කොළඹ දුවන්නියේ , මම එනතුරු ඉස්ටේසමේම නැවතී ඉඳපන්













කොළඹ දුවන්නියේ
හෙට පාන්දර ඇවිත්
මං එනතුරු ඉෂ්ටේෂමේම නැවතී ඉඳපං
කීවාම මොකද බං
මටනම් බයත් හිතේ දැන්
උඹ වගේ ගමන් ගිහින් නෑනෙ මං

හෙට යාළු රැළක් නුඹ එක්කල නඩේ ගැහෙන්නේ
ඔය කොළඹ රටේ ගස්ගල් හිටන් නුඹ අඳුනන්නේ
එහෙ අළුත් යාළුවොත් මට මුණගැහෙයිද මන්දා
ගං ගොඩේ ඉතින් මේ ගැන කුචු කුචු ගාන්නෙපා

දිග පීළි උඩින් කොහොමද උඹ නොවැටී යන්නේ
බිං ගෙවල් මැදින් කළුවරේම පාර දකින්නේ
මග නොදැන ගිහින් මමත් පීළි පනීද මන්ද
අනෙ එහෙම වුණොත් මේ මෝඩිට හූ කියන්නෙපා


ගායනය : සමිතා එරන්දතී මුදුන්කොටුව





කොළඹ දුවන්නියේ
හෙට පාන්දර ඇවිත්
මං එනතුරු ඉෂ්ටේෂමේම නැවතී ඉඳපං
කීවාම මොකද බං
මටනම් බයත් හිතේ දැන්
උඹ වගේ ගමන් ගිහින් නෑනෙ මං

මේ ගීතයෙන් කියවෙන්නේ කෝච්චියක ගමන් විලාසය සහ කෝච්චියක ජීවන වෘතාන්තයක් එක්ක ගැහැණු ළමයෙක්ගේ සිතුවිලි මාලාවක් ගැන . ගොඩක් වෙලාවට කෝච්චි වලට නම් වැටිලා තියෙන්නේ උඩරට මැණිකේ , රුහුණු කුමාරී , යාල් දේවි වගේ කාන්තා නම් . ඉතින් මේ ගීතයත් රචනා වෙලා තියෙන්නේ මේ වගේ ස්ත්‍රීත්වය ආරෝපණය වෙච්ච කෝච්චියක් එක්ක .

මට හිතෙන හැටියට මේ ගීතය රචනා වෙලා තියෙන්නේ ගමේම හැදිලා වැඩිලා අම්මා තාත්තා සහ පවුලේ අය එක්ක කාලය ගත කරපු ගැහැණු ළමයෙක් තනියමම ජීවිතය හොයාගෙන කොළඹ යන ගමනක් ගැන . හැබැයි ඉතින් තනියමම කිව්වට තනියමමත් නෙවෙයි , තනියට තව යාළුවො ටිකකුත් ඉන්නවා . ඒ යාළුවො තමයි කෝච්චියේ ගමන් කරන අනිත් මගීන් . ඒත් යන්නේ පවුලේ අය එක්ක නෙවෙයි  නිසා ටිකක් බයෙන් වගේ තමයි ඉන්නේ . මේ බයයි , කොළඹදී ඇතිවෙන ප්‍රශ්න වලට මුහුණු දෙන්නේ කොහොමද කියලා තියෙන සැකයයි එක්ක මේ ගැහැණු ළමයා කෝච්චියට ආමන්ත්‍රණය කරනවා කොළඹ දුවන්නියේ හෙට පාන්දර ඇවිත් මං එනතුරු ඉෂ්ටේෂමේම නැවතී ඉඳපං කියලා .

කෝච්චිය කවදත් කොළඹ යනවා ආයෙත් ගමට එනවා . ඒ නිසා කොළඹ කියන්නේ කොච්චියටනම් නුහුරු නුපුරුදු පරිසරයක් නෙවෙයි . ඒත් මේ ගෑණු ළමයට කොළඹ කියන්නේ කවදාවත් ගිහින් ඇවිදලා දැකලා නැති නුහුරු නුපුරුදු පරිසරයක් නිසා කෝච්චියට කියනවා මෙන්න මෙහෙම . කීවාම මොකද බං මටනම් බයත් හිතේ දැන් උඹ වගේ ගමන් ගිහින් නෑනෙ මං .





හෙට යාළු රැළක් නුඹ එක්කල නඩේ ගැහෙන්නේ
ඔය කොළඹ රටේ ගස්ගල් හිටන් නුඹ අඳුනන්නේ
එහෙ අළුත් යාළුවොත් මට මුණගැහෙයිද මන්දා
ගං ගොඩේ ඉතින් මේ ගැන කුචු කුචු ගාන්නෙපා

මෙතන හෙට යාළු රැලක් නුඹ එක්කල නඩේ ගැහෙන්නේ කියනවා . යාළු රැලක් කියලා කියන්නේ මේ ගැහැණු ළමයාගේ යාළුවො නෙවෙයි . කෝච්චියේ යාළුවො . ඒ තමයි කෝච්චියේ යන එන අනිත් මගීන් . මේ මගීනුත් හෙට උදේට කොළඹ යන්න ලැස්ති වෙනවලු . ඔය කොළඹ රටේ ගස් ගල් හිටන් නුඹ අඳුනන්නේ කියලා කියන එකෙන් ආයෙත් අපිට හිතාගන්න පුළුවන් කෝච්චිය කොළඹ පරිසරයට සමීප බව සහ ගැහැණු ළමයා කොළඹ පරිසරයට සමීප නැති බව .

එහෙ අලුත් යාළුවොත් මට මුණ ගැහෙයිද මන්දා , ඉතින් මේ ගෑණු ළමයා හිතනවා කොළඹදී තමන්ට අලුත් යාළුවො මුණගැහෙයි කියලා . ගං ගොඩේ ඉතින් මේ ගැන කුචු කුචු ගාන්නෙපා කියලා කියන වචන ටික නිසා කෝච්චියක පසුබිම තවත් වැඩි වෙලා තියෙනවා . කෝච්චි යනවා වගේ කියලා පොඩි කාලේ අපි කෝච්චි යන්නේ කුචු කුචු කිය කිය . ඒ යෙදුම මෙතනටත් හරිම අපූරුවට යොදාගෙන තියෙනවා .





දිග පීළි උඩින් කොහොමද උඹ නොවැටී යන්නේ
බිං ගෙවල් මැදින් කළුවරේම පාර දකින්නේ
මග නොදැන ගිහින් මමත් පීළි පනීද මන්ද
අනෙ එහෙම වුණොත් මේ මෝඩිට හූ කියන්නෙපා

කෝච්චිය යන්නේ රේල් පීල්ල උඩ . මේ රේල් පීල්ල උඩ කෝච්චිය වැටෙන්නේ නැතුව කොහොමද තියෙන්නේ කියන එක මේ ළමයට ප්‍රශ්නයක් . ඉතින් මේ ළමයා හිතනවා කොහොමද මෙච්චර ලොකු යකඩ ගොඩක් මේ සිහින් දිග පීලි උඩ වැටෙන්නේ නැතුව තියෙන්නේ කියලා .

