මම රටඉදි කවදාවත් යූස් කරන්නෑ කේක් වලට.ඒවගේම බ්‍රැන්ඩි විතරයි යූස් කරන්නෙ.

කෑලි 75 කට අවශ්‍ය දෑ-

* සුල්තානා  350 g
*කරන්ට්ස් 100g
*රේසින්ස්  250g
*රුලන් ගෑම් 250g
*ඉගුරු දෝසි 125g
*චව් චව් ග්‍රෑම් 125g
*කජු 250g
*පුහුල් දෝසි 350g
*චෙරි ග්‍රෑම් 350g (රතු, කොල සම සමව ) *කැන්ඩිට් ෆීල්  100g
*මාජරින් 300g (බටර් නම් 500)
*සීනී  350g
*බිත්තර 14
*ස්ටෝබෙරි ජෑම් බෝතල් කාලක්
*අන්නාසි ජෑම් බෝතල් කාලක්
*මී පැනි පොඩි බෝතල් බාගයක් (ජෑම් පොඩි බෝතල් සයිස් ප්‍රමානෙ )
*වැනිලා කුප්පියයි
*බ්‍රැන්ඩි අඩු කෝප්පයයි
*කුලු බඩු තේ හැදි2ක්
*ග්‍රේට් කරගත් දෙහි පොතු  තේ හැදි 2ක් *රෝස් එසන්ස් තේ හැදි 2ක්
*ආමන්ඩ් එසන්ස් තේ හැදි 2යි
*ගෝල්ඩන් සිරප් බෝතල් කාලක්

------------------------------------------------------------------------

සාදන ක්‍රමය
 
**මුලින්ම පළතුරු සියල්ල කුඩාවට කපාගන්න.

**කජු අවන් එකේ දමා යන්තමින් රෝස්ට් කර හෝ කබලේ දමා යන්තමින් බැදගන්න.(කජු අවන් කිරීම ඉතා හොදයි.කජු අමුවෙන් තිබුනහොත් කේක් එක පුස් කෑමට ඉඩ ඇත.
කජු කලු පැහැ වීමට නොදිය යුතුය.

**කජුත් කපාගන්න.

**කේක් සෑදීමට ගන්නා සියලුම උපකරන හොදින් සෝදා අව්වේ වියලා ගන්න.වතුර බිදක් හෝ ගියහොත් කේක් එක පුස් කෑමට ඉඩ ඇති නිසා.

**කෑපූ සියලු පලතුරු හා කජු වසා තැබිය හැකි බාස්කට් හෝ බේසමකට දමන්න.

**බ්‍රැන්ඩි,ගෝල්ඩන් සිරප්,කුලුබඩු,මී පැනි,ජෑම්,දෙහි පොතු සියල්ල එයට දමා හොදින් මිශ්‍ර කරගන්න.

**මිශ්‍ර කිරීමට පෙර අත වියලිව තබාගන්න.
.
**හොදින් මිශ්‍ර කරගත් මෙම මිශ්‍රනය කූබි ආදී සතුන්ට ඒමට නොහැකි වන සේ හොදින් වසා දින 3ක් තබන්න.

දින තුනකින් කේක් එක සාදාගන්නා අයුරු.
(සතියක් හෝ මාසයක් හෝ මෙසේ කල්තබාගත හැක..)

**මුලින්ම රුලන්  කබලේ දමා බැදගන්න.
රුලන් වලින් මදක් දුම් දමන තුරු.

**මාජරින් ටික පොඩි බේසමකට දමාගන්න.

**එයට රුලන් දමා මාජරින් දිය වෙන තුරු ලී හැන්දකින් මිශ්‍ර කරගන්න.

**බිත්තර කහමද සුදුමද වෙන් කරගන්න.බිත්තර සුදුමද 7ක් වෙනම තබන්න.

**කහමද සුදුමද වෙන වෙනම බීට් කරගන්න.

**සීනී ග්‍රයින්ඩ් කරගන්න.

**සීනී ටික කහමද වලට දමා බීට් කරගන්න.

**දැන් බීට් කරගත් කහමද සුදුමද රුලන් දැමූ බේසමට දමා ලී හැන්දෙන් හොදින් මිශ්‍ර කරන්න.

**එයට රෝස් එසන්ස්,ආමන්ඩ් එසන්ස්,වැනිලා දමා මිශ්‍ර කරගන්න.

**ඉන්පසු පලතුරු දමා හොදින් මිශ්‍ර කරන්න.

**බේකින් ට්‍රේ එකට පත්තර පිටු  6ක් දමා එයට උඩින් ඔයිල් පේපර් එකක් දමා කේක් මිශ්‍රනය දමාගන්න.එසේ කරන්නේ කේක් එකේ ඇති පලතුරු වල වර්නයන් වෙනස්වීම වැලැක්වීමටයි.
එමෙන්ම පලතුරු කරවීමද කේක් එක කලු වීමද වලක් වා ගත හැක.
කලු පැහැති කේක් වලට වඩා දුබුරු පැහැ කේක් වලට ඉල්ලුමක් ඇත.

**නිවසේ බේක් කරනවාට වඩා බේකරියකට ගොස් බේක් කරගන්න ලොකු ප්‍රමාන නම්.

**බේක්  වූ පසු හොදින් නිවෙන්න හැර අතින් කෑලී කඩා පොඩිකරගන්න.ඔයිල් පේපර් එක ඉවත් කිරීමට මතක තබාගන්න.

**කෑලී කඩාගත් කේක් දවස් කීපයක් තබාගන්න එ විට කේක් එක වඩාත් රසවත් වේ.

**එය කැලි කපාගන්නා දවසට ආමන්ඩ් පේස්ට් එක සාදාගන්න.

**කේක් එක යලිත් පොඩි කර තැටියකට දමා අවශ්ශ උස අනුව තුනී කර ගන්න.

**එයට උඩින් තුනී කරගත් ආමන්ඩ් පේස්ට් එක දමා කෑලී කපාගන්න.

 **නත්තල් කේක් සදහා ආමන්ඩ් පේස්ට් අවශ්ශම නැත.


ආමන්ඩ් පේස්ට් සාදාගන්න ක්‍රමය.


**ආමන්ඩ් පේස්ට් එක සදහා අයිසින් සීනී,බිත්තර සුදුමද,ආමන්ඩ් හා රෝස් එසන්ස් හා කජු පව්ඩර් අවශ්ශය.

**කජු හොදින් පව්ඩර් වනතුරු  ග්‍රයින්ඩ් කරගන්න.

**බිත්තර සුදුමද චුට්ට චුට්ට දමමින්  අයිසින් හ අනෙකුත් ද්‍රව්යද දමා ඝන මිශ්‍රනයක් සාදාගන්න.

**එය ඉටි කොලයක් මත තුනී කරගන්න.එය තූනී කරගත් කේක් එක මත දමා කෑලි කපාගන්න.බ්‍රැන්ඩි ස්වල්පයක්ද මිශ්‍ර කරගන්න.

******* වැදගත්

*මාජරින් වෙනුවට බටර් දැමීම ඉතාමත් හොදයි.කේක් එකෙහි ඔයිලි ගතිය නැතිවෙයි.

*කේක් එක කෑලි කපන්නට පෙර මිශ්‍ර කිරීමේදී
ස්ට්‍රෝබෙරි ජෑම් හා බ්‍රැන්ඩි එක්කල හැක.එයින් රස වැඩිවෙයි.

*ආමන්ඩ් පේස්ට් එක කේක් එක උඩින් ඇතිරීමට පෙර උඩින් ස්ට්‍රෝබෙරි ජෑම් ගා ගත හැක.එවිට ආමන්ඩ් පේස්ට් එක හොදින් සවිවී  සිටී.

*ඉතාමත් වැදගත් වන්නේ කේක් එක සතුන්ගෙන් පරිස්සම් කිරීමයි..


ඔන්න ඔහොම තමයි වෙඩින් කේක් හදන්නේ . ඔයාලත් හදලා බලන්න . පොඩ්ඩ පොඩ්ඩ දාලා හදලා බලන්න කොහොමද කියලා . පුරුදු වෙලා පස්සේ ලොකුවට හදන්න .

එහෙනම් තවත් ලිපියකින් හමුවෙමු .

අප්සරා රණසිංහ අක්කා තමයි මේ ලිපිය බ්ලොග් එකේ දාන්න දුන්නේ . අක්කට ගොඩක් ස්තූතියි .

ඔබ සැමට සමන් දෙවිඳුගේ පිහිට ලැබේවා !



අද ගොඩක් දෙනෙක්ට වැදගත් වෙන්න පුළුවන් දෙයක් තමයි ලියන්න යන්නේ . ඒත් මේක ලියනවාම නෙවෙයි . අපිත් ඉගෙන ගත්ත ලිපියක් ඔයාලටත් කියවන්න සලස්ව...

ප්‍රභාශ්වර - වෙසමුණි භවන ( 3 ) අවසාන කොටස



සූරිය කුල තෙද උතුමා
පෑවිය සක්වලට හැමා
කාරිය සිතුවාට තමා
සූරිය දෙවි නමෝ නමා

චන්ද්‍ර සහෝදර උතුමා
චන්ද්‍ර කටක පැවති තමා
සව්සිරි දී රකු මෙ තුමා
චන්ද්‍ර සුරිඳු නමෝ නමා

පසුගිය කොටස

" දරුවනේ.............................. "

ඒ කෛකසී මෑණියන්ය .

" ඇයි මෑණියෙනි ? . අපි ඖෂධ කුටියේ "

" දිවා ආහාරය සූදානම් කරලා තියෙන්නේ දරුවනේ "

" මම එනවා මෑණියෙනි "

මම එනවා කියමින් දිව ගියේ කුම්භකරණ ය . ඔහු කවදත් කෑමට දක්ෂයෙකි . ඒ වගේම මහා කය බලයකින් හෙබි පුද්ගලයෙකි . ඔහු අප සියල්ලන්ටම වඩා හැඩි දැඩි පුද්ගලයෙකු වන බව කුඩාකල සිටම අපි දන සිටියෙමු .

අද එතැන්සිට 





" ප්‍රභාශ්වර , අපි ගිහින් දිවා ආහාරය රැගෙන විවේක අරගෙන ආයෙත් එමු . පුලතිසි මුත්තණුවන් වෙසමුණි භවනට සැපත් වුණාට පස්සේ අපිට නිවාඩු පාඩුවක් වෙන එකක් නැහැ . මේ දින හත පුරාවට ඉගෙන ගත්ත දේවල් , මුත්තණුවන් උගන්වපු දේවල් අපිට එතුමා ඉදිරියේ ශිල්ප දක්වන්න වෙනවා නොඅනුමානයි " 

" ඒක ඇත්ත අයියණ්ඩි . එහෙනම් ඔය ඔසු බඳුන ප්‍රවේසම් සහිත තැනක තැම්පත් කරලා අපි යමු " 

මමත් රාවණයනුත් ඔසු නිපදවන කුටියෙන් නික්ම ගියේ අප දෙදෙනා ඉතාමත් සුපරික්ෂාකාරීව නිපදවන ලද සර්ප විෂ නිර්විෂ භාවයට පත් කරනු ලබන ඒ මහානර්ඝ ඔසුව ප්‍රවේසම් සහිතව දැවයෙන් තනන ලද කුඩා පෙට්ටියක තැම්පත් කිරීමෙන් අනතුරුවය . සුදු හඳුන් ලීයෙන් නිමවන ලද කුඩා පෙට්ටි සමූහයක් ඔසු කුටියේ පසෙක තබා තිබෙන්නේ එවැනි දුර්ලභ ඖෂධ වර්ග ආරක්ෂා කිරීම සඳහා තැම්පත් කිරීමටය . ඒවා රැගෙන ආවේ ලංකා පුරයෙන්ය . අපට එවැනි යමක් අවශ්‍ය බව දැනුම් දුන් පසු පුලතිසි මහා සෘෂිතුමා ලංකාපුරයේ තම අතවැසියන් වෙත පණිවුඩ යවා එම පෙට්ටි සමූහය වෙසමුණි භවනට ලබා දුන්නේය . එය අපිට වටිනා වස්තුවක් වූයේ කල් පවතින ඔසු වර්ග තැම්පත් කිරීමට හැකියාව ලැබීම නිසාය . 

