මෙහි එන නම් ගම් සියල්ල නමට පමණක් මනඃ කල්පිත ය . 21වන සියවසේ සබරගමුව පළාතේ සිදුවූ සත්‍ය සිදුවීම් ආශ්‍රයෙනි
( කියවන්න කලින් මේක ප්ලේ කරන්න )
" අවදිවන්න වොට්සන් අවදිවන්න "
ශීත ඍතුව අවසන් වුවද ඇඟ කිලිපොලා යන මෙවැනි දිනයක හෝ හෝම්ස් මාහට බ්ලැන්කට්ටුව පොරවාගෙන ඒ තුලට වී ගුලිවී නිදාගන්නට ඉඩ දෙන්නේ නැත . එය ඔහුගේ ස්වභාවයයි . විටෙක මාහට සිතෙනුයේ මොහු භාවිතා කරනා මත්ද්‍රව්‍ය නිසා ඔහුට නින්ද යන්නේ නැත්දෝ කියාය .
පෙර දිනයන් වලදී ඔහුත් මාත් විසඳන ලද ගැටළු කෙතරම් භිය ජනක නීරස ඒවා වුවද එම සමහර අවස්ථා වලදී මා ක්‍රියා කරන ලද්දේ හෝම්ස්ට වඩා වියරු වැටුණු දඩයම් බල්ලෙකු පරිද්දෙනි .
එවැනි අවස්ථා වලදී නම් මෙම අවධි කිරීම සිදු කරන්නේ මම විසිනි . එහෙත් රාජකීය දන්ත වෛද්‍ය පීඨයේ ඉගෙනගන්නා කාලයේ සිටම කුමන වැඩ රාජකාරි යෙදුනද ප්‍රමාණවත් නින්දක් ලැබීම මාගේ දින චරියාවේ කොටසක් විය . හෝම්ස් දැන් මා අවදි කරවන්නේ මාගේ තෘප්තිමත් නින්ද පිළිබඳව කිසිවක් නොදැන බව මා හොඳාකාරවම දනිමි .
" මට තව ටිකක් නිදාගන්න ඉඩ දෙන්න හෝම්ස් . අද හරිම සීතල දවසක් . මේ වගේ නිදාගන්න ලැබෙන්නේ කාලෙකින් . ඔබට මගෙන් යම්කිසි කටයුත්තක් ඉටුවීමට අවශ්‍යනම් ඔබට තිබුණේ මාගේ නින්ද කඩන්නේ නැතිව මා අවදිවනතුරු බලා සිටින්නයි .
සුප්‍රසිද්ද රහස් පරීක්ෂකයෙක් වන ඔබට අමතක උනා එහෙනම් මගෙ එලාම් ඔරලෝසුවේ වේලාව සටහන් කර තිබෙන්නේ කීයටද කියා බලන්නට . එහෙම නේද රහස් පරීක්ෂක තුමා . හරියටම තව පැය භාගයකින් මා අවදිවන්න තමයි සූදානමින් සිටියේ . කමක් නැහැ හෝම්ස් දැන් ඔබ මගෙ නින්ද කැඩුවේ ඇයි කියලා කියන්න බලන්න "
" විකාර කතා කියන්න එපා වොට්සන් . අද හරිම වැදගත් දවසක් . අද බේකර් වීදියට පය තියන්නේ ශ්රී ලංකාවේ ඉන්න අතිදක්ෂ මහාචාර්ය වරයෙක් . ඔහු සියලුම විද්‍යාවන් සහ අවිද්‍යාවන් පිළිබඳව පරතෙරට උගත් මහාචාර්ය වරයෙක් . පෙරේදා ඔහු මට දුරකථන ඇමතුමක් ලබා ගත්තා හදිස්සියේම මා හමුවන්නට ලන්ඩන් වලට එන වග කියමින් . ඔබත් එන්න ඕන වොට්සන් ඔහු සමග කරන සාකච්චාවට . මට ඔහු පැවසු ආකාරයට ඔහු බේකර් වීදියට එන්නෙ අපෙන් ලොකු සේවාවක් ලබාගන්න "
" මට ඔය මොන මහාචාර්යවරයා ආවත් මගෙ නින්ද වටිනවා හෝම්ස් "
හෝම්ස් එවිට සිනාසුනා පමණි . කෙසේ හෝ මහාචාර්ය වයලීනෝ යනුවෙන් හැඳින්වෙන්නේ ලංකාවේ ජීවත්වන එංගලන්තය ඇමරිකාව ඉතාලිය රුසියාව ප්‍රංශය ආදී යුරෝපා රටවල් මෙන්ම ජපානය චීනය අරාබිය වැනි පෙරදිග රටවල් පවා මහත් අභිමානයෙන් යුතුව කියවනු ලබන හස්තිනාපුර සහ අති පණ්ඩිත සිංදුවා මහාචාර්ය තුමාගේ මියැසියේ රසකතා බ්ලොග් අඩවියේ සාඩම්බර කතෘතුමාය .