කෝච්චිය සමහර වෙලාවට බිං ගෙවල් ඇතුලෙනුත් යනවා . ඒ යනකොට ඇතුලේ තියෙන්නේ තනිකරම කළුවරක් . ඒත් කෝච්චිය හරියටම පීල්ල උඩ යනවා . මේකත් මේ ළමයට ප්‍රශ්නයක් . මොකද කළුවරේ කොහොමද වැටෙන්නේ නැතුව යන්නේ කියලා . පස්සේ මේ ළමයා හිතනවා යන එන පාර දන්නේ නැතුව කොළඹ ගිහිල්ල මේ ළමයටත් මග වරදියිද කියලා . මග නොදැන ගිහින් මමත් පීළි පනීද මන්දා කියලා කියන්නේ ඒ නිසා .

අන්තිමටම මේ ළමයා තමන් විහින්ම හිතින් මවාගත්ත ලැජ්ජාවකින් ලැජ්ජාවට පත්වෙලා කියනවා , අනෙ එහෙම වුණොත් මේ මෝඩිට හූ කියන්නෙපා කියලා . කෝච්චියේ නලාවත් හූ................... ගාලා නිකුත් වෙන නිසා මෙතනටත් හූ කියන්නෙපා කිව්වම ගීතයේ තියෙන කෝච්චි පසුබිමට  හොඳට ගැළපෙනවා .


මේ ගීතයේ තවත් තේරුමක් ඇති කියලා මට නිකමට හිතෙනවා . ඒක හැබැයි සංගීතය එක්ක එහෙම ගත්තම ගැළපේන්නෙත් නෑ . ඒත් මම හිතන්නේ මේ ගීතයේ යටි අදහසකුත් තියෙනවා කියලා . ඒ අදහසත් එක්ක මට මැවෙනවා මෙන්න මෙහෙම කතාවක් .

ගමක හැදුනු වැඩුණු දුප්පත් පවුලක ගැහැණු ළමයෙක් කොළඹ රස්සාවකට යනවා . අපි හිතමුකෝ ගාමන්ට් එකක රස්සාවකට . එහෙමත් නැත්නම් වෙන මොකක් හරි ෆැක්ටරියක රස්සාවකට කියලා . එහෙම යනකොට මේ ළමයට නුහුරු පරිසරයට යන්න මැලිකමක් ඇතිවෙනවා . ඒ මැලිකම නිසාම හිතේ ප්‍රශ්න ගොඩකුත් ඇතිවෙනවා . මේ ප්‍රශ්න ටික තමයි මේ ගීතයෙන් කියවෙන්නේ . ඒවගේම තමයි කොළඹ දුවන්නිය කියන්නේ මේ ළමයාව කොළඹ රැකියාවට එක්කගෙන යන කාන්තාව කියලා මට හිතෙනවා . කොළඹ දුවන්නියේ කියල කියන්නේ මේ කාන්තාව තමයි

කොළඹ දුවන්නියේ
හෙට පාන්දර ඇවිත්
මං එනතුරු ඉෂ්ටේෂමේම නැවතී ඉඳපං
කීවාම මොකද බං
මටනම් බයත් හිතේ දැන්
උඹ වගේ ගමන් ගිහින් නෑනෙ මං

ඉතින් මේ ගෑණු ළමයා කියනවා කොළඹ දුවන්නියට හෙට උදේම මමත් කොළඹ යන්න ලැස්ති වෙලා එනකල් ඉස්ටේෂමේම නැවතිලා ඉන්න කියලා . පස්සේ කියනවා මට කොළඹ යන්න බයත් හිතෙනවා , මොකද ඔයා වගේ මම ගමන් ගිහිල්ලා නැති නිසා කියලා . කීවාම මොකද බං කියන පදය එක්ක බැලුවම මේ ගීතයේ කතා නායිකාව ගමේ හැදුනු වැඩුණු කෙනෙක් කියලා පෙන්නන්න ඒ යෙදුම යොදලා තියෙනවා වෙන්න පුළුවන් .


හෙට යාළු රැළක් නුඹ එක්කල නඩේ ගැහෙන්නේ
ඔය කොළඹ රටේ ගස්ගල් හිටන් නුඹ අඳුනන්නේ
එහෙ අළුත් යාළුවොත් මට මුණගැහෙයිද මන්දා
ගං ගොඩේ ඉතින් මේ ගැන කුචු කුචු ගාන්නෙපා

හෙට යාළු රැළක් නුඹ එක්කල නඩේ ගැහෙන්නේ , ඒ කියන්නේ මේ කොළඹ දුවන්නිය එක්ක තවත් කීප දෙනෙක්ම කොළඹ යනවා කියන එක . ඔය කොළඹ රටේ ගස් ගල් හිටන් නුඹ අඳුරන්නේ කිව්වම අපිට කොළඹ දුවන්නියට කොච්චර පළපුරුද්දක් තියෙනවද කියලා හිතා ගන්න පුළුවන් . කොළඹ ඉන්නවා මේ කොළඹ දුවන්නිය එක්ක ගියපු තවත් යාළුවො . ඒ යාලුවොත් මේ ගෑණු ළමයට අඳුරගන්න පුළුවන් වෙයි . එයාලා වගේ හැඩගැහෙන්න පුළුවන් වෙයි . හැබැයි ඒවා ගැන ආයෙත් ගමට ආවම ගමේ අය එක්ක කුචු කුචු ගාලා ඕප දූප වගේ කියන්නෙපා කියලා මේ ළමයා කොළඹ දුවන්නියට කියනවා .


දිග පීළි උඩින් කොහොමද උඹ නොවැටී යන්නේ
බිං ගෙවල් මැදින් කළුවරේම පාර දකින්නේ
මග නොදැන ගිහින් මමත් පීළි පනීද මන්ද
අනෙ එහෙම වුණොත් මේ මෝඩිට හූ කියන්නෙපා

දිග පීලි උඩින් කොහොමද උඹ නොවැටී යන්නේ . රේල් පාරේ පීලි දෙකක් තියෙනවා . මේ පීලි දෙක උඩ වැටෙන්නේ නැතුව යනවා . මට හිතෙනවා මේ පීලි දෙක තමයි හොඳ සහ නරක කියලා . හොඳ සහ නරක කියන දෙක අතරේ සමබරව මේ කොළඹ දුවන්නිය තමන්ගේ ගෞරවය නැතිකරගන්නේ නැතුව ගමන් කරන්නේ කොහොමද කියලා මේ ගැහැණු ළමයා ප්‍රශ්න කරනවා . බිං ගෙවල් මැදින් කලුවරේම පාර දකින්නේ . ඒ කියන්නේ තමන්ට කරදර කොච්චර ආවත් ඒවා විඳ දරාගෙන යන්නේ කොහොමද කියලා .