" කුම්භකරණ . ඔය රාවණ අයියණ්ඩිගේ දිවා ආහාර පංගුව . ඔබ එයත් අවසන් කරාද මේ ටික වෙලාවට ? " 

රාවණ අයියණ්ඩිත් මමත් ආහාර ගන්නා කුටියට පිවෙසෙන විට කුම්භකරණ ඔහුගේ ආහාර කොටසත් ගෙන රාවණ අයියණ්ඩිගේ ආහාර කොටසත් භුක්ති විඳ තිබ්බේය . ඔහුගේ කුසේ පවතින මහා ලැවූ ගින්න නිවීමට මුහුදු හතක ජලය වත් කරත් , හිමාලයේම පවතින පළතුරු අල වර්ග ගෙනවිත් දුන්නත් මදි වේ යයි විශ්‍රවස් මාමණ්ඩි විසින් කීප වතාවකම ආහාර ගන්නා කුටියේදී සියල්ලෝම ඉදිරියේ පවසා තිබේ . එහෙත් කුම්භකරණ වෙනස් වන්නෙක් නොවේ . 





කුඩා කල සිටම මහා ශක්තිවන්තයෙකු මෙන්ම මහා විශාල දේහයකට උරුමකම් කියන සලකුණු පෙන්වන ලද කුම්භකරණ හට ඇති තරම් කන්න බොන්න දෙන්න කියලා පුලතිසි මහා සෘෂි තුමා විශ්‍රවස් මාමණ්ඩි හට නියම කර තිබෙන්නේ අනාගතයේ ඔහුගේ මහා කය බලය ලංකාපුරයේ සිට තුන් ලෝකයටම අණසක පතුරුවන රාවණයන් හට උදවු උපකාර ලබාදීමට අවශ්‍ය කරගත හැකි හෙයින් විය යුතුය . 

" අයියණ්ඩි , මෑණියන් මට ටිකයි දුන්නේ . මම ඒ නිසා අයියණ්ඩිගේ කොටසත් ගත්තා . අයියණ්ඩි ඉතින් මගේ අයියණ්ඩිනේ " 

කුම්භකරණ එසේ කියමින් සිටියේ තමන් සුපුරුදු ලෙස මහා වරදක් කල වරදකරුවෙකු ලෙසින්ය . 

" මම දන්නවා කුම්භකරණ ඔබට ආහාර දකින විට උමතුවක් ඇතිවෙනවා කියා . අවශ්‍ය නම් ප්‍රභාෂ්වරගේ කොටසත් කාලා විභීෂණ එන්න කලින් එයාගේ කොටසත් ගන්න "

" ප්‍රභාශ්වරගේ කොටස වගේ නෙවෙයි , විභීෂනගේ කොටස ආහාරයට ගත්තොත් මට අද දවසේම ඔහුගේ ඒකාකාරී නීති සම්පාදනය පිළිබඳව උගන්වාවී . එය අසාගෙන ඉන්නවාට වඩා හිමාලයේ ඇවිදලා කෑමට තවත් යමක් සොයාගන්නා එක හොඳයි " 





දරුවන් සියල්ලද විශ්‍රවස් මාමණ්ඩිගේ බිරින්දෑ වරුන් හතරදෙනා වන කෛකසී , මාලිනී , රාකා , සහ ඉල්විලා යන සියල්ලෝම පැමිණියහ . අනතුරුව විශ්‍රවස් මුණිතුමා කුටියට පැමිණියේය . ඉල්විලා යනු අපගේ ලොකු මෑණියන්ට . ලංකාපුරය දැනට පාලනය කරනු ලබන වෛශ්‍රවණ කුමරු ඉල්විලා ලොකුමෑණියන්ගේ එකම පුත්‍රයාය . මාලිනී යනු සුමාලි රජුගේ සහෝදර මාලි කුමරුගේ දියණියයි . මාලිනියගේ දරුවා විභීෂණය . රාකා යනු විශ්‍රවස් මාමණ්ඩියගේ අනෙන් බිරිඳය . 

ඇයට භරණ සහ දුෂ්‍යන නමින් නිවුන් පුතණුවන් දෙදෙනෙකු විය . මේ සියල්ලෝම එක්ව ආහාර ගන්නේ කවදත් එකම වේලාවකදීය . එහෙත් කුම්භකරණ මේ සියල්ලෝටම පෙර ආහාර ගෙන සියල්ලෝම සමග නැවතත් ආහාර ගනියි . සිරිත් විරිත් කඩ කිරීම පිළිබඳව යම් යම් මැසිවිලි නැගුනද ඔහුගේ ස්වභාවික තත්වය තේරුම් ගත් විශ්‍රවස් මුණිතුමා ඔහුට දැන් සිරිත් විරිත් පිලිබඳ උගන්වන්නේ නැත . ඒ ඔහු සිරිත් විරිත් කඩ කරන්නේ ඔහුගේ ගින්න සඳහා පමණක් වීම නිසා විය යුතුය . 

" එහෙනම් දරුවනේ හැමෝම අපේ නිර්මාතෘ දෙවියන් වන්දනා කරමු ආහාර ගන්න පළමුවෙන් "

සියල්ලෝම සූර්ය දිව්‍ය රාජයාට වන්දනා කළහ . 

අනතුරුව ආහාර ගැනීමට මත්තෙන් විශ්‍රවස් මාමණ්ඩි විසින් ඉතාමත් වැදගත් එමෙන්ම සතුටු දායක පුවතක් සියල්ලෝම හමුවේ ඉදිරිපත් කලේය . 

" මගේ දරුවන් සියල්ලෝමත් බිරින්දෑ වරුන් සියල්ලෝමත් මේ කාරණාව අහලා සතුටු වෙනවා කියලා මට විශ්වාසයි . කෛකසී නැවතත් ගැබ්ගෙන ඇති බව හැමෝම දැන් දැනගන්න ඕන " 

එය කියත්ම කෛකසී මෑණියන් මද සිනහවකින් මුව සරසා ගත්තාය . 

" ඒවගේම තවත් දෙයක් මතක තියාගන්න ඕන . නක්ෂස්ත්‍ර වේදය අනුව ඇයගේ කුසට පැමිණෙන්නේ දැරිවියක් . පිරිමි දරුවන් හය දෙනා අතරේ එකම සහෝදරිය ඇය වේවි . ඒ නිසා කෛකසී අද ඉඳලා තමන්ගේ දැරිවිය වෙනුවෙන් කටයුතු කරන්න වගේම පුද පූජා පවත්වන දේවල් වල නිරත වෙන්න ඕන . ඒවාට අනිත් හැමෝම උදවු වෙන්න ඕන . හෙට ඉඳලා මගේ මෑණියන් වෙසමුණි භවනේ නවාතැන් ගන්න පැමිණේවි . අය කෛකසී වෙනුවෙන් කලයුතු සියල්ලම ඉටු කරාවි . හැමදෙනාම ඒ දේවල් වලට අවශ්‍ය වෙලාවේ උදවු උපකාර කරන්න ඕන " 

" පියතුමණි අපි එහෙනම් සතුට සමරන්න එක්කම දැන් දිවා ආහාර වේල භුක්ති විඳිමු නේද ? " 

ඒ වෙන කවුරුවත් නොව කුම්භකර්ණය . 

" මේ ඔබගේ කීවෙනි දිවා ආහාර වෙළද කුම්භකරණ ? " 

" මම හිතන්නේ සිව්වෙනි ආහාර වේල පිය තුමණි " 

අපගේ අලුත් සාමාජිකාවගේ පැමිණීමේ ප්‍රීතිය සමගම කුම්භකරණගේ කතාවෙන් ඇතිවූ ප්‍රීතියෙන් වෙසමුණි භාවන ප්‍රමෝදයෙන් ඇලලී ගියේය .

දිවා ආහාරය ගැනීමෙන් පසුව මද වෙලාවක් විවේක ගත් මමත් රාවණයනුත් නැවතත් ඔසු නිපදවන කුටිය වෙත පැමිණියෙමු . කුම්භකරණ තවමත් නින්දේය . විභීෂණ තම නීති ශාස්ත්‍ර සම්බන්ධ තල්කොළ පොතක් ගෙන එය කියවීමට ඔහුගේ සුපුරුදු ගල් ගුහාව වෙත පිටත් විය . භරණ සහ දුෂ්‍යන සටන් පුහුණු වීමට ආයුධ හරඹ පුහුණුවන පිටියට නික්ම ගියහ . 





" සහෝදරියකගේ බලාපොරොත්තුවත් ඉටු වුණා නේද ? " 

මම රාවණයන්ගෙන් ඇසීමි " 

" එය ඉටුවන බව මම දැනසිටියා . මුත්තණුවන් දවසක් මමත් එක්ක ඒ පිලිබඳ යම් අනාවැකියක් කියලා තිබුණා . ඔහු කිව්වා විශ්‍රවස්ගේ පරපුරේ අවසානයා වෙන්නේ ගැහැණු දරුවෙක් කියලා . නක්ෂස්ත්‍ර වේදය අනුව එය සනාථ වෙනවා කියලාත් මට කරුණු කාරනා පෙන්නුම් කරලා දුන්නා . එය සැබෑ වූවා කියා මම හිතනවා " 

" දැන් ඔසු නිපදවීම ගැන සෘෂිතුමා අහන ප්‍රශ්න වලට උත්තර දෙන්න ඔබ සූදානම්ද අයියණ්ඩි ? " 

" ඒ වෙලාවට මට අවශ්‍ය දේ මතක් වෙනවා කියලා ඉතින් දන්නවානේ " 

" වෙලාව හරි වගේ . අන්න සෘෂිතුමාත් මිත්තනියනුත් එනවා " 

" යමු අපි එතුමන්ව පිළිගනිමු " 

මමත් රාවණයනුත් සෘෂිතුමාගේ ඉදිරියට ගොස් ආශිර්වාද කළෙමු .

" දීර්ඝායු වේවා සෘෂි තුමණි " 

" දීර්ඝායු වේවා දරුවනේ "

" මම එහෙනම් කෛකසී ඉන්න පැත්තට යන්නම් " 

මිත්තණිය තම මිණිබිරිය ආරක්ෂා කිරීමේ වගකීම් භාර ගැනීමට නොඉවසිල්ලෙන් සිටියාය . 