ඔහු හෝම්ස් හමුවීමට මෙහි පැමිණෙන්නේ වැදගත් කරුණකට විය යුතුය . එබැවින් ඔහු උණුසුම්ව පිළිගැනීම හෝම්ස්ට මෙන්ම මටද වැදගත් කාරණයකි . මම බ්ලැන්කට්ටුව පසෙකලා ඇඳෙන් බැස කවදත් හෝම්ස් සහ විශේෂ අමුත්තන් හමුවන ඉදිරිපස සාලයට ගියෙමි .
" තව කොපමණ වෙලා තියෙනවාද හෝම්ස් , මහාචාර්ය තුමා පැමිණෙන්න "
" මට ඒ ගැන නිශ්චිතවම කියන්න බැහැ වොට්සන් . ලංකාවේ මත්තල කියන ගුවන්තොටුපලෙන් තමයි එතුමා ගුවන් යානයට නගිනවා කියලා කිව්වේ . ඒත් මත්තල ගුවන් තොටුපල අසල මොණරුන් ඉගිලෙන නිසා සමහර අවස්ථාවලදී ගුවන් මාර්ග අවහිර වෙනවා . වර්ණ සංඥා එළි අසල ගුවන් යානා නතර කරමින් මහාචාර්යතුමා රැගත් ගුවන් යානය එංගලන්තයට එනකොට සමහරවිට හවස් වෙන්නත් ඉඩ තියෙනවා වොට්සන් "
" හවස එන මනුස්සයා පිලිගන්නද හෝම්ස් ඔබ මාව මෙතරම් වේලාසනින් අවදි කලේ ? "
" නැහැ වොට්සන් අපිට අද රෑටම ලංකාවට යන්න සිද්ද වෙනවා කියලා මට විශ්වාසයි . මගෙ නිගමන වලට අනුව අද මහාචාර්ය තුමා එන්නෙ අප දෙදෙනා ලංකාවට කැඳවාගෙන යාමට බව මට තවදුරටත් විශ්වාසයි වොට්සන් "
" මේ වතාවේ මොකක් වෙන්න පුලුවන්ද හෝම්ස් ඔබ හිතන හැටියට ? "
" මේ මහාචාර්යතුමා මේ ළඟදි දිනයක ශ්රී ලංකාවේ තියෙන ශ්රී පාදස්ථානය කියන ස්ථානය ගැන ලිපි තුනක් ලියලා පල කරලා තියෙනවා . මම අනුමාන කරනවා එතුමා මේ එන්නේ ශ්රී පාදස්ථානයේ ඇතිවෙච්ච ගැටළුවක් නිරාකරණය කරගන්න කියලා . අපි බලමු මොකද වෙන්නේ කියලා වොට්සන් "
හෝම්ස්ගේ මුවින් පිටවන කෙල බින්දුවකද පැහැදිලි තේරුමක් ඇතිබව දාන්නා මා , හෝම්ස් එසේ කීමෙන් පසුව ලංකාවට ගොස් මාස කීපයක් ගත කිරීම සඳහා ඇඳුම් අසුරමින් මාගේ ගමන් මල්ල සූදානම් කලෙමි .