මග නොදැන ගිහින් මමත් පීලි පනියිද මන්දා . අනේ එහෙම උනොත් මේ මෝඩිට හූ කියන්නෙපා . ඒ කියන්නේ තවමත් මේ ළමයා කොළඹ ගැන දන්නේ නෑ . ඒ නිසා දන්නේ නැතුව කොළඹ ගිහින් අන්තිමට අනතුරක් වෙයිද දන්නේ නෑ , එහෙම උනොත් තමන්ට හූ කියන්න එපා කියලා මේ ළමයා කොළඹ දුවන්නියගෙන් ඉල්ලා හිටිනවා . මේ තේරුමත් ඉතින් ගීතයට එහෙන් මෙහෙන් සම්බන්ධ කරන්න පුළුවන් .

ගීතයේ සංගීතය නිර්මාණය කරලා තියෙන්නේ කෝච්චියක ඇහෙන හඬවල් උපයෝගී කරගෙන . මම හිතනවා මේ ගීතය සාර්ථක ගීතයක් වෙන්න සංගීතයත් බලපාන්න ඇති කියලා . එහෙනම් තවත් ලිපියකින් ආයෙත් හමුවෙමු .

ඔබ සැමට සමන් දෙවිඳුගේ පිහිට ලැබේවා ! 

කොළඹ දුවන්නියේ හෙට පාන්දර ඇවිත් මං එනතුරු ඉෂ්ටේෂමේම නැවතී ඉඳපං කීවාම මොකද බං මටනම් බයත් හිතේ දැන් උඹ වගේ ගමන් ගිහින් න...

ලංකාවේ කේන්දර සහ පිටරට කෙන්දර



දැනට ටික කාලයකට කලින් විදේශගතවෙලා ඉන්න අන්කල් කෙනෙක් මට කතාකරලා ඇහුවා එයාගේ කේන්ද්‍ර සටහන පරීක්ෂා කරවා ගන්න පුලුවන්ද කියලා . මම ඒ වෙලාවේ මගේ ජ්‍යෝතිෂ වැඩ කොටසට අදාළ සියලුම විස්තර අඩංගු සටහනක් යවලා කිව්වා ඒ අවශ්‍ය විස්තර මට එවන්න කේන්දරේ හරිද වැරදිද බලලා පළාපල සහ දැනගන්න අවශ්‍ය අනිත් විස්තර එවන්නම් කියලා .

ඊට පස්සේ එයා මාත් එක්ක කිව්ව දේවල් වලින් මම පුදුමයට පත්වුණා . ඒ අංකල් කිව්වා මම දැන් විදේශගත වෙලා ඉන්නේ . ඒ නිසා මට ඒ රටට අදාලව කේන්දරේ හදාගන්න පුලුවන්ද කියලා . ඊට පස්සේ මම හිතුවේ එයා ඉපදිලා තියෙන්නේ පිටරටක කියලා . මම ඉතින් ඇහුවා කොහෙද ඉපදිලා තියෙන්නේ කියලා . එතකොට කිව්වා මම ඉපදිලා තියෙන්නේ ලංකාවේ . 

ඒත් දැන් ඉන්නේ විදේශගතවෙලා ඒ නිසා මම ඉන්න රටට අනුව උපන් වෙලාවට කේන්දරයක් හදාගන්න ඕන කියලා . මම කල්පනා කරා මේ කියන්නේ මේ කෙනා ඉන්න රටට මේ දවස්වල කොහොමද ග්‍රහ බලපෑම තියෙන්නේ කියලා අහනවා කියලා . ඒත් මෙයා අදහස් කරලා තියෙන්නේ තමන් ජීවත්වෙන රට වෙනස් කරනවානම් උපන් වෙලාව අනුව තමන් ජීවත් වෙන රටට අදාලව කේන්ද්‍ර සටහනක් නිර්මාණය කරන්න ඕන කියලා .



මම ඊට පස්සේ ඒ දේවල් පැහැදිලි කරන්න උත්සාහ ගත්තත් ඒ කෙනා ඒවා වටහාගන්නා බවක් පෙනුනේ නැති නිසා එයා වෙනුවෙන් මගේ සේවය ලබා දීම මම ප්‍රතික්ෂේප කරා . ජ්‍යෝතිෂ විද්‍යාව තරමක් දුරට දැනගත් පිරිසක් මේ වගේ වැරදි දේවල් මිනිස්සුන්ගේ ඔළුවට දාලා තියෙනවා කියලා තමයි මමනම් හිතන්නේ .

කේන්දරේ කියන්නේ තමන් උපන් වෙලාවට අදාලව අහසේ තරු ග්‍රහයින් නැකත් පිහිටලා තියෙන ආකාරය ගැන දළ වශයෙන් හෝ සූක්ෂම වශයෙන් පෙන්නුම් කරනු ලබන යම්කිසි සැලසුමකට . ඒ සැලසුම අනුව තමයි ජ්‍යෝතිෂ විද්‍යාඥයින් කේන්දරේ බලවා ගන්න එන අයට අවශ්‍ය දේවල් කරලා දෙන්නේ .

අපි ඉපදෙන්නේ යම් වේලාවකදී පොළවේ යම් තැනකදී . ඉතින් ඒ කෙනාගේ ශරීරයට මේ නැකත් ග්‍රහ තරුවල කිරණ එහෙම බලපාන්නේ ඒ ඉපදෙන වෙලාවේ අහසේ පිහිටලා තිබුණු විදියට . සරළවම කියනවානම් ඔයාලා හිතනවාද ගෝලාකාර පොළවේ එකම වෙලාවකට ලංකාවටත් ඇමෙරිකාවටත් එකම ලග්නයක් උදාවෙයි කියලා . අනික ලංකාවේ උපන් කෙනා ඇමෙරිකාවට ගියාම එයාට වෙනමම කේන්දරයක් හදන එක සාධාරණයි කියලා . කවදාවත් එහෙම වෙන්නේ නැහැ . කෙනෙක් ඉපදුනා නම් ඒ කෙනාට බලපාන්නේ ඒ වෙලාවේ ඒ ස්ථානයට තිබ්බ ග්‍රහ බලපෑම තමයි .



ලංකාවේ සමහර ජ්‍යෝතිෂවේදීන් මේ විදේශයක උපන් කෙනෙක්ට කේන්දර නිර්මාණය කිරීමේදී මෙන්න මෙහෙම දෙයක කරනවා . එයාලා කරන්නේ විදේශයක උපන් වෙලාව ලංකාවේ වෙලාවට හරවනවා . ඊට පස්සේ ලංකාවේ වෙලාවට කේන්දරේ හදනවා . ලංකාවේ වෙලාවට කේන්දරේ හදලා දෙනවා මෙන්න කේන්දරේ කියලා . ඒත් ඒක වැරදියි . වෙලාවේ අඩු වැඩිවෙන සාධකයක් තියෙන නිසා අපිට පුළුවන් විදේශ වෙලාව ලංකාවේ වෙලාවට හරවලා නැවතත් විදේශයේ වෙලාවට පෙරළන්න . 