" අපි යමු දරුවනේ එහෙනම් ඔසු නිපදවන කුටියට . කෝ විශ්‍රවස් ඉන්නවද ? "

" පියාණන් හිමාලයේ ඉහළ කොටසට පිටත්ව ගියා කඟවේනකු මියගිහින් තියෙනවා කියලා පරීක්ෂා කරලා එන්න " 

" කඟවේනකු ගැන හොයනවානම් එහෙනම් බෙහෙත් ඖෂධ නිපදවන කාර්යයක් වෙනුවෙන් වෙන්න ඕන . මම කියලා දුන්නා බෙහෙත් ඖෂධ වට්ටෝරුවක් . ඒකට කඟවේනකුගේ අවශ්‍යතාවයකුත් තියෙනවා "

" කාරණාව මොකක්ද කියලා කිව්වේ නැහැ මුත්තණුවනි " 

" රාවණ . නාග විෂ හරණයට ඔබ යමක් හොයාගත්තද ? " 




" විෂ හරණය කිරීමේ ශාස්ත්‍රාණුකූලව ඔප්පු කරන්න පුළුවන් යමක් මමත් ප්‍රභාශ්වරත් එකතුවෙලා නිර්මාණය කළා . මුත්තණුවන් පරීක්ෂා කරලා බලලා අපිට ඒ ගැන අඩුපාඩු කියලා දෙනවානම් හොඳයි "

" යමුකෝ එහෙනම් දෙන්නා කරපු දේවල් මොනවද කියලා බලන්න . ප්‍රභාශ්වර ! "

" සෘෂිතුමණි ! " 

" අද සූර්ය දිව්‍ය රාජයා මොන නැකතේද ඉන්නේ ප්‍රභාශ්වර ? " 

" අද සූර්ය දිව්‍ය රාජයා අද නැකතේ ගමන් කරනවා සෘෂි තුමණි " 

" මම පාඩම් කරන්න දුන්න ශ්ලෝක පාඩම් කරගත්තද ?" 

" ඔව් සෘෂිතුමණි " 

" ප්‍රභාශ්වරත් මට මුත්තණුවන් කිව්වට වරදක් නැහැ . මම හැමදාම කිව්වත් ඒ දේ අහන්නේ නැහැ . නෑකමින් මම ප්‍රභාශ්වරටත් මුත්තණුවන් වෙනවා " 

" හොඳමයි සෘෂිතුමණි " 

පුලතිසි සෘෂිතුමා ඔසු කුටියට පැමිණ තමන් වෙත කවදත් වෙන්වන ආසනයේ අසුන් ගත්තේය . 

" කෝ ගන්න බලන්න පිළියෙළ කරපු ඔසු වර්ගය " 

මම සුදු හඳුන් පෙට්ටිය විවෘත කර එහි තබා තිබුණු ඖෂධ බඳුන ඉවතට ගත්තෙමි . පසුව එය රාවණයන් වෙත දුන් පසු රාවණයන් එය රැගෙන ගොස් පුලතිසි සෘෂිතුමාට පිළිගැන්වීය . 

" කොහොමද දැන් දෙන්නත් එක්ක මේ ඖෂධ වට්ටෝරුවෙන් විස නැතිවෙනවා කියලා පෙන්නුම් කරන්නේ ? " 

" විෂගලේ විෂ නැති කරන පිරික්සුම ම මේ වෙනුවෙනුත් කළා මුත්තණුවනි " 

" එහෙනම් ඒ පිරික්සුම නැවතත් කරලා පෙන්වන්න බලන්න . මේ බෙහෙත් වට්ටෝරුව තල් කොලයක ලියලා තියෙනවද ? . මට ඒකත් ගෙනත් දෙන්න බලන්න මොනවද වෙනස් කරලා තියෙන්නේ කියලා බලන්න " 




මම ඖෂධය ප්‍රත්‍යක්ෂ බව පෙන්වීමට පිරික්සුම කරන අතරවාරයේ රාවණයන් තමන් විසින් සටහන් කරන ලද කළු නොමැදී තල් කොලය පුලතිසි සෘෂි තුමාට පිළිගැන්වීය . 

" ආ . මේ අලුත් පැළැටියක් එකතු කරලා තියෙනවා නේද ? . ඒක මොකටද එකතු කරේ ? " 

" මුත්තණුවනි . මේ වට්ටෝරුවේ යම් අඩුවක් තියෙනවා . ඒ වෙනුවෙන් මමත් ප්‍රභාශ්වරත් එක එක බෙහෙත් වර්ග එකතුකරලා පිරික්සුම් කරලා බැලුවා . එත් මේ පැළෑටියෙන් තමයි විෂ හරණය කරන්න පුළුවන් කමක් ලැබුණේ " 

" බොහොම හොඳයි . බොහොම හොඳයි . මහන්සි වෙලා පිරික්සුම් කරලා තියෙනවා කියලා පේනවා " 

මේ අතරේ මම බෙහෙත් ගුලියක් එලකිරිවල දිය කර එයට නයි විෂ සමග කලවම් කරන ලද ඔසු බින්දු කීපයක් එක් කලෙමි . එය වහා රතු පහ ගැන්විණි . එය දුටු සෘෂි තුමාගේ මුහුණ එලිය වැටිණි . 

" ආ ඔය අපූරුවට ඔසු වර්ගය නිපදවලා තියෙන්නේ . බොහොම හොඳයි බොහොම හොඳයි . එහෙනම් බෙහෙත් වට්ටෝරුව ආරක්ෂා සහිතව නැවතත් ලියලා තියන්න . පහළ ගමේ ඉන්න කෙනෙක් සර්ප දෂ්ටනයක් වෙලා ඉන්නවා කියලා දැනගත්තොත් මේ බෙහෙත දීලා බලන්න සුවපත් වෙනවද කියලා . එහෙම වෙනවානම් මේ වට්ටෝරුව සාර්ථකයි කියලා නැවතත් අපිට පිළිගන්න පුළුවන් " 

" හොඳමයි සෘෂි තුමණි " 

" මම එහෙනම් දැන් යනවා විභීෂණගේ කුටියට . ඔහුගේ කටයුතු කොහොමද කියලා පරීක්ෂා කරලා බලන්න . දෙඑර්ඝායු වේවා දරුවනේ " 

" මුත්තණුවනි . විභීෂණ පිටව ගියා ඔහුගේ ගැන ගුහාවට තල් පතක් අරගෙන " 

" මම එන ගමන් එයාටත් එන්න කියාගෙන ආවේ . විභීෂණ කටපාඩමට දක්ෂයි . මේ ටික වෙලාවට පොතම කටපාඩම් කරගෙන ඇති . මම යනවා එහෙනම් . ආයෙත් කරන්න ඕන දේවල් ගැන මම යන්න කලින් දැනුවත් කරන්නම් " 

" දීර්ඝායු වේවා ඔබට " 

" ඔය විභීෂණගේ කටපාඩම කවදා හරි මගේ වැඩ වලට හරස් වෙනවා ප්‍රභාශ්වර . මට ඒක ඉවෙන් වගේ පේනවා . කමක් නැහැ . ඔහුගේ ඉගැන්වීම අනාගතය සාරවත් කරගන්න අපි යොදාගමු " 

වෙසමුණි භවන මේ ආකාරයෙන් දවස ගෙවා නිමකළේය . කවදා හෝ ලංකාපුරය හිමිකරගන්නා රාවණ නමැති මහා නරේන්ද්‍රයා හිමාලයේ තම පිය තුමාගේ සෙවනේ සිට මෙසේ අධ්‍යාපන කටයුතු ටිකෙන් ටික හදාරමින් සිටියේය . මම ඔහුගේ සෙවනැල්ල සේ කටයුතු කරමි . 


වෙසමුණි භවන මෙතෙකින් සමාප්තයි . 

තවත් කතාවකින් හමුවෙමු . 

ඔබ සැමට සමන් දෙවිඳුගේ පිහිට ලැබේවා ! 


පලි : ඔන්න ඒක කතාවක් ලාවට ලියලා අවසන් කළා . මේ කතාව ලිව්වේ ඇත්තටම කතාවක් ලියන අරමුණකින් නෙවෙයි . මේ කතා මාලාව කොහොමද යන්නේ කියලා පොඩි අදහසක් දෙන්න . මේ කතා මාලාව දැම්මට පස්සේ කීප දෙනෙක් රාවණා ගැන ලියනවානම් මෙහෙම මෙහෙම දේවල් අඩංගු වෙන්න ඕන කියලා අදහස් එකතු කරා . ඒවායින් සමහර දේවල් මම පිළිගත්තා . සමහර දේවල් පිළිගත්තේ නැහැ . මොකද රාවණා සම්බන්ධව අපේ හිතේ චිත්‍රයක් තිබුණට පැහැදිලි සාක්ෂියක් නැති නිසා . 

කතාව ආයෙත් කියවලා භාෂාවේ ඉඳලා සෑම දෙයකම වෙනස් වෙන්න ඕන මොනවද ? . වැරදි මොනවද ? ඉදිරි කතා කොහොම වෙන්න ඕනද කියලා තමන්ට හිතෙන දේවල් කමෙන්ට් කරන්න . ඒ කමෙන්ට් වලින් කතාව තවත් දියුණු වේවි . එත් රාවණා කියන්නේ මෙහෙම කෙනෙක් කියලා නම් නොකිව්වට කමක් නැහැ . මොකද රාවණාගේ පවුලේ කවුරුවත් දැන් අපි අතරේ නැහැනේ . ඒක නිෂ්ඵල කතාවක් වෙයි . 

එහෙනම් ප්‍රභාශ්වර කුමරුණි 

ඔබට බල වඩා ජය වඩා ආවඩා ආයුබෝ වේවා ! 

සූරිය කුල තෙද උතුමා පෑවිය සක්වලට හැමා කාරිය සිතුවාට තමා සූරිය දෙවි නමෝ නමා චන්ද්‍ර සහෝදර උතුමා චන්ද්‍ර කටක පැවති තමා සව්සිරි දී ර...

ප්‍රභාශ්වර - වෙසමුණි භවන (2)




සූරිය කුල තෙද උතුමා
පෑවිය සක්වලට හැමා
කාරිය සිතුවාට තමා
සූරිය දෙවි නමෝ නමා

චන්ද්‍ර සහෝදර උතුමා
චන්ද්‍ර කටක පැවති තමා
සව්සිරි දී රකු මෙ තුමා
චන්ද්‍ර සුරිඳු නමෝ නමා

පසුගිය කොටස

" උත්සාහ කරලා බලමු . පියාණන් භාවනාවට ගිහින් ආයෙත් ආවද ? "

" නැහැ අයියණ්ඩි "

" මම යනවා ඔසු පිළියෙළ කරන්න වැඩ කටයුතු පටන් ගන්න , ඔය වැඩේ ඉක්මණින් ඉවර කරලා ඔබත් එන්න "


අද එතැන් සිට 


මෙම දිනවලදී රාවණ සහ මම විසින් උත්සාහ කරමින් සිටින්නේ ශරීරයේ පවතින නොයෙක් ආකාරයේ විස ඉවත් කිරීමට අවශ්‍ය ඖෂධ නිපදවීම පිලිබඳ යම් පිරික්සුමකටය .  ශ්‍රීනාරායන තෛලය නිපදවීම පිළිබඳව රාවණයන් සහ මම විසින් කරන ලද පිරික්සුම් සාර්ථක වීමත් සමගම පුලස්ති සෘෂි තුමා අපට භාර කරන ලද්දේ මෙම විස ඉවත් කිරීමට හැකි ඔසු නිපදවීමේ කාර්යයි . 

රාවණ වෙනමම ඔහුගේ පුස්කොල පොත් එකතුවක් පවත්වාගෙන යන අතර මගේ පුස්කොල එකතුව මම වෙනමම පවත්වාගෙන යමි . ඕනෑම වේලාවකදී දෙදෙනාගේ පොත් උඩ යටිකුරු කර පෙරළා දමා අවශ්‍ය දේ කියවා සොයාගැනීමට දෙදෙනා විසින්ම දෙදෙනාට අවසර දී තිබුණද හිත යටින් තමන්ගේ පොත් අවුල් වනවා දැකීමට දෙදෙනාම අප්‍රිය කළහ . 