ටොක් ටොක් ටොක් ...............
දවල් දොළහ පසුවී විනාඩි තිහක් ගතවන්නට ඔන්න මෙන්න තිබියදී බේකර්වීදියේ හෝම්ස්ගේ නිවසේ දොරට කවුරුන් හෝ තට්ටු කරන ලදී .
" හෝම්ස් , මහාචාර්යතුමා විය යුතුයි ඒ දොර අසල සිටින්නේ "
" එහෙනම් ඔබ ගිහින් ඔහුව පිළිගන්න වොට්සන් "
මම එසැනින් ප්‍රධාන දොර අසලට ගොස් දොර විවෘත කලෙමි .
" ආයුබෝවන් මහත්මයා , මේ ඉන්නේ වොට්සන් දත් දොස්තර මහත්තයා වෙන්න ඕන . මම හරිද ? "
" ඔව් , ඔබතුමා මහාචාර්ය වයලීනෝ ? මමත් හරිද "
" හඃ හඃ හඃ ඔබත් හෝම්ස් මහත්මයාට දෙවෙනි නැහැ එහෙනම් . ඔව් මම තමයි මහාචාර්ය වයලීනෝ . ඔබව දැකීම සතුටක් . කියන්න , හෝම්ස් මහත්මයා අද නිවසේ ඉන්නවාද . මම ඔහුට අද මා එන වග කලින් දන්වලා තමයි මෙහි ආවේ "
" එන්න මහාචාර්ය තුමා , හෝම්ස් නිවසේ ඉන්නවා අද "
මා මහාචාර්යතුමා ඇතුලට කැඳවාගෙන එන විට හෝම්ස් තම පුටුවේ කකුලක් පිට කකුලක් දමා හිඳගෙන සිටියේය .
" බේකර් වීදියට සාදරයෙන් පිළිගන්නවා මහාචාර්ය තුමා "
" එහෙනම් ඔබ තමයි මා වසර ගණනාවක් තිස්සේ දකින්නට සිටි සුප්‍රසිද්ධ රහස් පරීක්ෂකතුමා "
" මිනිස්සු හැමවෙලේම ජීවත් වෙන්නේ ජීවිතය කියන පරීක්ෂණය කරමින් කියලා තමයි මා විශ්වාස කරන්නේ මහාචාර්ය තුමා . ඒ නිසා ඔබතුමත් පරීක්ෂකයෙක් වෙන්න පුළුවන් . කමක් නෑ , ඔබ තුමා හිතේ බොහොම කරදර ඇතිව ඉන්නවා කියලා මට පේනවා මහාචාර්ය තුමා . මොකද ඔබතුමාගේ සපත්තු දිහා බැලුවම මට පේනවා ඒවා සති දෙකකින් විතර ඔප දැමීමක් සිදු කරලා නැහැ .