ඒත් විදේශයක හැදෙන්න ඕන කේන්දරේ ලංකාවේ තැනකට හදලා ආයෙත් විදේශයකට පෙරළන්න බැහැ . අනිත් කාරණාව තමයි මෙහෙම ලංකාවේ වෙලාවට විදේශයේ වෙලාව පෙරලලා කේන්දරේ හැදුවා කියමුකෝ . ඒත් ස්ථානය කොහොමද ගන්නේ . ලංකාවේ යම් නිශ්චිත වේලාවකදී කොළඹට තියෙන ග්‍රහ බලපෑම නෙවෙයි ත්‍රිකුණාමලයට තියෙන්නේ . ඉතින් විදේශගත වෙලාවක් ලංකාවට හදනකොට කොළඹ නගරය පාදක කරගෙන කේන්දරේ හැදීම යම් දුරකට වැරදියි කියලා තමයි මමනම් විශ්වාස කරන්නේ .

උදාහරණයක් හැටියට විදේශයක උපන් කෙනාට කටක ලග්නය උදාවෙලා තියෙන වෙලාවට ඒ වෙලාවම ලංකාවේ වෙලාවට පෙරලලා කේන්දරේ නිර්මාණය කලාට පස්සේ එයාගේ ලග්නය මකර ලග්නය වෙන්න පුළුවන් . එහෙමත් නැත්නම් ධනු ලග්නය හෝ වෙනත් ලග්නයක් වෙන්න පුළුවන් . ඊට පස්සේ ඔන්න ලංකාවේ හදලා තියෙන කේන්දරේ නැවතත් අපිට විදේශයේ ඒ වෙලාවට අදාළ කේන්දරේ බවට පෙරළන්න විදියක් නැහැ . මේක තේරුම් ගැනීම මත තමයි තියෙන්නේ .



මේ ගැටළුව නිරාකරණය කරගන්න අපිට තාක්ෂනය උපයෝගී කරගන්න පුළුවන් . හැබැයි මම කියන්නේ නැහැ කේන්දර බලන සොෆ්ට්වෙයා සේරම හරි කියලා . සමහර ඒවායේ තියෙන  වීජගණිතමය ගණනය කිරීමේ වැරදි නිසා සමහර වෙලාවල් වලට කේන්දර වරදිනවා . මේ නිසා මම නම් කියන්නේ එකම සොෆ්ට්වෙයා එකක් තියාගෙන ඉන්නේ නැතුව කීපයක් පාවිච්චි කරන්න කියලා . අඩුම තරමේ සොෆ්ට්වෙයා තුනකින් හෝ මේ ගණනය කිරීම් කරලා බලන්න පුළුවන් නම් නිවැරදිතාවය පිළිබඳව හොඳ අදහසක් ගන්න පුළුවන් . එතකොට ඒ උපන් වෙලාවට අදාළව කේන්දර සටහන අනුව පළාපල විස්තරය ඉදිරිපත් කරන්න පුළුවන් විශ්වාසයෙන්ම .

වැරදි කේන්දරයක් කියන්නේ නමේ ඉඳලාම සේරම වැරදියි . ඔය විදියට විදේශයක ඉපදුණු කෙනෙක්ට සෙත් කවියක් ලියන්න ගිහින් උපන් නැකත් සහ නම සහ නිවැරදි කේන්දරේ අතර විශාල පරස්පර බවක් තිබිලා ඒ දේවල් මුල ඉඳලාම නිවැරදි කරන්න සමහර වෙලාවල් වලදී මට සිදුවෙලා තියෙනවා . සමහර නැකත් වලට එන අකුරු වලින් නම් තියන්න අමාරුයි . ඒ වෙලාවට ඒ නැකතට ගැළපෙන වෙනත් නැකතක අකුරෙන් නම් තියනවා . ඒත් එහෙම නොගැළපෙන වෙලාවල් වලදී නම් තියන්න මේ වැරදි කේන්දර හේතු වෙලා තියෙනවා .

කේන්දරේ වැරදි වුණාම අපල , දසා , විදසා , එරාෂ්ටක හැමදේකම කාලසීමාව වරදිනවා . එතකොට වෙන්නේ වැරදි පළාපල කීම . ඊටත් පස්සේ වෙන්නේ ඉතින් ජ්‍යෝතිෂ විද්‍යාව මිනිසුන් විසින් පිළිකුල් කිරීම කියලා . මේ ළඟදී මම කියවපු ලිපියක කමෙන්ට්ස් විදියට තිබුණා ජ්‍යෝතිෂ විද්‍යාව කියන්නේ ඇඟ මහන්සි කරවන්නේ නැතුව ලේසියෙන් හම්බ කරන්න තියන හොඳම විදිය කියලා . ඒත් ජ්‍යෝතිෂ විද්‍යාව හරියට කරන කෙනෙක් දන්නවා තමන්ගේ මනස තුල කොයිතරම් ගණනය කිරීමක් සහ ග්‍රහ ගමන පිළිබඳව කොයිතරම් සැළකිල්ලෙන් ඉන්න ඕනද කියන දේ .

ඒක ඉගෙන ගත්ත කෙනා විතරයි දන්නේ . ඉගෙන ගන්නේ නැතුව කියන්න බැහැ මේ දේ මෙහෙමයි කියලා . ධර්මය තුළිනම් ධර්මය විනාශ කරන අය ඇතිවෙනවා වගේම තමයි ජ්‍යෝතිෂ විද්‍යාව තුළින්ම තමයි ජ්‍යෝතිෂ විද්‍යාව විනාශ කරන අය ඇතිවෙන්නේ . විද්වතුන්ගේ ශාස්ත්‍රය ඒ ආකාරයට හෑල්ලුවට ලක්වීම පිළිබඳව තියෙන්නේ කළකිරීමක් .


මගේ Online හරහා සිදු කෙරෙන ජන්ම පත්‍ර පරීක්ෂා කිරීමේ සේවාවට සම්බන්ධ වී ජන්ම පත්‍රය පරීක්ෂා කරගැනීමට පහත Image එක මත Click karanna 





ඔබ සැමට සමන් දෙවිඳුගේ පිහිට ලැබේවා !

දැනට ටික කාලයකට කලින් විදේශගතවෙලා ඉන්න අන්කල් කෙනෙක් මට කතාකරලා ඇහුවා එයාගේ කේන්ද්‍ර සටහන පරීක්ෂා කරවා ගන්න පුලුවන්ද කියලා . මම ඒ වෙලාව...