එහෙත් ඔවුනොවුන් කිසිවක් කියමින් දෝෂාරෝපණය කරගත්තේ නැත . එහෙත් ඒවාට සරිලන ආකාරයෙන් භරණ දුෂ්‍යන විභීෂණ යන තිදෙනාගෙන් එක් අයෙකු හෝ පොත් වලට අත තබනවානම් ඒවාට ඔවුන් හට දඬුවම් ලබාදෙන ලද්දේ රාවණ විසින්ය . අනවශ්‍ය දේවල් අල්ලන්න එපා . රාවණයන්ගේ මුවෙහි සෑම වෙලාවකම පාහේ තිබුණු වදන් පෙළකි . 

තල්ගොබය තම්බා පදම් කර අවශ්‍ය ප්‍රමාණයට කපා සකස් කිරීමට මා හට සිතුවාට වඩා කාලයක් ගතවිය . එබැවින් අවසාන කොටස ඉක්මණින් කර අවසන් කර මම රාවණයන් සිටින ඔසු පිළියෙළ කරන ස්ථානය වෙත ගියෙමි . රාවණයන් ඒවනවිටත් ඔසු පිළියෙළ කිරීම ආරම්භ කර තිබිණි . 




" ප්‍රභාශ්වර , ශ්‍රීනාරායන වගේ නෙවෙයි . මේ වැඩේ පහසු නැහැ . හදන එක ඔසුවක් වත් නාග විස නිර්විස භාවයට පත්කරන්නේ නැහැ " 

" මේ අලුත් පැලෑටිය සමහරවිට උදව් වේවි කියලා හිතන්න පුළුවන් . ඒත් අපි පුලතිසි සෘෂි තුමාගෙන් උපදෙස් අරගනිමු අයියණ්ඩි ? " 

" ඕන නැහැ . අපිම මේක හදලා බලමු . පහළ ගමේ සර්පයින් දෂ්ට කරපු අය ඉන්නවනම් ඒ කෙනෙක්ටත් මේ ඖෂධ දීලා පරීක්ෂා කරලා බලන්න පුළුවන් . ඇඟට අහිතකර වෙන්නේ නැති බෙහෙත් වර්ග නිසා වරදක් වෙන්නේ නැහැ කියලා මට විශ්වාසයි " 

" ඔය බෙහෙත් පැළෑටි වලින් කීපයක් තියන්න පැල කරලා මේ පැත්තේ බෝ කරගන්න " 

" ප්‍රභාශ්වර එහෙනම් ඒ පැළ කීපයත් වෙන් කරලා පත්‍ර කීපයක් තලලා යුෂ වෙන් කරලා ගන්න රිදී බඳුනකට " 

" නැහැ මම හිතන්නේ රිදී බඳුනට වඩා රත්‍රන් බඳුනක් තමයි මේ දේට ගැළපෙන්නේ . රිදියෙන් විෂ නසනවාට වඩා වැඩි බලයක් රත්‍රන් වලට තියෙනවා . ඒ බලයෙන් විෂ ගතිය අඩු කරවන බලය වැඩි කරගන්න පුළුවන් වේවි " 

" හොඳයි එහෙනම් අපි රන් රිදී බඳුන් දෙකකට මේ යුෂ කොටස් දෙකක් එක් කරලා වෙන වෙනම පරීක්ෂා කරලා බලමු "


මම රාවණයන් විසින් හිමාලයෙන් රැගෙන ආ බෙහෙත් පැළෑටි වලින් කීපයක් වෙන් කරගෙන ඒවා නැවත පැළ කිරීමට තබා අනෙක් පැළෑටි වලින් පත්‍ර කීපයක් ගෙන එහි යුෂය ගෙන රත්‍රන් සහ රිදී බඳුන් දෙකකට වෙන් වෙන් ලෙස දැමීමි . 

මේ අතරතුර රාවණය විසින් තම බෙහෙත් වට්ටෝරුවේ සඳහන් බෙහෙත් වර්ග ගෙන අවශ්‍ය ප්‍රමාණ වලින් එකිනෙක මිශ්‍ර කරමින් සිටියේය . 

" අයියණ්ඩි මෙන්න රන් බඳුන , මෙන්න රිදී බඳුන . අපි එහෙනම් පරීක්ෂා කරලා බලමු මොකද වෙන්නේ කියලා නේද ? " 

" ප්‍රභාශ්වර ඔබ මට අභියෝග කරනවාද ? " 

" තුන්ලෝකයම සෙලවීමට තරම් මහානුභාව සම්පන්න ග්‍රහචාරයකින් මෙලොව උපන් ඔබට අභියෝග කරන්න තරම් මට පිස්සු කියලා අයියණ්ඩි හිතනවද ? " 

" තුන් ලෝකයම ? , මහානුභාව සම්පන්න ? " 

මද වෙලාවක් ඔවුනොවුන්ගේ මුහුණු දෙස බලා සිටි රාවණ අයියණ්ඩිත් මමත් සිනහ වෙන්නට ගත්තේ වෙසමුණි භවනේ නිහැඬියාව බිඳීමින්ය . රාවණයන්ගේ කටහඬ තරමක් ගැඹුරු ඒවගේම දුරකට ඇහෙන තරම් හඬක් විය . එබැවින් ඈතින් එන විශ්‍රවස් මුණිවරයාටද සිය පුතණුවන්ගේ සහ ප්‍රභාශ්වරගේ හඬ ඇසි තිබිණි . 

" රාවණ ? " 

" දීර්ඝායු වේවා පියතුමණි ! "
" දීර්ඝායු වේවා මාමණ්ඩි ! " 

මමත් රාවණයනුත් එකවරම වෙසමුණි භවනේ වර්තමාන හිමිකරුට ආශිර්වාද දැක්වීමු . 

" ආශිර්වාද වේවා ! " 

එතුමන්ද අපිට ආශිර්වාද කලේය . 

" රාවණ , මොකද මේ කවදාවත් නැතුව දෙන්නත් එක්ක මහා සද්දෙට හිනාව . ඔබගේ මුත්තණුවන් විසින් දුන් අභියෝගයට පිළිතුරක් හොයාගෙනද මේ දෙන්නත් එක්ක හිනා වෙන්නේ ? " 

" නැහැ පියතුමණි මේ ප්‍රභාශ්වර මට විහිලු කරනවා . ඒකට අපි දෙන්නටම හිනා පහළ වුණා " 

" විස නසන බෙහෙත හදලා ඉවරද දෙන්නා . ඔන්න ඉර අවරට යන වෙලාව ළං වෙලා මුත්තණුවන් භවනට සැපත් වෙනවා කියලා දන්වන්න කියලා කිව්වා ගෝලයෝ දෙන්නට ලැස්ති වෙලා ඉන්න කියලා මතක් කරන්න කිව්වා " 





" ප්‍රභාශ්වරත් මමත් ඖෂධ දෙකක් පිළියෙළ කරා පියතුමණි . අපි මේ ඒ ඖෂධ දෙකම පාවිච්චි කරලා බලන්න හදන්නේ මොකද වෙන්නේ කියලා බලන්න . මම හිතන්නේ ප්‍රභාශ්වර හදපු ඔසුව මගේ ඔසුවට වඩා බලවත් වෙන්න පුළුවන් " 

" පුලතිසි මුත්තණුවන් ආවාම අපි පරීක්ෂා කරලා බලමු මොකද වෙන්නේ කියලා " 

" හොඳමයි පියතුමණි "

විශ්‍රවස් මුණිතුමා ඖෂධ නිපදවන ස්ථානයෙන් ඉවත්ව ගිය පසු රාවණයන් සැලසුමක් ඉදිරිපත් කලේ පුලතිසි සෘෂි තුමා ඒමට පෙර ඖෂධය කෙසේදැයි පරීක්ෂා කර බැලීමටය .

" ප්‍රභාශ්වර , මුත්තණුවන් එන්න කලින් අපි මේක පරීක්ෂා කරලා බලමු "

" ඒ කොහොමද ? "

" ඔයාට මතකද අපි විස අදින්න දෂ්ට මුඛයට තියන්න විස ගලක් හැදුවා ? "

" ඔව් , ඉතින් ? "

" ඉතින් ඒ විස ගලට විස ඇතුළු වුණාම ඒ විස ඉවත් කරලා විස ගල ප්‍රකෘතිමත් කරන්න කරපු දේවල් අමතකද ? "

" බෙහෙත් ගුලියක් එල කිරි බඳුනකට දාලා ඒකට විස ගල දානවා . එතකොට විස එල කිරි වලට ආවම බෙහෙත් ගුලියේ බලයෙන් කිරි බඳුන රතු පාට වෙනවා "

" අපි මේකටත් ඒක කරලා බලමු "

" හොඳයි අපි පරීක්ෂා කරලා බලමු "

" එහෙනම් හෙමීට එල කිරි ටිකක් බඳුනකට අරගෙන එන්න මෑණියන්ට දැනෙන්නේ නැතිවෙන්න "

මම මුළුතැන්ගෙය වෙත සෙමෙන් සෙමෙන් ගමන් කලෙමි . කෛකසී මෑණියන් එහි සිටියේ නැත . රිදී කොතලයක එළකිරි පුරවා තිබිණි . මම එයින් ස්වල්පයක් රැගෙන රාවණයන් වෙත ඉක්මණින් පැමිණියෙමි .

" මෑණියන් මුළුතැන්ගෙයි හිටියේ නැත්ද ? "

" නැහැ . මම ඉක්මණට එළකිරි රැගෙන පිට වුණා "



" එහෙනම් ඔය ඔතන තියෙන මැටි බඳුනට ඔය කිරි ස්වල්පයක් වත්කරන්න . අපි පාවිච්චි කරන රන් රිදී භාජන වලට දාලා පරීක්ෂා කරන්න බැහැ "

" නයි විෂ ඉතිරිව තියෙනවද ? "

" මම නයි තුන් හතර දෙනෙක්ගෙන්ම වැඩියෙන් නයි විස එකතුකරගත්තා . ඒ නිසා වැඩියෙනුත් එක්ක තියෙනවා ප්‍රභාශ්වර "

" අයියණ්ඩි එහෙනම් අපි දෙන්නාගේ ඖෂධ බඳුන් දෙකෙන් ගන්නා ඖෂධ වලට වෙන වෙනම නයි විස එකතු කරන්න . ඒකත් එහෙනම් මැටි බඳුන් වලම තමයි එකතු කරන්න වෙන්නේ "

රාවණයන් නයි විස ස්වල්පය බැගින් ගෙන ඒවා මැටි බඳුන් වලට වෙන වෙනම දමා රැගෙන ආවේය .

" මේ බඳුන ප්‍රභාශ්වර ගන්න , මේ බඳුන මම ගන්නවා . මම රිදී බඳුනේ ඖෂධ එකතු කරන්නම් . ප්‍රභාශ්වර රන් බඳුනේ ඖෂධ එකතු කරන්න "

" හොඳයි අයියණ්ඩි "

රාවණයන්ගේ නයි විස දමන ලද ඖෂධ සහ බෙහෙත් ගුලි සහිත එළකිරි එකට කලවම් කිරීමෙන් අනතුරුව මද වෙලාවකින් මුළු බඳුනම රතු පැහැයක් ගත්තේය . එබැවින් ඔහුගේ පරීක්ෂණය අසමත් විය . මම විසින් කරන ලද පරීක්ෂණය සාර්ථක විය . එබැවින් මෙම ඖෂධය සෑදිය යුත්තේ රන් බඳුනක බව මමත් රාවණ ඉගෙන ගතිමු .