ඔබතුමාගේ කබායේ බොත්තම් සියල්ලම හරියාකාරව දමා නැහැ . ගුවන්යානයේදී ඔබතුමාගේ කෑම පිඟානෙන් කෑම මොනවාහරි වැටිලා තියෙනවා කබාය මතට . ඒ කෑම වලට සෝස් බෝතලයකින් සෝස් වත්කරනකොට ඔබතුමා කල්පනාවෙන් නෙවෙයි වත්කරලා තියෙන්නේ . ඒ නිසා කෑම එකට සෝස් වැඩිපුර වැටිලා තියෙනවා . ඒ සෝස් තමයි ඔබතුමාගේ කබායේ දකුණුපැත්තේ පහල කෙලවරේ ගෑවිලා තියෙන්නේ . මම හරිද මහාචාර්ය තුමා ? "
" ඔබ සීයට දෙසීයක් නිවැරදියි හෝම්ස් මහත්මයා "
" ඔබතුමා මත්තල ගුවන් තොටුපළෙන් තමයි ගුවන් යානයට ගොඩවුනේ . ඒ ඇයි කියනවනම් ඒ වගේ සෝස් බෝතල් දෙන්නේ මත්තල තියෙන ගුවන් යානා වලින් . මට විශ්වාසයි ඔබතුමාට දෙතුන්වතාවක්ම ගුවන් සේවිකාවන් අමතන්න සිදු වුණා කියලා "
" ඔබ හරි අපූරුවට නිගමන වලට එළඹෙනවා හෝම්ස් මහත්මයා "
" ඔව් මහාචාර්ය තුමා එහෙනම් අපි කතා කරමු ඔබතුමාගේ ගැටළුව ගැන "
මේ කථාවට සවන් දෙන අතරතුරේ මම මහාචාර්යතුමාටත් හොම්ස්ටත් මටත් කොපි කෝප්ප තුනක් පිළියෙළකරගෙන ආවෙමි . කෝපි උගුරක් මුව තුලට ගත් මහාචාර්යතුමා එය ටිකෙන් ටික උගුරෙන් පහලට තල්ලු කරන අතරවාරයේ නිහඬ කල්පනාවකට යොමු වූ බවක් පෙනිණි . හදිස්සියේම ඔහු තම කටහඬ අවදි කළේය .
" හෝම්ස් මහත්මයා , මම ඉන්නේ රත්නපුරේ . රත්නපුරේ තියෙනවා සමනල කන්ද කියලා කන්දක් "
" ඔව් මහාචාර්යතුමා මම දන්නවා . ඒ කන්දේ ඔබතුමන්ලා වන්දනා කරන බුදුන් වහන්සේගේ ශ්රී පාද ලාන්චනය පිහිටවලා තියෙනවා කියලා මම දන්නවා . ඒ ගැන සියලු විස්තර මම ඔබතුමාගේ හස්තිනාපුර බ්ලොග් එකේ තිබිලා කියෙව්වා , ඉතින් ඔබතුමාගේ ප්‍රශ්නය කියනවනම් අපේ කාලය ඉතුරු කරගන්න පුළුවන් "
" බොහොම අගෙයි හෝම්ස් මහත්මයා . ඒ ශ්රී පාදස්ථානයේ තිබෙනවා අතීත රජවරු පූජා කරපු දොළොස් මහේ පහන කියලා පහනක් . තවත් ගන්ටාරයක් . මේ ස්ථානයට ලැබෙනවා ලොකු ආදායමක් . ඒත් අදවෙනකොට මේ සියල්ලම උඩු යටිකුරු වෙලා ගිහින් හෝම්ස් මහත්මයා . ඒ පහන රත්තරන් පහනක් . ඒත් අද තියෙන්නේ කළුගල් වලින් හදපු පහනක් . ගන්ටාරයත් වෙනස් කරලා .