මම දෙවිඳුනි දෙවොලට ආවේ සඳ ගිනි ඇවිලෙන මොහොතකය




ප්‍රේම සබන්ධතා ඇතිකරගැනීම සමහර අයට ලේසි දෙයක් , ඒත් සමහර අයටනම් අමාරු දෙයක් . ප්‍රේම සබන්ධතා ඇතිවීම හෝ ඇතිකරගැනීම වෙන්නේ වැඩි හරියක්ම ආකර්ෂණය මත කියලා මම කලින් ලිපියක කිව්වා . ආකර්ෂණය මත තමයි ප්‍රේම සබන්ධතාවක් ඇතිවෙන්න පදනම ඇතිවෙන්නේ . පස්සේ දෙන්නා අඳුරගෙන කාලයක් යනකොට ආකර්ෂණයට වඩා අවබෝධයට මුල් තැනට එනවා කියලා තමයි කියන්නේ . ඒත් මේ මොකක්වත් නැතිව ප්‍රේම සබන්ධතා ඇතිවෙන නැතිවෙන චරිත අපේ අවට දකින්න නැතුවමත් නෙවෙයි .

මම ඉන්න වටපිටාවේ එක ගැහැණු ළමයෙක් ඉන්නවා කාලයක් තිස්සේ එක පිරිමි ළමයෙක් එක්ක යාළුවෙලා හිටියා . මේ දෙන්නා හැබැයි සමාජයේ ජීවත් වෙන්න හරියට දන්නේ නෑ කියලා වගේ තමයි මට හිතුනේ . ඕන පාරක හංදියක මහා හයියෙන් රණ්ඩු වෙන්න මේ දෙන්නාට වැඩි අපහසුවක් තිබුණේ නෑ . සමහර දවස් වලට පාරේ මිනිස්සු බලාගෙන ඉන්න අතරේ මේ දෙන්නා රණ්ඩු වෙනවා . බැංකුවේදී , තැපැල් කන්තෝරුවේදී මේ දෙන්නා රණ්ඩු වෙනවා . ඒත් පස්සේ දෙන්නා හිනා වෙවී ආයෙත් අත් අල්ලාගෙන යනවා දකිනවා . හැබැයි මේ සම්බන්ධය නවතින ලොකු දෙයක් උනේ නෑ එයාලට සාපේක්ෂව . යාලු වෙනවා තරහා වෙනවා එහෙම එහෙම තමයි දෙන්නා හිටියේ .

ඒ ගෑණු ළමයා ගැන මගේ දර්ශනයෙන් මැනලා මම ඇතිකරගෙන හිටියේ නෙගටිව් අයිඩියා එකක් . මොකද හදවතේ කැඩපත මුහුණ නිසා මූණ දැක්කම හදවත ගැන හිතාගන්න පුළුවන් නිසා . පහුගිය සතියේ දවසක මම මම දැක්ක දෙයින් වික්ෂිප්ත වෙලා අන්දුන් කුන්දුන් වෙලා පිස්සු හැදිලා ආයෙත් පිස්සු හැදිලා මෙව්වා වෙලා ගියා . ඇයි දන්නවද ? . අර ගෑණු ළමයා දැන් ඉන්නේ වෙන පිරිමි ළමයෙක් එක්ක . අවුරුද්දකට වැඩි කාලයක් මම මේ ගෑණු ළමයා සහ කලින් පිරිමි ළමයා ගත කරපු ජීවිතය දිහා පේන වෙලාවට බලාගෙන හිටියා . දෙන්නා ගමන් බිමන් ගියේ එකට කෑවේ බිව්වේ එකට රණ්ඩු කරගත්තෙත් එකට . හැබැයි එහෙමත් වෙලා දෙන්නා ආයෙත් ප්‍රශ්නයක් නැතුව ඉන්නවා දැක්කම මට නිකමට හිතුනා මේ ගෑණු ළමයාගේ පිටතින් පේන පෙනුම අනුව මම වැරදි රූපයක් මවාගෙන ඉන්නවා කියලා . ඒත් මම හරි කියලා එදා මම තේරුම් ගත්තා .


දැන් ඒ ගෑණු ළමයා වෙනත් පිරිමි ළමයෙක් එක්ක තමයි ඉන්නේ . යන්නේ එන්නේ කන්නේ බොන්නේ ඔක්කොම . දෙන්නා එක්ක මෝටසයිකලේ තුරුල් වෙලා යනවා දැක්කම මට හිතුනේ අර පිරිමි ළමයාගේ ජීවිතේ අයියෝ සල්ලි නේද කියලා . මොකද ඒ පිරිමි ළමයා පෙනුමෙන් ටිකක් වැදගත් පාටයි , යමක් කමක් තියෙන පාටයි . මම හිතන්නේ මේ ගෑණු ළමයා මේ පිරිමි ළමයාගේ කරේ එල්ලුනේ ඒවා නිසා වෙන්න ඇති කියලා . සමහර විට මගේ හැගීම වැරදි ඇති ඒත් අවසානයේ එහෙම දෙයක් උනත් පුදුම වෙන්න දෙයක් නම් නෑ . 

ඉතින් ප්‍රේම සබන්ධයක් නැති වෙන්න බලපාන හේතු කාරණා මොනවද කියලා හිතලා බැලුවම මෙන්න මේවා මම හිතනවා ඒ කාරණා එකතුවට ඇතුල් කරන්න පුළුවන් කියලා . 

සමහර ප්‍රේම සබන්ධතා බිඳ වැටෙන්න මූලිකවම හේතු වෙන්නේ දෙන්නගෙන් එක්කෙනෙක් හෝ දෙන්නම වෙනත් ප්‍රේම සබන්ධතා ඇතිකරගැනීම . මේ නිසා දෙන්නට කොහොමත් ප්‍රේම සබන්ධතාව ඉදිරියට පවත්වාගෙන යන්න බැරි නිසා ප්‍රේම සබන්ධය ඇණහිටිනවා . වෙනත් සබන්ධතා වලට යොමු වෙන්න වැඩි තරමක් හේතු වෙන්නේ ප්‍රේම සම්බන්ධයේදී දෙන්නා එකිනෙකා මත තෘප්තිමත් නොවීම නිසා කියලයි මමනම් හිතන්නේ .

අරමුණක් නැතිව ප්‍රේම සබන්ධයක් ඇතිකරගත්තට පස්සේ අරමුණක් හොයාගන්න බැරි උනාම මේ අතෘප්තිමත් බව ඇතිවෙන්න පුළුවන් . ඒ නිසා තමන්ට ගැළපෙනවා කියලා හිතෙන වෙනත් කෙනෙක්ට ප්‍රේම කරන්න පටන් ගන්නවා . මේ නිසා කාලයක් තිබ්බ ප්‍රේම සබන්ධයක් නැතිවෙලා යන්න පුළුවන් .

මට අහන්න දකින්න ලැබුණු තවත් හේතුවක් තමයි දෙන්නගේ කුල ප්‍රශ්න . අද කාලේ මේවා නිසා ප්‍රේම සබන්ධතා නැතිවෙනවා කියලා ඇහෙනකොට වෙලාවකට පුදුමත් හිතෙනවා . ඒත් එහෙම වෙනවා .

විදේශ ගතවීම් නිසාත් සමහරවිට ප්‍රේම සබන්ධතා නවතින්න පුළුවන් . මොකද විදේශ ගත උනාම සමහර අයට දකින්න කතා කරන්න ලැබෙන්නේ නෑ . ඒ නිසාම ජීවිතයේ ඇතිවෙන අතෘප්තිකර ස්වභාවය නිසා වෙනත් සම්බන්ධයකට යොමු වෙන්න හෝ තියෙන සබන්ධය නැතිවෙන්න ඉඩ තියෙනවා .