" අපි දෙන්නා එහෙනම් රන් බඳුනේ ඖෂධය මුත්තණුවන්ට පෙන්වමු "

" අයියණ්ඩි කැමති විදියක් කරන්න . මේ ඖෂධ එකතු කරන්න නැකත් වේලාවන් හදපු විදිය ගැනත් මම හිතන්නේ පුලතිසි මුත්තණුවන්ට කියන්න වේවි "

" දරුවනේ.............................. "

ඒ කෛකසී මෑණියන්ය .

" ඇයි මෑණියෙනි ? . අපි ඖෂධ කුටියේ "

" දිවා ආහාරය සූදානම් කරලා තියෙන්නේ දරුවනේ "

" මම එනවා මෑණියෙනි "

මම එනවා කියමින් දිව ගියේ කුම්භකරණ ය . ඔහු කවදත් කෑමට දක්ෂයෙකි . ඒ වගේම මහා කය බලයකින් හෙබි පුද්ගලයෙකි . ඔහු අප සියල්ලන්ටම වඩා හැඩි දැඩි පුද්ගලයෙකු වන බව කුඩාකල සිටම අපි දන සිටියෙමු .

ඊළඟ කොටසින් හමුවෙමු .

ඔබ සැමට සමන් දෙවිඳුගේ පිහිට ලැබේවා !

සූරිය කුල තෙද උතුමා පෑවිය සක්වලට හැමා කාරිය සිතුවාට තමා සූරිය දෙවි නමෝ නමා චන්ද්‍ර සහෝදර උතුමා චන්ද්‍ර කටක පැවති තමා සව්සිරි දී ...

ප්‍රභාශ්වර - වෙසමුණි භවන (1)



සූරිය කුල තෙද උතුමා
පෑවිය සක්වලට හැමා
කාරිය සිතුවාට තමා
සූරිය දෙවි නමෝ නමා

චන්ද්‍ර සහෝදර උතුමා
චන්ද්‍ර කටක පැවති තමා
සව්සිරි දී රකු මෙ තුමා
චන්ද්‍ර සුරිඳු නමෝ නමා





" ප්‍රභාශ්වර , පුතේ ඔයා කොහෙද ගියේ , ප්‍රභාශ්වර........................" 

කෛකසී මෑණියන් මා අමතනු ඇසීමෙන් මම වඩාත් කලබයලට පත් වීමි . 

" මම කුටියේ ඉන්නවා මෑණියෙනි "

" මම මේ පේන්න නැතුවට අහන්නේ අයියලා මල්ලිලා ටික කොහෙද කියලා " 

" මම තල්පත් සකසනවා මෑණියෙනි , අයියණ්ඩිලා කැලයට ගියා බෙහෙත් පැළෑටි කීපයක් හොයාගෙන එන්න "

ඒත් සමගම ඇය නිහඬ විය . ඇය ඇයගේ දරුවන්ට මෙන්ම මටද විභීෂණටද භරණ හා දුෂ්‍යනටද එකලෙස ආදරය කළාය . වෛශ්‍රවණයන් අපගේ සමාගමයෙන් තරමක් වෙනස් වූවෙකි . එහෙත් ඔහු අප සමග සිටියානම් ඇය ඔහුටද එකලෙස ආදරය කරනවාට සැකයක් නැත .

මේවන විට අපගේ මාතෘ භූමියේ පාලනය ගෙනයනු ලබන්නේ වෛශ්‍රවණ ය . සුමාලි රජතුමා , එනම් මගේ පියාගේ පියා ලංකාපුර පාලනය ගෙනයන අවධියේ උපායශීලීව තමාට වරදක් ඇතිනොවන ආකාරයට ඔහු ලංකාපුරයේ සිංහාසනයෙන් එලවා දමා වෛශ්‍රවණ විසින් ලංකාපුර පාලන බලයත් ආලකමන්දාවත් වෛමාණික්‍ය රථයත් ආදී වූ සියල්ලම උදුරාගත්තේය .

ඒ කෙසේ වෙතත් පුලස්ති මහා සෘෂි තුමාගෙන් පිය උරුමයත් සුමාලි මහරජුගෙන් මාතෘ උරුමයත් ලබාන රාවණ කුමරු ලංකාපුරයේ අද්විතීය පාලකයා බවට පත්කර ඔටුනු පැළඳවීමට සම්මත කර තිබුණේ ඔහු ඉපදෙන්නටත් පළමුවෙන්මය . ඔහු කෛකසී මෑණියන්ගේ කුස පිළිසිඳගත් දිනයේ පුලස්ති සෘෂි තුමා අනාවැකි පළකර ඇත්තේ රාවණ කුමරු ඒකාන්ත වශයෙන්ම ලංකාපුරයේ රජවන බවත් ඉන් අනතුරුව සක්විති රජ පදවියට පත්ව මහා ශ්‍රේෂ්ටයෙකු වන බවත්ය .





එබැවින් සුමාලි රජු හා විශ්‍රවස්මුණි හෙවත් රාවණයන්ගේ පියාණන් සම්මත කොට ඇත්තේ රාවණයන් හට සියළු ශිල්ප ශාස්ත්‍ර උගන්වා නිසි වයස සම්පූර්ණ වූ කල්හී වෛශ්‍රවණ එලවා දමා ලංකාපුර ආලකමන්දාවේ සිංහාසනාරූඪ කරවීමයි . නමුත් තවමත් අප සිටින්නේ සම්පූර්ණ රාවණයෙකු සමග නොවේ . ඔහු තවමත් තරුණ වියට පා තබමින් සිටින නව යෞවනයෙකි .

පුලතිසි මහා සෘෂි තුමා මහා බ්‍රහ්මගේ දරුවෙකි . සප්ත මහා සෘෂිවරුන්ගෙන් එක් අයෙකි . වැඩිය යුතු ධ්‍යාන සියල්ල වඩා මරණින් මතු මෝක්ෂ සුවය විඳීමේ වාසනාව උදා කරගත්තෙකි . ලංකාපුරයේ එක් කොටසක් පුලතිසි පුර ලෙස එතුමාගේ නමින් නම් කිරීමට තරම් එකල පාලකයින් එතුමන්ට ගරුත්වයක් දැක්වුවද එතුමා වඩාත් ප්‍රිය කරන ලද්දේ හිමාලයේ ජීවත් වීමටය .

හිමාලය සෘෂිවරුන්ගේ ක්ෂේම භූමිය බැවින් එතුමා හිමාලයේ මධ්‍ය කොටසට වන්නට කුඩා ආරාමයක් සාදාගෙන වාසය කළේය . එතුමන්ගේ ශ්‍රේෂ්ට පුතණුවන් වූයේ විශ්‍රවස්මුණි හෙවත් වෙසමුණි නම් මුණි වරයාය . අනාගතයේ සක්විති රජවන රාවණයන්ට පියාවීමේ භාග්‍යය හිමිවූයේ එතුමන්ටය . විටින් විට ලංකාපුරයට ආගියද වෛශ්‍රවණ විසින් ලංකාපුරය කූට උපක්‍රමයකින් අල්ලාගත්පසු තමන්ගේ වැඩිමල් පුතණුවන් වුවද විශ්‍රවස්මුණි විසින් වෛශ්‍රවණව නොසලකා හරින තත්වයට පත්විය . සියල්ලෝම සූර්ය දිව්‍යරාජයාගේ දරුවන්ය , සූර්ය නීතිය පිළිපැදිය යුතුය යන මතය බලවත් සේ ආරක්ෂා කල විශ්‍රවස්මුණි වෛශ්‍රවණ සමග වැඩි ගණුදෙනුවක් නොවන්නට ඇත්තේද ඒ නිසාවෙන්ය .





හිමාලයේ මධ්‍ය කොටසේ සාදන ලද පුලතිසි මහා සෘෂිතුමාගේ පුලතිසි භවන විශ්‍රවස්මුණි තුමාගේ පාලනයට යටත්වීම සමගම එය වෙසමුණි භවන ලෙස නම් විය . අතීතයේ සිටම එහිදී සෘෂි වරුන්ගේ ඒකරාශී වීමෙන් එක් එක් විශේෂ හමුවීම් සහ නියම කිරීම් සිදුවී තිබේ . පුලතිසි සෘෂිතුමා තම අසහාය දැනුම වැඩි ප්‍රමාණයක් තල්පත්වල ලියන ලද්දේ මෙහි සිටය . ලාබාල සෘෂිවරුන් හට තම දැනුම බෙදා දෙන ලද්දේද මෙහි සිටය . එමෙන්ම ලංකාපුරයට පමණක් සීමාවන යම් යම් ශිල්පීය ඉගැන්වීම් සහ ආධ්‍යාත්මික ඉගැන්වීම් ආරක්ෂා කරන ලද්දේද මෙම භවන තුල සකසා ඇති රහස් කුටියක ය .

ඒ අනුව යමින් විශ්‍රවස්මුණිතුමාද එම කාර්යයන් හා වගකීම් තවදුරටත් සිදු කරමින් හා ආරක්ෂා කරමින් තම දරුවන්ටද ඒවා උගන්වමින් සිටියි . මේ හැම දෙයකම අවසාන අරමුණ වන්නේ රාවණ බව ඔවුන් සියල්ලෝම දනී . එහෙත් කිසිවෙක් එය පුන පුනා සිහිපත් නොකර තම වගකීම් ඉෂ්ට කරමින් තම අරමුණු මුදුන්පත් කර ගැනීමට වෙහෙසෙමින් සිටින බවක් මම දකිමි . මමද එයට හැකිතාක් සහය වීමට සූදානම්ව සිටිමි .

මම ප්‍රභාශ්වර කුමරු බවට පත්කරන ලද්දේ ද පුලස්ති මහා සෘෂිතුමා විසිනි . හිමාලයේ වෙසමුණි භවනට මා රැගෙන ආවේ මා ඉපදී දින දෙකකට පමණ පසුවය . මගේ පියාණන් රාවණයන්ගේ මාමාය . කෛකසී මෑණියන් හරියාකාරව නම් මගේ නැන්දනිය වුවද කුඩාකල සිට කුම්භකරණ වෙනුවෙන් අයගේ පියයුරුවල එරුණු කිරි පොවා මා ද ඇතිදැඩි කරගත්තේ ඇයගේ දරුවෙක් ඇතිදැඩි කරන සෙනෙහසිනි .





මගේ පියා ලංකාපුර ධූමරක්ගල ප්‍රාදේශීය පාලකයා ලෙස කටයුතු කරන ධූම්රරාක්ෂ සෙන්පති ය . ඔහුට දාව ඔහුගේ පළමු බිරිඳ වන වාසුල්‍යා කුමරියට උපන් දරුවා මම ය . මා ඉපදී හෝරා දෙකක් හෝ යන්නට මත්තෙන් මගේ මව මිය ගිය බැවින් මා ඇති දැඩි කිරීමේ වගකීම භාරගන්නා ලද්දේ මා මෙලොව උපදින වේලාවේ මා පිළිගැනීමට හිමාලයේ සිට ආ මගේ පියාණන්ගේ වැඩිමහල් නැගෙණිය වන කෛකසී මෑණියන්ය . ඒ වනවිට රාවණ කුමරුද වසර දෙකක පමණ වයසැති වූ නිසාත් කුම්භකරණයන්ට මාසයක් පමණ වයස වූ නිසාත් පසුදාම ඇය මා කැටිව ලංකාපුර සිට හිමාලයට ඒමට නැවු නැග්ගාය .