ශ්රී පාදස්ථාන අරමුදල කියන ගිණුමට දැන් මුදල් එකතුවෙන්නේ නැහැ . ඒ බැංකු ගිණුමට මුදල් ඇතුල් කරලා නැහැ කාලෙකින් . මට ඔබතුමාගේ උදවු ඕන හෝම්ස් මහත්මයා මේ වෙන්නේ මොකක්ද කියලා හොයලා බලන්න . මම ආවේ ඔබලා දෙදෙනාව ලංකාවට එක්ක යන්න හෝම්ස් මහත්මයා . දැන් ශ්රී ලංකාවේ යහ පාලනයක් තියෙන නිසා වැඩිය බය වෙන්න උවමනා කරන්නෙත් නැහැ "
" හොඳයි . අපි අදම යමු ලංකාවට . වොට්සන් මගෙ රිවෝල්වරයට උණ්ඩ පුරවලා තියාගන්න . මගෙ අන්වීක්ෂය ඔබ රෝගීන්ගේ දත් පරීක්ෂා කරන්න යොදා ගත්තා . වහාම ඒ අන්වීක්ෂයත් රැගෙන යමු "
සියල්ල සූදානම් කරගෙන සිටි හෙයින් හෝම්ස් හා මා මහාචාර්යතුමා සමග ලංකාවට යාම සඳහා පිටත් වූයේ එම සාකච්චාව සිදු කර පැයක් පමණ හෝ ගතවීමට මත්තෙනි . ගුවන් යානයේ යන අතරවාරයේ මහාචාර්යතුමා අප දෙදෙනා හට ශ්රී පාදස්ථානය පිළිබඳව සියලු විස්තර හෙළි කරන ලදී . ඒවා අපගේ පරීක්ෂණ වලට මහත් උදව්වක් වන බව කියමින් හෝම්ස් මහාචාර්යතුමාට ස්තූති කළේය . ලංකාවට පැමිණ අප ගොඩ බසින ලද්දේ මත්තල ගුවන් තොටුපලටය .
මත්තල සිට මහාචාර්යතුමාගේ නිවසට එන අතරතුර මත්තල ගුවන් තොටුපල අසල වනාන්තරයේ සිටි වල් අලින්ගෙන් අප තිදෙනා රැගත් කාරය පරෙස්සම් වී තිබුණේ අප තිදෙනා පෙර කරන ලද පිනක් හේතුවෙන් බව මම ඉඳුරාම විශ්වාස කලෙමි . එක් අවස්තාවක මහාචාර්ය තුමා අලියා ඉදිරියට පැන මොනවාදෝ මුමුණා දකුණු අත අලියා දෙසට දිගු කලේය .
" මහාචාර්යතුමා මරණය ඉල්ලනවා වගේ නේද වොට්සන් ? "
හෝම්ස් පැවසුයේ එසේය . නමුත් මහාචාර්යතුමා අලින් එළවීමට කුමක්හෝ අද්භූත බලවේගයක් පාවිච්චි කරන බව මටත් හෝම්ස්ටත් අවබෝධ වී තිබිණි .
මහාචාර්යතුමාගේ නිවස පිහිටියේ රත්නපුර නගරය ආශ්‍රිතවය . එතුමාගේ නිවසේ දින දෙකතුනක් නැවතී සිටි අප දෙදෙනා මෙම භාරදූර කටයුත්තට මුල පුරන ලදී . පසුව මාසයක් පමණ සියල්ල අධ්‍යනය කිරීමෙන් පසුව ශ්රී පාදස්ථානයේ සිදු වූ අක්‍රමිකතා පිළිබඳ සවිස්තරව මහාචාර්ය තුමා දැනුවත් කලේ හෝම්ස් විසිනි .
" මහාචාර්ය තුමා , ශ්රී පාදස්ථානයේ නායක හාමුදුරුවරුන් පිළිබඳව මමත් වොට්සනුත් දීර්ඝ අධ්‍යනයක යෙදුනා . එක කාලයකදී ශ්රී පාදස්ථානයට නායක වෙලා හිටියේ නැදුන් ගස් වලට ප්‍රසිද්ද විහාරයක හාමුදුරු කෙනෙක් . උන්නාන්සේ ඉන්න කාලේ පැල්මඩුල්ලේ විහාරයේ හිටියේ වෙන හාමුදුරු කෙනෙක් . මේ දෙනමට තමයි ශ්රී පාදස්ථානයේ මුදල් ලැබෙන්නේ .