සමහර ප්‍රේම සබන්ධතා ඇනහිටින්න හේතු වෙන්නේ දෙන්නගේ තියෙන සංස්කෘතික වෙනස්කම් . මුලින් ප්‍රේම සබන්ධයක් ඇතිකරගන්නකොට මේවා ගැන වැඩි තැකීමක් කරන්නේ නැහැ . ඒ නිසා පස්සේ තමයි තේරුම් ගන්නේ තමන්ට මේ කෙනා එක්ක ජීවිතය තියෙනකල් ජීවත් වෙන්න බෑ කියලා . ඒ නිසා ප්‍රේම සබන්ධය නවතිනවා .

ඔය ඔක්කොමත් හරි ගෙවල් වලින් අකමැති වීම නිසා සමහර ප්‍රේම සබන්ධතා නවතිනවා . මොකද අම්මලා තාත්තලා අකමැති වීම නිසා දෙන්නගෙන් එක්කෙනෙක් හෝ දෙන්නම අකමැති වෙන්න පුළුවන් මේ විදියට ගියොත් දෙන්නට එකතු වෙන්න බැරි නිසා ප්‍රේම සම්බන්ධය නවත්වන්න ඕන කියලා .

මේ වෙලාවේ මට තවත් කතාවක් මතක් වෙනවා . එක පවුලක පවුලේ වැඩිමල් පිරිමි ළමයා ප්‍රේම සම්බන්ධයක් ඇතිකර ගන්නවා . මේ සබන්ධය ඇතිවෙන්නේ පවුලේ එකම ළමයා වෙන ගැහැණු ළමයෙක් එක්ක . මේ පිරිමි ළමයාගේ අම්මාගේ කුලය සමාජ සම්මත විදියට පහත් කුලයක් කියලා අර ගෑණු ළමයාගේ අම්මලා තාත්තලා මේ විවාහය වෙනවට අකමැති වෙනවා . ඒ නිසා දෙන්නා වෙන් වෙනවා .

ඔය වගේ එක එක හේතු නිසා ප්‍රේම සබන්ධතා නවතින්න පුළුවන් . අද මම කියන්න යන ගීතයත් ප්‍රේම සබන්ධයක් නැවතුනු ගැහැණු ළමයෙක් තමන්ගේ පෙම්වතාගේ වෙන් වීම දරාගන්න බැරුව දෙවියන්ට කන්නලවු කරන ස්වරූපයෙන් රචනා වෙච්ච ගීතයක් .

මම දෙවිඳුනි දෙවොලට ආවේ
මම දෙවිඳුනි දෙවොලට ආවේ
බැති පූජා දෝතින් ගෙන දොවලා
ආවේ කතර ගෙවා
මම දෙවිඳුනි දෙවොලට ආවේ

කිමද සාමිනේ නිහඬව ඉන්නේ
නොඅසා මගේ විලාපේ
සඳුන් කපුරු පෙති මල් දම් ගොතලා
හිසින් දරාගෙන ආවේ
වට තිර අළුවී පුදසුන් ගිලිහී
දෙවියන් නෑ දේවාලේ

දෙදෙනා ආමග අත්වැල් පටලා
තනිවී මා වැලපෙන්නේ
ඔබේ අනුහස සරණ නොමැති දා
කාටද මා අයදින්නේ
සඳ ගිනි ඇවිලෙන මොහොතේ කෙලෙසද
හිරුගෙන් සිසිල පතන්නේ

ගායනය : සුජාතා අත්තනායක

තනුව :

ගී පද : උපාලි ධනවලවිතාන



 


මම දෙවිඳුනි දෙවොලට ආවේ
මම දෙවිඳුනි දෙවොලට ආවේ
බැති පූජා දෝතින් ගෙන දොවලා
ආවේ කතර ගෙවා
මම දෙවිඳුනි දෙවොලට ආවේ

කාලයක් තිස්සේ ටික ටික පරිපූර්ණත්වයට පත්වෙමින් ආව ආදර කතාවක නොසිතූ විරූ විදියට ලැබුණු දුක්ඛ දායක අවසානයක් . ඉතින් මේ දුක දරාගන්න පෙම්වතියට හිතේ හයියක් නෑ . ඒ නිසා තමන්ගේ දුක කියන්න පෙම්වතිය එනවා දෙවියන් වැඩ ඉන්න දේවාලයකට . බැති පූජා දෝතින් ගෙන දොවලා කියලා කියන්නේ දෙවියන්ට පූජාවක් තියලා තමයි තමන්ගේ මේ දුක කියන්න ඒ පෙම්වතිය බලාපොරොත්තු වෙන්නේ . සමහරවිට හිත නිදහස් කරගන්න වගේ දෙවියන්ට තමන්ගේ භක්තිය පෙරදැරි කරගත් පූජාවන් පූජා කරනවා වෙන්නත් පුළුවන් .

කිමද සාමිනේ නිහඬව ඉන්නේ
නොඅසා මගේ විලාපේ
සඳුන් කපුරු පෙති මල් දම් ගොතලා
හිසින් දරාගෙන ආවේ
වට තිර අළුවී පුදසුන් ගිලිහී
දෙවියන් නෑ දේවාලේ

පෙම්වතිය මේ වෙලාවේ බොළඳ වෙනවා කියලා හිතන්න පුළුවන් . මොකද කවදාවත්ම දෙවියන් තමන්ට ඇහෙන්න කතා කරන්නේ නැති නිසා . ඒත් පෙම්වතිය දෙවියන්ගෙන් ප්‍රශ්න කරනවා කිමද සාමිනේ නිහඬව ඉන්නේ නොඅසා මගේ විලාපේ කියලා . සඳුන් කපුරු පෙති මල් දම් ගොතලා හිසින් දරාගෙන ආවේ කියන්නේ තමන් තමන්ගේ පැමිණිල්ල දෙවියන් වෙනුවෙන් ඉදිරිපත් කරන්න ආවේ ඉතාමත් භක්තිමත්ව වඩාත්ම ගැලපෙන පූජා ද්‍රව්‍ය අරගෙන ආවා කියලා . මොකද ඉතින් දෙවියන් වෙනුවෙන්නේ සඳුන් කපුරු මදාරා මල් පිපෙන්නේ . දෙවියන් දැන් තමන්ගේ පැමිණිල්ල අහන්නේ නෑ කියලා පෙම්වතිය හොඳටම දන්නවා .ඒ  නිසා පෙම්වතිය හිතනවා තම ආව දේවාලයේ වට තිර දැවිලා පූජාසනය පසෙක වැටිලා දෙවියන් දේවාලයෙන් නික්මිලා යන්න ගිහින්ද කියලා .