මා හට නම් තබා ඇත්තේ පුලස්ති මහා සෘෂි තුමා විසිනි . සුරයින් විසින් අප අසුරයින් ලෙස යම් අවමානයකට ලක්කරමින් සිටියද අප සැවොම හිරු දෙවියන්ගේ දරුවන් බව කාටත් නොරහසකි . කුඩා දිය බඳුනකට රසදිය ගල්වන ලද පලිඟු පතක් දමා ඊටම තවත් රසදිය ගලවන ලද පලිඟු පතකින් හිරු දෙවියන්ගේ ආලෝකය හරවා එවූ විට හිරු දෙවියන්ගේ ආලෝක රශ්මියේ ඇති සියළු වර්ණ වෙන් කරගත හැකි වේ .

මේ එක් එක් වර්ණයට අදාළ කිරණයන්ගේ වෙනස් ආකාරයේ බලයක් ගැබ්වී ඇතිබවත් සියලුම වර්ණ ඇති කිරණ එකතුවක සියලුම ශක්තීන් අඩංගුව ඇති බවත් පුලස්ති සෘෂි තුමා තම ඉගැන්වීම් වලදී ඉදිරිපත් කර තිබේ . එම සියළුම වර්ණ සහිත ආලෝකය ප්‍රභාශ්වර ආලෝකය ලෙස නම් කරනවා නම් සියලුම ශක්තීන් සහිත පුද්ගලයා ප්‍රභාශ්වර නම් වෙනවා යැයි කියමින් එතුමා , උපන් ග්‍රහ චාරය බලා මා ප්‍රභාශ්වර ලෙස නම් කර තිබේ .

රාවණයන් යම් දෙයක් උගත්තේද ඒ සියල්ල මා සමග හුවමාරු කරගැනීමටද මා යමක් උගත්තේද ඒ සියල්ල රාවණයන් සමග හුවමාරු කරගැනීමටද අපි දෙදෙනා ඔවුනොවුන් වෙත ගිවිස සිටියෙමු . එබැවින් ඔහුගේ දැනුමේ එක්තරා ආකාරයක පිටපතක් ලෙස මමද මගේ දැනුමේ පිටපතක් ලෙස ඔහුද කටයුතු කළේය . නමුත් බලවන්තයා රාවණයන් බව මම දනිමි . ඔහුගේ උපන් ග්‍රහ චාරය අනුව ඔහු ඒකාන්තයෙන්ම තුන්ලෝකයම සෙලවීමට තරම් ශක්ති වන්තයෙක් වනු නිසැකය . හිරු දෙවියන්ගේ අසහාය ශක්තිය අතින් රැගෙන උපන් බලවන්තයා ඔහුය .





කෛකසී මෑණියන්ගේ ඇමතුමත් සමගම මේ සියල්ල රූප පෙළක් ලෙස සිහිපත් කරමින් සිටි හෙයින් මෙතෙක් වේලා ලිවීමට අවශ්‍ය තල් පත් සකසමින් සිටි කාර්යය මදකට නතර වී ගියේය . මම වහ වහා ඒ කටයුත්ත කරන්නට වීමි . මේ අතරේ වෙසමුණි භවනේ නිහැඬියාව බිඳ දමමින් රාවණ අයියණ්ඩිත් කුම්භකරණ අයියණ්ඩිත් විභීෂණ මලණුවනුත් ඔවුන් සෙවීමට ගිය බෙහෙත් පැළෑටිද රැගෙන ඔසු වේදය පිරික්සන ලද කුටියට ඇතුළු විය .

මගේ කාර්යය තවත් අවසන් නැති බැවින් මම ඔවුන් වෙත නොගියෙමි . රාවණයන් මා සොයා පැමිණියේය .

" දැනට අපි දෙන්නට මේ බෙහෙත් වර්ග ලියා තබන්නට මේ තල්පත් ප්‍රමාණය ප්‍රමාණවත් වෙයි මලණුවනි "

" මම හදිස්සියට උවමනා වෙයි කියලා වැඩියෙන් තල්පත් ගොබයක් ගලවා ගත්තා . ඒකත් ප්‍රමාණයට කපලා හදලම තියලා නැගිටින්නම් අයියණ්ඩි . හොයන්න ගිය බෙහෙත් පැළෑටි ලැබුණා වෙන්න ඕන ? "

" වනාන්තරේ පීරගෙන හොයලා හොයලා යන්තම් ගල් කුලක් උඩ තිබිලා පැළෑටි කීපයක් ගලවගත්තා . ඒත් මම හිතන්නේ මේ පැළෑටි මේ කුටි අසලම තව තවත් වගා කරානම් හොඳයි කියලා . අවශ්‍ය ඔසු පිළියෙළ කරන්න මේ පැළෑටි කීපය මදි වෙයි "

" එහෙනම් ඔය පැළෑටි තිබුණු තැන වගේම තැනක තමයි ආයෙත් හිටවන්න වෙන්නේ . නැත්නම් හැදෙන එකක් නැහැ මේ පසේ නම් "

" උත්සාහ කරලා බලමු . පියාණන් භාවනාවට ගිහින් ආයෙත් ආවද ? "

" නැහැ අයියණ්ඩි "

" මම යනවා ඔසු පිළියෙළ කරන්න වැඩ කටයුතු පටන් ගන්න , ඔය වැඩේ ඉක්මණින් ඉවර කරලා ඔබත් එන්න "



ඊළඟ කොටසින් හමුවෙමු !

ඔබ සැමට සමන් දෙවිඳුගේ පිහිට ලැබේවා !


ඔන්න කිව්වා වගේ කතාව පටන් ගත්තා . මේක ප්‍රභාශ්වර නමින්  ලියවෙන , කතා සෙට් ගොඩක එකතුවක් . තවම රාවණා රජවෙලා තියා ලංකාවට ඇවිල්ලත් නැහැ . ඒ නිසා මේ කතා සෙට් ගොඩක් ලියවෙන්න තියෙනවා . ඒ නිසා කල්පනාවෙන් කියවන්න , කමෙන්ට් කරන්න . අදහස් ඉදිරිපත් කරන්න . හැබැයි එකක් මතක තියාගන්න එහෙ මෙහෙ කොපි කරලා දාන්න එපා . කතා කියවන්න ඕන නම් කතා ටික බ්ලොග් එකේම තියෙන්න දෙන්න . සතියට කොටස් දෙකක් වගේ දාන්න තමයි හිතාගෙන ඉන්නේ . කතාව පරක්කු වෙනවානම් ප්‍රභාශ්වර කුමාරයට වැඩ වැඩි වෙලා නිසා කියලා පොඩ්ඩක් මතක් කරගන්න .  ;) 

එහෙනම් ප්‍රභාශ්වර කුමරුණි ඔබට බලවඩා , ජයවඩා , ආවඩා , ආයුබෝ වේවා !

සූරිය කුල තෙද උතුමා පෑවිය සක්වලට හැමා කාරිය සිතුවාට තමා සූරිය දෙවි නමෝ නමා චන්ද්‍ර සහෝදර උතුමා චන්ද්‍ර කටක පැවති තමා සව්සිරි දී ර...

පද රචනය අනුව මම කැමතිම ගීත 10






විශ්වවිද්‍යාල ජීවිතේ ඉවරෙටම ඉවරයි . දැන් තියෙනවා කතා ගොඩක් ලියන්න . කැමතිම ලෙක්චර්ස් , කැම්පස් එක පැත්තේ වෙච්ච දේවල් වගේ ගොඩක් දේවල් තියෙනවා ලියන්න . කලිනුත් මම ලිපිවල ලියලා තියෙනවා කැම්පස් ගියාට පස්සේ අඳුරගන්න ලැබුණු හොඳ යාළුවෙක් ගැන . ඒ තමයි දනුල වික්‍රමආරච්චි . දනාගෙ පළාමල්ල වෙබ්අඩවිය කරගෙන යන්නේ ඒ දනුලම තමයි .


ලියලා තියෙන සමහර ලිපි වලට කරුණු එකතු කරගන්න මේ දනුලගෙ ගෙදර තිබුණු පරණ පොත්පත් මට උදවු වෙලා තියෙනවා . මමත් ඉඳලා හිටලා ඒ පැත්තේ ගිහින් ගත්ත පොත් දීලා තවත් පොත් ටිකක් අරගෙන එනවා . මේ විදියට අන්තිමටම මම අරගෙන ආවේ සියබස්ලකර කියන පොත සහ තවත් පොතක් . ඒක කියවලා අවසාන වෙලා කාලයක් තිස්සේ ගෙදර තිබුණා . ඔය අතරේ කොහොම හරි සාහිත්‍ය මාසයේ පොත් ගන්න බලන්නත් එක්ක වයලීනෝ ගියා කොළඹ පැත්තේ රවුමක් ඇවිදලා පොත් එකතුකරගෙන එන්න .

ඒ ගිහින් එදා ගියා දනුලගෙ ගෙදර පැත්තෙත් . කතා කර කර ඉන්නකොට දනුල වැඩියහරියක් කරන්නේ ලියන්න ඕන ලිපි වලට මාතෘකා සපයන එක . මේ ඒ වගේ මාතෘකාවක් . වෙනදා එක ගීතයක් ගැන වැල් වටාරම් ලියනවා . ඒත් මේ වගේ කෙටියෙන් ගීත විශාල ප්‍රමාණයක් නැවතත් මතක් කරන්න පුළුවන් නම් වඩාත් හොඳයි කියලා මමත් කල්පනා කරා .


මේ එහෙම මතක් කරපු ගීත දහයක් . අර්ථය අනුව මේ ලිපිය ලියන්න මම කැමතිම ගීත මතක් කරත් වැඩියෙන්ම තියෙන්නේ සංගීතය අනුව මම කැමති ගීත තමයි . ඒත් මූලිකත්වය පද රචනාවට හිමිවෙන නිසා පද රචනය අනුව මම කැමතිම ගීත දහය මොනවද කියලා ඉස්සෙල්ලම ලිව්වා සහ ඔන්න එහෙනම් මෙතැන ඉඳලා කියවගෙන යන්න ඔයාලට ආරාධනා කරනවා .


පළවෙනි රාජසිංහ රජතුමා කවුරුත් දන්නවා . ඊට පස්සේ නැවතත් රාජසිංහ කෙනෙක් රජ වෙනවා . මේ රජතුමා දෙවෙනි රාජසිංහ රජතුමා . මට මතක හැටියට දෙවෙනි රාජසිංහ රජතුමා තමයි දැන් මේ රත්නපුරයේ පවතින සබරගමුව මහ සමන් දේවාලය හදවලා තියෙන්නේ . ඒ කියන්නේ පෘතුගීසි දේවාලේ කඩලා දාලා එතන පල්ලියක් හැදුවට පස්සේ පල්ලිය කඩලා නැවතත් දේවාලය හදන්නේ දෙවෙනි රාජසිංහ රජතුමා තමයි . ආයෙත් මට මතක හැටියට ඉඟුරු දීලා මිරිස් ගත්තෙත් මේ රජතුමා තමයි . ඒ පෘතුගීසි එළවලා ලන්දේසි ගෙන්නගත්ත කතාව .

ඉතින් මේ රජතුමා තමන්ගේ ජීවිත කාලේ යම් කාල සීමාවකදී යම් උපයශීලී වෙස් මාරුවකින් වැදි කාන්තාවක් විවාහ කරගන්නවා . ඉතින් ඒ නිසාම වැදි කාන්තාව අවසානයේ රජ බිසවක් වෙනවා . ඊටත් පස්සේ රජ බිසව රජතුමාට දාව වැදි රාජ කුමාරයෙක් බිහි කරනවා . ඒ වැදි බිසව තමන්ගේ දරුවා නළවපු කවි පන්තියක් තමයි මේ පණ්ඩිත් අමරදේවයන් සංගීතවත් කරලා ගායනා කරන්නේ .

අමරදේවයන් මේ කවි පන්තිය කිසිම වෙනසක් නොකර අර්ථය සහ ධ්වනිශක්තිය ආරක්ෂා වෙන්න ගායනා කරන නිසා මම මේ ගීතයට කැමතියි . මොකද මේ ගීතයේ ආරම්භය " ම " ගණයෙන් තමයි ආරම්භ කරලා තියෙන්නේ . සුබ ගණය ගීතයේ පැවැත්ම සහ ගායකයාගේ පැවැත්ම ආරක්ෂා කරගන්න උදව් වෙලා තියෙනවා . සිතා හෝ නොසිතා අමරදේවයන් ඒ නැළවිලි ගීතය අර්ථවත් විදියටම ගායනා කරනවා සමිතා මුදුන්කොටුව මහත්මිය එක්ක . ඒ නිසා මේ ගීතයට මම කැමතියි .

චන්දෝ මා බිලිඳේ නුඹ නාඬන්
ඉන්දෝ කොමලත නිරිඳුට දාවුන්
පතර බළැති සිරි කුන්ද විදාරණ
විතර බළැති සිරිධර පංචපාලන
බාලොලි ලං ලොලි ලන්න බිලින්ඳේ...ඒ..ඒ..
නාඬන් දැන් එන්දෑ

දැන් දෙවිඳුන් මට දුන් ගරු රූපා
චන්දන කුංකුමයෙන් සැදි රූපා
රන්ගිර'ගින් පායයි මුළු දීපා
මන්මද දැන් දරු සුන්දර රූපා

පැන පැන අතු දිග සොඳ දළු කන්නා
ඉඟි බිඟි කරමින් බැම නටවන්නා
වට සිටි පැටවුන් ලඟ කැඳවන්නා
ඔන්න බිලිඳු රිලවුන් පැන යන්නා

අවර වෙන්න පෙර ගසට නගින්නා
උදා වෙන්න පළමුව හඬලන්නා
සදා පැටවු වට සාරා කන්නා
ඔන්න බිලිඳු සැවුලිඳු හඬලන්නා

පද රචනය - ජන ගීයකි
සංගීතය - පණ්ඩිත් ඩබ්.ඩී. අමරදේව
ගායනය - පණ්ඩිත් ඩබ්.ඩී. අමරදේව සමග සමිතා එරන්දතී මුදුන්කොටුව


----------------------------------------------------------------------------------------------------------------------

මේ ගීතය ගැන නම් කියන්න ගියොත් වයලීනොට තව මාසෙකින් රජයේ බත් කන්න වෙන්නේ . ඒ නිසා කියවලා බලන්න . අද කාලෙට වඩාත් ගැළපෙන ගීතයක් . ඒ නිසා මේ ගීතයට මම කැමතියි .


දන්සල් දොරෙහි නැත යදියෝ…
සල්පිල්වලය පුරවැසියෝ...
පන්සිල් රකිති මැරවරයෝ…
මේ කේතුමතී නුවරයි…

නොමැත ඇසක කඳුලක් නොවැටුනොත් රොඩු කැබැල්ලක්
දකිණු නොහැක ලේ බිඳුවක් නොමලොත් මකුණෙක් මදුරුවෙක්

මළ බැඳුණු ගිණි දණ්ඩේ දැල් බඳිත් මකුළු සේනා
වෙඩි හඬ අසනු රිසි දනෝ පුපුරවති අහෝ රතිඤ්ඤා
මැරුණත් මේ පුරේ - මේ මනරම් සමේ
උපදින්න මතු වාසනා

දස රද දම් හි නිති පැවතී නරපති ඇමති වඩන රුතී
සත වෙත පතල මෙත සදතී මේ කේතුමතී නුවරයි
මේ කේතුමතී නුවරයි

රැකෙයි අකුරට නීතිය
දෙයක් දේ නම් යම් සුදුස්සාටම අයිතී වී ඇත
නැත අක්‍රමිකතා වැඩේ සුහදතා සුන්දරතා සුවතා
අහෝ සැපයි සැපයි මෙපුර විසුම නම්

මැරුණත් මේ පුරේ - මේ මනරම් සමේ
උපදින්න මතු වාසනා

කියමින් නිබඳ ගී මියුරූ දකිමින් අවට රූ සොඳුරූ
සතුටින් රඟති මේ නුවරූ  මේ කේතුමතී නුවරයි
මේ කේතුමතී නුවරයි

නැත මුදලේ වටිනාකම්  බුහුමන් කරයි ශිල්ප ශාස්ත්‍රයටම
නැත පවුල්වාද, පිල් බේද, කුලවාද, දෑ වාද
නැත බදුබර, පවුල් බර ජීවන බර

මැරුණත් මේ පුරේ - මේ මනරම් සමේ
උපදින්න මතු වාසනා

දන්සල් දොරෙහි නැත යදියෝ
සල්පිල්වලය පුරවැසියෝ
පන්සිල් රකිති මැරවරයෝ
මේ කේතුමතී නුවරයි

පද රචනය  - මහාචාර්ය සුනිල් ආරියරත්න. 
සංගීතය - සරත් දසනායක.
ගායනය - නන්දා මාලනී 

--------------------------------------------------------------------------------------------------------------------------

මේ ගීතය සම්බන්ධව නම් වෙනමම ලිපියක් ලියන්න සැලසුම් කරලා තියෙන්නේ . ඒ නිසා වැඩි විස්තරයක් අවශ්‍ය නැහැ කියන්න . මේ ගීතය මම අහන්න අකමැති වෙලා තිබුණු ගීතයක් . ඒත් මේ ගීතයේ අර්ථය දැනගත්තට පස්සේ සහ රාවණ රජු ගැන විපරම් කරලා විස්තර එකතුකරනකොට මේ ගීතය සහ ඒ විස්තර කොච්චර හොඳට ගැළපිලා තියෙනවද සහ එදාට වඩා මේ ගීතය අදට කොච්චර ගැළපෙනවද කියලා හිතෙනවා .

මේ ගීතය " ප්‍රභාශ්වර " කතා මාලාව ලියන්න ගත්තට පස්සේ තමයි ඇත්තටම අහන්න ගත්තේ . මේ ගීතය ඇහෙන ඇහෙන වාරයක් ගානේ මට මතක් වෙන්නේ සීගිරිය . ඉර දෙවියන්ගේ සහ සඳු දෙවියන්ගෙන් ඉපදුනු ජාතියක් වෙච්ච අපි එදා කොතනද හිටියේ සහ අද කොතනද ඉන්නේ සහ හෙට ඉන්න වෙන්නේ කොතනද කියලා මේ ගීතයේ යම් අදහසක් තියෙනවා .

ගීතයේ නිධාන කතාව නම් වෙනම කතාවක් . ඒ කතාවත් එක්ක බැලුවත් මේ ගීතයේ තියෙන්නේ බටහිර සංස්කෘතිය මගින් ලංකාවේ යම් යම් ස්ථාන විනාශ කරගෙන බටහිර කරණය කරලා සිංහල ජාතිය සහ පරිසරය නැති කරගෙන යන ආකාරය ගැන .

මේ ගීතයේ මම කැමතිම කොටසක් තියෙනවා . ඒ " ට්‍රැක්ටරේ යකඩ ගජසෙන් කුංචනාදයෙන් ඇළලුන " කියන කොටස සහ " වෑ කන්ද කපා බිම් කටු කම්බියෙන් බෙදා මේ රණ " කියන කොටස . ඒ කොටස්වල අර්ථ රසය වගේම ශබ්ධ රසයත් ගැබ් වෙලා තියෙනවා කියලා මට හිතෙනවා . ඒ නිසා මේ ගීතයට මම කැමතියි . 

බිම්බරක් සෙනග ගැවසුණු
චන්ද්‍ර සූර්යයා ඉපදුණු
ස්වර්ණ භූමියේ මනරම්
මාළිගාව කෝ..
යුද්දෙකට ඇවිත් රුපුසෙන්
සත් මුහුදු මතින් ගුවනින්
කම්බි වට කළේ මනරම්
මාළිගාව කෝ.. 

ට්‍රැක්ටරේ යකඩ ගජසෙන්
කුංචනාදයෙන් ඇළලුණ
වෘක්ෂ දේවතාවුන් බිම වැටී
පණ ගසයි
මිනී මල් පිපුණු සීතල
නිම්න භූමියේ ඇටකටු
සතර රියන් කඩ අහිමිව
විලාපය නඟයි..විලාපය නඟයි..!

බිම්බරක් සෙනග...

කැලෑ මල් පිපී රතු තොල්වලින්
කෑ ගසා ඉල්ලන
ජාතියේ නිධානය
රන් රුවන් කරඩු කොයි..
වෑකන්ද කඩා බිම් කටු
කම්බියෙන් බෙදා මේ රණ
බිමේ හිස ගසා දමනා 
කඩුව බිම දමවු...කඩුව බිම දමවු...!

බිම්බරක් සෙනග...

ගායනය : ගුණදාස කපුගේ
පද රචනය : රත්න ශ්‍රී විජේසිංහ
සංගීතය : ගුණදාස කපුගේ


--------------------------------------------------------------------------------------------------------------------------

සංගීතයෙන් ඈත් වීම කියන දේ ගැන හිතේ යම් සතුටක් තියෙනවා දුකක් තියෙනවා සහ ඔය දෙකම මිශ්‍ර වෙලා අමුතුම මෙව්වා එකක් තියෙනවා . ඒ වෙනුවෙන් හූමිටි තියන ගීතයක් තමයි මේ ගීතය . හැබැයි මේ ගීතයේ කියවෙන්නේ සංගීතය කියන දේ නෙවෙයි . නර්තනය කරන සහ නර්තනයෙන් ජීවිකාව ගෙනියන අයට තමන්ගේ අග හිඟ කම් සහ ඒවා වහගන්න කරන්න වෙන දේවල් ගැන තමයි මේකෙන් කියවෙන්නේ .

මේ ගීතයේ මම කැමතිම කොටස රඟ බිමෙන් බහින විට ගෙයි සන්තකව ඇති නළල් පට මාල හත් පට සින්න වී ඇති කියන කොටස . ගීතයේ සම්පූර්ණ අර්ථය ඒ පද පේලි කීපයෙන් දෙනවා කියලා තමයි මට දැනෙන්නේ . ඒවගේම තමයි නර්තනය අරමුණු කරගෙන මේ ගීතය ලිව්වත් සකල කළා ශිල්පයන්ගේම ශිල්පීන්ට අත්වෙන්න පුළුවන් යම් ඉරණමක් ගැන මේ ගීතයෙන් කියවෙනවා . ඒ නිසා මේ ගීතයට මම කැමතියි .