දෙදෙනා ආමග අත්වැල් පටලා
තනිවී මා වැලපෙන්නේ
ඔබේ අනුහස සරණ නොමැති දා
කාටද මා අයදින්නේ
සඳ ගිනි ඇවිලෙන මොහොතේ කෙලෙසද
හිරුගෙන් සිසිල පතන්නේ

දැන් පෙම්වතිය තමන්ගේ බලාපොරොත්තුව , ඒ කියන්නේ දෙවියන්ට කියලාවත් තමන්ට සරණක් පිහිටක් ලබාගන්නවා කියන බලාපොරොත්තුව අත්හැර දමලා කියනවා ප්‍රේමයෙන් වෙලිලා දෙදෙනා ආමග අත්වැල් පටලා තනිවී මා වැලපෙන්නේ කියලා . ඔබේ අනුහස සරණ නොමැති දා කාටද මා අයදින්නේ ? , දෙවියන් පවා දේවාලයෙන් නික්මිලා ගිහින් තියෙන වෙලාවක වෙන කොහෙන්ද පිහිටක් සරණක් ලබාගන්නේ කියලා පෙම්වතිය කල්පනා කරනවා . අවසානය නැවතත් විප්පයෝගයම උරුම වීම තමයි කියලා පෙම්වතිය හිතාගන්නවා . මේ ගීතයේ මම කැමතිම කොටස තමයි සඳ ගිනි ඇවිලෙන මොහොතේ කෙලෙසද හිරුගෙන් සිසිල පතන්නේ කියන කොටස . මේ පද පේලියේ තේරුම නිසාම මම මේ ගීතයට තවත් තේරුමක් දෙන්න කල්පනා කරා වෙනස් ආකාරයක . ඒක උපමා උපමේය පිරිච්ච තේරුමක් වෙන්න පුළුවන් . එහෙනම් ගීතයේ මුල ඉඳලා අපි ආයෙත් බලමු ඒ මොකක්ද කියලා .







මම දෙවිඳුනි දෙවොලට ආවේ
මම දෙවිඳුනි දෙවොලට ආවේ
බැති පූජා දෝතින් ගෙන දොවලා
ආවේ කතර ගෙවා
මම දෙවිඳුනි දෙවොලට ආවේ

මේ ගීතයේ මේ කියන දේවාලය තමයි ප්‍රේමය කියන දේවාලය . ප්‍රේම දෙවොලේ ඉන්න දෙවියන් තමයි ප්‍රේමය කියන්නේ . මේ පෙම්වතිය ප්‍රේමය නැමති දෙවියන්ට කියනවා මම දෙවිඳුනි දෙවොලට ආවේ කියලා . ඒ කියන්නේ ප්‍රේමය කියන දෙවියන් අධිපතීත්වය දරන ප්‍රේමය හොයාගෙන තමනුත් ආවා කියන එක . ඒ කියන්නේ ප්‍රේම සම්බන්ධය ඇති වුනාට පස්සේ තමන් ප්‍රේම දෙවොලේ බැතිබර පූජාව පවත්වනවා කියන එක . බැති පූජා දෝතින් ගෙන දොවලා ආවේ කතර ගෙවා . ඒ කියන්නේ මේ ප්‍රේම දෙවොලේ බැතිබර භක්තිවන්තියක් වෙන්න මේ පෙම්වතිය ගොඩක් කැපවීම් කරා , ඒ වගේම සැලකිය යුතු කාලයක් ආවා කියන එක .

කිමද සාමිනේ නිහඬව ඉන්නේ
නොඅසා මගේ විලාපේ
සඳුන් කපුරු පෙති මල් දම් ගොතලා
හිසින් දරාගෙන ආවේ
වට තිර අළුවී පුදසුන් ගිලිහී
දෙවියන් නෑ දේවාලේ






දැන් මේ පෙම්වතිය කියනවා ප්‍රේමය නැමති දෙවියන්ට කිමද සාමිනේ නිහඬව ඉන්නේ නොඅසා මගේ විලාපේ කියලා . සඳුන් කපුරු පෙති මල් දම් ගොතලා හිසින් දරාගෙන ආවේ කියලා කියන්නෙ තමන්ගේ හිතේ තිබ්බ ප්‍රේමයේ තිබුණු අති උත්තම පාරිශුද්ධත්වය පෙන්නුම් කරන්න . වට තිර කියන්නේ තමන්ගේ ප්‍රේම සම්බන්ධය ආරක්ෂා වෙන්න තිබ්බ පවුරු බැමි . පුදසුන් කියන්නේ තමන්ගේ ප්‍රේම සම්බන්ධය වෙනුවෙන් තමන් ඉටු කරන්න බලාපොරොත්තුවෙලා හිටපු කැපවීම් ඉටුකරන්න තිබ්බ හොඳම අවස්ථා . දැන් පෙම්වතා නික්මිලා ගිහින් නිසා තමන්ට මේ හැමදේම නැතිවෙලා කියලා මේ පද පේලි දෙකෙන් අදහස් කරනවා කියලා මම විශ්වාස කරනවා . ඉතින් එහෙම වෙලා නිසා තමන්ගේ ප්‍රේම දෙවොලේ වැඩ උන්නු ප්‍රේමය නැමති දෙවියන් අදවෙනකොට නැහැ කියලා මේ පෙම්වතිය කියනවා . 

දෙදෙනා ආමග අත්වැල් පටලා
තනිවී මා වැලපෙන්නේ
ඔබේ අනුහස සරණ නොමැති දා
කාටද මා අයදින්නේ
සඳ ගිනි ඇවිලෙන මොහොතේ කෙලෙසද
හිරුගෙන් සිසිල පතන්නේ

මෙතන දෙදෙනා ආමග අත්වැල් පටලා කියලා කියන්නේ පෙම්වතා සහ පෙම්වතිය ආපු ජීවන මග ගැන . මේ මාවතේ දැන් පෙම්වතිය තනිවෙලා දුක්වෙනවා . ඉතින් මේ දුක ඇතිවෙන්නේ දේවත්වයෙන් තමන් පුදනු ලැබූ ප්‍රේමය නැමති දෙවියන්ගෙන් ලැබෙන ආශිර්වාදය ආරක්ෂාව දැන් නැති නිසා . තමන්ට ආරක්ෂාවක් රැකවරණයක් අවශ්‍ය උනොත් අනාගතයේ තමන් කාගෙන්ද පිහිට පතන්නේ කියලා පෙම්වතිය හිතින් හිතනවා . සඳ ගිනි ඇවිලෙන මොහොතේ කෙලෙසද හිරුගෙන් සිසිල පතන්නේ ? . මෙතන මම හිතන්නේ සඳ කියලා කියන්නේ පෙම්වතිය වෙන්න ඕන . හිරු කියලා කියන්නේ ප්‍රේමය වෙන්න ඕන . පෙම්වතියට දැන් ප්‍රේමය ගැන තියෙන්නේ සෘණාත්මක හැගීමක් . ඒ නිසා පෙම්වතිය හිතනවා තමන්ට ගින්දරක් ඇතිඋනාම තමන්ට ගින්දර දීපු ප්‍රේමයෙන් කොහොමද සිසිලක් ප්‍රාර්ථනා කරන්නේ කියලා .