කිරුළ මුතු ලිහී සර සර හඬින් වැගිරෙනා
සුළු මැදුම් දෙතිත පැටලී ගිගිරි වැලපෙනා
නටනවා නොවෙයි වැහැරුණු දෙපා වෙව්ලනා
තන තන තාන තම් දෙනා
තන තන තාන තම් දෙනා

දිලිසෙනා සේම කරලිය දිලෙන්නේ නැති
වන්නමක් සේම සුමිහිරි තානමක් නැති
සකියණි ගිරෙන් ගිරට පැන යන්නට
ජීවිතෙන් බැරි
සකියණි ගිරෙන් ගිරට පැන යන්නට
ජීවිතෙන් බැරි

රඟ බිමෙන් බහින විට ගෙයි සන්තකව ඇති
නළල් පට මාල හත් පට සින්න වී ඇති
සකියණි රිදී කාසි සොලවන්නට
බෙර පදය මදි
සකියණි රිදී කාසි සොලවන්නට
බෙර පදය මදි


ගායනය - ජානක වික්‍රමසිංහ
සංගීතය - එච්.එම්.ජයවර්ධන
පද - රත්න ශ්‍රී විජේසිංහ


--------------------------------------------------------------------------------------------------------------------------

මේ ගීතය ජීවිතේ අමතක වෙන්නේ නැති අවස්ථාවකදී අහන්න ලැබුණු ගීතයක් . ජයවර්ධනපුර විශ්වවිද්‍යාලයේදී අහන්න ලැබුණු පළවෙනි ගීතය මේක . කැම්පස් ගිය අපිට සතියක ඔරියන්ටේෂන් ප්‍රෝග්‍රෑම් එකක් තිබුණා . ඒකෙදී මුල දවසක දේශනයකට ආවා ජයවර්ධනපුර විශ්වවිද්‍යාලයේ කළමනාකරණ සහ වාණිජ විද්‍යා පීඨයේ ව්‍යවසායකත්වය පිළිබඳව මහාචාර්යවරයෙක් . එතුමාගේ දේශනය මම හිතනවා ඒ වෙනකල් ඉදිරි සැලසුම් පිළිබඳව මගේ තිබුණු අදහස් වෙනස් වෙලා ජීවිතේ ගමන් කරපු පාර වෙනස් කරා කියලා .

ඒ දේශනය අතරේ මේ ගීතය වාදනය කරලා අපිට තේරුම එක්ක අහගෙන ඉන්න කියලා එතුමා කිව්වා . අපිත් ඉතින් අහගෙන හිටියා . ගී පද ස්ක්‍රීන් එකක දාලා තිබුණා අපිට බලන්න . ඒ බලාගෙන සංගීතයත් එක්ක ගීතයේ තේරුම ඔලුවට ගියේ එදා තමයි . අද කාලේ මේ වගේ මිනිස්සු නිහඬයි කියලා තමයි මම හිතන්නේ . ඒ නිසා මේ ගීතයට මම කැමතියි .


වන සිවුපාවුන් වැනි මිනිසුන් මැද
දෙවි දොවතාවුන් වැනි මිනිසුන් ඇත
ඒ දේවතාවන් දිව්‍යාංගනාවන්
මනු ලෝ තලයේ වාසනාවන්

වල්මත් වූවන් දැක මහ වන මැද
යායුතු මාවත පෙන්වා
ඒ දෙස බලමින් සැනසෙන මිනිසුන්
ඉටු දෙවියන් ලොව සිටිනා

කදුළු සලන්නන් කදුළින් ගොඩගෙන
මුවගේ හසරල් රදවා
තුටු කදුළීන් නෙතු සරසන දෙවියන්
පුදදෙමු දෙවොලට කැදවා

ගී පද - සුනිල් ආරියරත්න 
තනුව - රෝහණ වීරසිංහ
ගායනය - චන්ද්‍රලේඛා පෙරේරා 



--------------------------------------------------------------------------------------------------------------------------

මේ ගීතයට කැමති මොකද කියලා කියන්න බෑ . ඒ නිසා මේ ගීතයට මම කැමතියි .

වස්සානේ සිනා සලයි සිහිනයක් වගේ
ගම්මානේ මිහිර දැනෙයි අරුමයක් වගේ
ඈත දුර ගෙවා ආයේ වඩිනවා
ඈත දුර ගෙවා ආයේ වඩිනවා
ගී පද කී මට මාල ගිරා

පන් ගසකින් තලන්නම්
කෙහෙ රොද ඇද දුවන්නම්
දෑතේ වෙලී නටන්නම්
නෝක්කාඩු කියන්නම්
බොරු තරහක් අරගෙන මා දිහා බලනවාද
සාවියක වගේ ගුලි වී තුරුලෙ නිදන තුරුම
ගී පද කී මට මාල ගිරා

නින්දා ගිණි නිවේවි
මාල හතක් දිලේවී
කිරි සුවඳින් පිරේවි
නැවුම් කවක් ගෙතේවී
සිදාදියට සිත කැන්දා යළිදු නොයනවාද
ගම් දොරකඩ මා නවතා දෙවා කඳුළු සිතට
ගී පද කී මට මාල ගිරා


ගායනය - මාලනි බුලත්සිංහල
සංගීතය - කසුන් කල්හාර
ගී පද - විදුර ඩයස් 


--------------------------------------------------------------------------------------------------------------------------

මේ ගීතය නම් බෝඩිමේ ඉන්න කාලේ නිතරම මතක්වෙන ගීතයක් . අපේ බෝඩිම තිබ්බ පාර දෙල්කඳට යන අතුරු පාරක් එක්ක සම්බන්ධ වෙලා තියෙනවා . ඒ නිසා සමහර වෙලාවට වාහන දුම් , සද්දේ , වගේ දේවල් වලින් පිරිලා තිබුණා . ඊට පස්සේ කොහොම හරි බෝඩිමේ පිටිපස්සේ තියෙන වෙන කාමරයකට මාරු වෙනකල්ම මේ ගීතය මතක් වෙන වෙලාවල් නිතරම තිබුණා . ඒ නිසා මේ ගීතයට මම කැමතියි .


දුරු කතර ගෙවාගෙන 
මං නොකියම ආවට
මට සමාවෙයන් බණ්ඩර මැණිකේ
අර බලන්න අර පුරහඳ අහසේ 

දුම් වලාකුළේ තරුකැට හැංගිලා
ඇස් කොණින් බලා මට ඉඟි බිඟි කළා
මට ඉන්නට බැහැ කොළොම්තොටට වෙලා
උඹෙ කතා කරන දෑස මතක් වෙලා

මහ මැදුරු උඩින් පුරහඳ පායලා
උඹෙ මුහුණ පෙනුණි මුළු අහසම පුරා
ඒ සෙනෙහෙවන්ත කමට වහන් වෙලා
මට ගමට ඇවිත් ඉන්නට බැරිවුණා

පද රචනය: රත්න ශ්‍රී විජේසිංහ
සංගීතය: එච් එම් ජයවර්ධන
ගායනය: කරුණාරත්න දිවුල්ගනේ

--------------------------------------------------------------------------------------------------------------------------

මේ ගීතයේ සංගීතයටත් කැමතියි . ඒවගේම ගීතයේ ලියවිලා තියෙන ව්‍යංගාර්ථ වලට මම වඩාත් කැමතියි . ගීතයේ අන්තරා කොටස් දෙකේම තියෙනවා ව්‍යංගයෙන් කියන දේවල් . ඒවා අහනකොට සමහර වෙලාවට හිතෙනවා සිංහල තරම එකම අදහස වෙනස් වෙනස් විදියට කියන්න පුළුවන් භාෂාවක් ලෝකයේ කොහෙවත් නැහැ නේද කියලා .

චන්ද්‍ර මණ්ඩලේ සැතපුණ පුංචි සාවියේ..
මන්ද කියාපන් නොකියා හැංගිලා ගියේ..
පාන නිවුන සේ පාළුයි ලැයින් කාමරේ..
මන්ද නුඹ ගියේ කියපන් පුංචි සාවියේ..

ලාභ රත්තරන් දිලිසෙන පාළු වීදියේ..
ගෑනු ළමයි පියාඹලා ඉස්සරත් ගියේ..
උන්ට සෙයිලමේ මඟතොට පාර වැරදුණේ..
අන්න ඒ නිසයි මට දුක රත්තරන් දුවේ..

මාල බැඳන් සුදු යකඩෙන් රෝස මල් වනේ..
මාල ගිරව් ගේ දොරකඩ සිංදු කිව් වෙලේ..
හීනෙනුත් හිතුනෙ නෑ මට මොකද කාරණේ..
පාර මතකනම් තාමත් ගේ ලඟයි දුවේ..

ගායනය : සුනිල් එදිරිසිංහ
පද රචනය ‍: රත්න ශ්‍රී විජේසිංහ
සංගීතය : රෝහණ වීරසිංහ


--------------------------------------------------------------------------------------------------------------------------

මේ ගීතයත් ව්‍යංගාර්ථයෙන් යමක් කියන ගීතයක් . මට මතකයි රත්න ශ්‍රී මහත්මයා අදහස් දක්වලා තියෙනවා මේ ගීතය ගැන ; මේ ගීතය ලියවුණු කාලයේ එතුමාට මේ ගීතය රචනා කිරීම සම්බන්ධව දෝෂාරෝපණත් එල්ල වුණා කියලා . මොකද එක පාරටම තොල්පෙති කියලා පටන් ගත්තම හිතට එන්නේ වෙන අදහසක් නිසා . ඒත් මේ ගීතයෙන් කියවෙන්නේ සේපාලිකා මලේ තැඹිලි පාට නටුව ගැන කියලා ටිකක් වෙලා හිතලා බලනකොට තේරුම ගැන පුළුවන් . ඒ නිසා මේ ගීතයට මම කැමතියි .


තොල් පෙති විතරක් 
පළමු හාදුවෙන් තෙමන්න
සේපාලික මලකට
රෑ තනියම හිනාවෙන්න
පුරහඳ එක්ක එන්න නිල් අහසට......

විරහී හදවත් සඳුන් උලා
සිහිලැල් කොට
නෙතු වියන් අගට පළඳා සුදු
මුතුලැල් පොට
පුරහඳ එක්ක එන්න නිල් අහසට.....

කටු කම්බි පවුරු පදනම්
නොපෙනී සදහට
එක යායක් වෙයි මුළු ලෝකය
හඳ එළියට
පුරහඳ එක්ක එන්න නිල් අහසට....

පද - රත්න ශ්‍රී විජේසිංහ
සංගීතය - රෝහණ වීරසිංහ
ගායනය - සශිකා නිසංසලා


--------------------------------------------------------------------------------------------------------------------------

මේ ගීතය අහනකොටම මට මතක් වෙන්නේ ආයුර්වේදය . ඒත් මේ ගීතයේ කියවෙන්නේ ආයුර්වේදය නෙවෙයි . බුදුන් වහන්සේ දේශනා කරන ලද ගාථාවක් . ඒ ගාථාවේ මුල් පද තුන තමයි මේ විස්තර කරන්නේ .

“ආරෝග්‍යා පරමා ලාභා - සන්තුට්ඨි පරමං ධනං
විස්වාසා පරමා ඥාති - නිබ්බානං පරමං සුඛං”

ඒ නිසා මේ ගීතයට මම කැමතියි .

රජෙකු වුණත් - ගිලන් වෙලා
එක්තැන් වුණ දා
කියනවාට සැකයක් නෑ
නිරොග සැප හැර සැපයක් ලොවේ කොයින්දා...

ඉසුරු සමග - හාද වෙලා
නොසතුට ආදා
දැනෙනවාට සැකයක් නෑ
සතුට තරම් වෙන ධනයක් ලොවේ කොයින්දා...

බැරිවුණ දා - නෑදෑයින්
අතහැර ගිය දා
හිතෙනවාට සැකයක් නෑ
විශ්වාසය හැර නෑයෙක් ලොවේ කොයින්දා.....

පද රචනය: මහින්ද දිසානායක
සංගීතය: රෝහණ වීරසිංහ
ගායනය: සුනිල් එදිරිසිංහ















එහෙනම් තවත් ලිපියකින් හමුවෙමු .

ඔබ සැමට සමන් දෙවිඳුගේ පිහිට ලැබේවා !

විශ්වවිද්‍යාල ජීවිතේ ඉවරෙටම ඉවරයි . දැන් තියෙනවා කතා ගොඩක් ලියන්න . කැමතිම ලෙක්චර්ස් , කැම්පස් එක පැත්තේ වෙච්ච දේවල් වගේ ගොඩක් දේවල් ...