ඉර තමයි හඳට ආලෝකය දෙන්නේ . පෙම්වතුන් මේ චන්ද්‍ර මඩුලු අතරේ තමයි ප්‍රේම කරන්නේ . ඒ ආලෝකය පෙම්වතුන්ට පෙම්වතියන්ට සිසිලක් . ඒත් එහෙමයි කියලා ඒ ආලෝකයේ පදනම වෙන ඉරෙන් කවදාවත් සිසිලක් ලබාගන්න බැහැ කියලා මේ ගීතය අවසාන කරනවා .


මේ ගීතය අහන්න පටන් ගත්තේ නොසිතූ වෙලාවක . වයලීනොගේ මෑණියන් නම් සුජාතා අත්තනායක මහත්මියගේ ගීත අහන්න ඉස්සර ඉඳලා කැමතියි . ඒ නිසා රේඩියෝ එකේ මේ ගීතය එහෙම යනකොට ටිකක් සද්දේ වැඩි කරලා අහනවා . ඒත් වයලීනොට එච්චර කැමැත්තක් තිබ්බේ නෑ . ඒත් දවසක් බලපු වීඩියෝ එකක් නිසා මේ ගීතය නොඅහා ඉන්න බැරි උනා . හේමපාල පෙරේරා මහත්මයා , ලංකාවේ දැනට ඉන්න දක්ෂතම බටනලා වාදය ශිල්පියා . එතුමා රාජකීය විද්‍යාලයේ " සග " වැඩසටහනක සෝලෝ එකක් විදියට මේ ගීතය වාදනයකරනවා ඇහුනා . සංගීත භාෂාවෙන් කියනවනම් ඒ වාදනය හරිම පර්ෆෙක්ට් විදියට වාදනය කරලා තිබුණා .

ඉතින් ඕක අහපුවෙලේ ඉඳලා වයලීනොත් බටනලාවක් හොයාගෙන ඔය ගීතයේ රස මුසු තැන් හොයාගෙන යන්න පටන් ගත්තා . ඉස්සර නම් මේ ගීතයේ සංගීතයට කැමති නිසා ඇහුවේ . ඒත් මේ අවුරුද්දේ දෙවිනුවර උත්පලවර්ණ ශ්‍රී විෂ්ණු මහා දේවාලයේ ඇසළ මංගල්‍යය පැවැත්වුණු දවසේ වයලීනෝ ගියා දෙවියන් වැඳ පුදලා වයලීනි දැකබලාගෙන එන්න . එදා දේවාලෙට යනකොට උදේ හතට විතර ඇති . එදා මිදුලේ ඉඳලා දේවාලය දිහා ටිකක් වෙලා බලාගෙන ඉන්නකොට මොන හේතුවක් නිසාද මන්දා මේ ගීතය මතකයට ආවා . එදා ඉඳලා මේ ගීතය ඉඳලා හිටලා අහලා බැලුවා . පස්සේ තමයි තේරුනේ මේක මේ නිකන්ම නිකන් දේවාලයකට ආව එක්කෙනෙක් නෙවෙයි කියන්නේ කියලා .



මේ ගීතයේ සංගීතය ගැනත් යමක් කියන්න තියෙනවා . මොකද මේ වගේ ස්වර ව්‍යුහයකට කොටු කරලා හදලා තියෙන ගීත කීපයක්ම අපි අහන නිසා . මට මේ ගීතය පාදක වෙලා තියෙන රාගය ගැන අහන්න ලැබුණේ මම දහය වසරේ ඉගෙනගන්න කාලයේ . අපේ ඉස්කෝලේ ස්වර්ණවාහිනි නාලිකාවෙන් කරපු සංගීත ප්‍රසංගයක් තිබුණා . සිංදුවා අයියත් මේ ප්‍රසංගයට ගායනයෙන් සම්බන්ධ උනා කියලා ලාවට මතකයි . ඉතින් මේ ප්‍රසංගයේ අපි ගායනා කරා නන්දා මාලනී මහත්මිය ගායනා කරන ප්‍රීතී ප්‍රීතී කියන ගීතය .



මේ ගීතයේ අතරමැද තියෙනවා බටනලාවකින් හරිම සංවේදී විදියට වාදනය කරන ආලාප කොටසක් . මේ කොටස වාදනය කරන වෙලාවේ අපේ සංගීත මිස්ගෙන් කෙනෙක් ඇහුවා මිස් මේ සිංදුව මොන රාගයටද යන්නේ කියලා . මිස් තමයි එදා කිව්වේ මේ ගීතයේ තනුව රචනා කරලා තියෙන්නේ ධර්භාරිකාණඩා කියන රාගයෙන් කියලා . ලෝ සැපතා මේ සංසාරේ කියන ගීතයත් මේ රාගයෙන් රචනා වෙලා තියෙනවා කියලා මිස් එදා කිව්වා මතකයි . ඉතින් ධර්භාරිකාණඩා කියන රාගය එදා ඉඳලා වයලීනොටත් සමීප උනා . බටනලාවට ගැළපෙන හොඳ රාගයක් තමයි මේ රාගය .

ස්වර ගැළපීම් එක්ක බැලුවම මේ ගීතයෙත් තනුව රචනා වෙලා තියෙන්නේ මේ ධර්භාරිකාණඩා කියන රාගයෙන් කියලා තේරුම් ගන්න පුළුවන් . ගීතයේ සංගීතය ගැන වෙනත් විස්තර කියන්න ඕන නෑ . සංගීතයේ ව්‍යුහය තේරුම් ගන්න කැමති අය මේ රාගයේ ගායනයක වීඩියෝ එකක් මම මුලින් දැම්මා , ඒක ප්ලේ කරලා බලන්නකෝ .

වයලීනොට ආයෙත් කැම්පස් එකේ එක්සෑම් ළඟ නිසා හරියටම මාසෙකට ආයෙත් මුකුත් ලියන්න වෙන්නේ නැහැ . වැඩ රාජකාරි ගොඩක් තියෙන වෙලාවක හදිසියේම අසනීප උන නිසා පාඩම් කරන්න ඔලුව නිරවුල් කරගන්නත් අමාරු නිසා ඇඳට වෙලා කරන්න වෙන වැඩකුත් නැති නිසා මේ ලිපිය කොටලා පබ්ලිෂ් කරන්න හිතුනා . එහෙනම් ආයෙත් මාසෙකින් ලිපියකින් හමුවෙමු .


ඔබ සැමට සමන් දෙවිඳුගේ පිහිට ලැබේවා !

ප්‍රේම සබන්ධතා ඇතිකරගැනීම සමහර අයට ලේසි දෙයක් , ඒත් සමහර අයටනම් අමාරු දෙයක් . ප්‍රේම සබන්ධතා ඇතිවීම හෝ ඇතිකරගැනීම වෙන්නේ වැඩි හරියක්ම ආකර්...