මොකද ඔබතුමාගේ ලිපිවල තියෙනවා දැක්කා ශ්රී පාදස්ථානයට වගේම පැල්මඩුල්ල විහාරයටත් ශ්රී පාදස්ථානයේ වත්කම් අයිති වෙනවා කියලා . ඉතින් මමත් වොට්සනුත් දින ගණනක් ගම බිම් වල ඇවිදලා මේ ගැන කරුණු එකතු කළා . අපි දෙන්නා ශ්රී පාදස්ථානය , බැංකුව , සමන් දේවාලය , පැල්මඩුල්ල රජමහා විහාරය ආදී සෑම තැනකම සොයමින් තොරතුරු එකතු කළා .
ශ්රී පාදස්ථානයේ තිබෙන සුදු හඳුන් සමන් දේව පිළිමයේ තියෙනවා මිනිස්සු ගලවලා දාපු රත්තරන් මාල . දවසක් මමත් වොට්සනුත් ශ්රී පාදස්තාන්යේ සමන් දේවාලයේ කපු මහතා පිටවනතුරු බලා ඉඳලා මේ සමන් දේව ප්‍රතිමාව හොඳට නිරීක්ෂණය කළා . මේ පිළිමයේ තැනක තියෙනවා යම් පලුද්දක් . පිළිමයේ පිට ආශ්‍රිත බෙල්ල ප්‍රදේශයේ තියෙනවා සීරීම් ලකුණු . මේ රත්තරන් මාල හදිස්සියට ගලවන්න ගිහින් වෙච්ච පලුදු වීමක් . ඒ වගේම සමන් දේව ප්‍රතිමාව බිම වැටුණු ලකුණක් පේනවා .
මේගැන කටකතාවක් පැතිරිලා තියෙනවා රත්නපුරේ මිනිසුන් අතරේ , රත්නපුරයට 2003 අවුරුද්දේ මහා ගං වතුරක් ආවේ මෙන්න මේ දේව ප්‍රතිමාව බිම වැටීම නිසා සිදු වුන දේව ශාපයක් නිසා කියලා . මම හිතනවා මහාචාර්ය තුමා මේ කටකතාව සහ පිළිමයේ තියෙන පලුදු වීම් අතර සම්භන්ධයක් තියෙනවා කියලා .
" එහෙනම් හෝම්ස් මහත්මයා බෙල්ලේ සීරීම් තුවාල ඇතිවුනේ කොහොමද ? "
" මහාචාර්ය තුමා , මේ හාමුදුරුවරු දෙදෙනා දේව ප්‍රථිමාවේ තියෙන රත්තරන් මාල ගලවගන්න පොරකන වෙලාවක දේව ප්‍රතිමාව බිමට පෙරලුණා කියලා මම නිගමනය කරනවා . ඒවගේම තමයි ඒ මාලවල තියෙන සවිමත් බව නිසා ඒවා අදිනකොට කැඩෙන්නේ නැති නිසා දේව ප්‍රතිමාවෙ බෙල්ල ප්‍රදේශය සීරීමකට ලක් වෙලා තියෙනවා "
" හොඳයි හෝම්ස් මහත්මයා . එහෙනම් කියන්න බලන්න ශ්රී පාදස්ථාන අරමුදලට එකතු වෙන්න ඕන සල්ලි දැන් කොහෙද යන්නේ කියලා "
" මහාචාර්ය තුමා මම ශ්රී පාදස්ථානයේ ඉන්න නායක හාමුදුරු කෙනෙක්ව දැකබලාගත්තා දවසක් . එතුමා ගැන තොරතුරු විශාල ප්‍රමාණයක් එකතු කරගත්තා ඒ නිරීක්ෂණ වලින් . මේ හාමුදුරුවෝ කාලයක් එක්තරා පන්සලක ඇබිත්තයා විදියට ඉඳලා තියෙනවා . ඒ කාලයේ බොහොම ඇඟ පත වෙහෙසවලා වැඩ කරන්න පුළුවන් මේ හාමුදුරුවන්ට . පන්සල පහල තියෙන කුඹුරේ වී ගෝනි පවා කරගැහුවේ මේ හාමුදුරුවෝ අබිත්තයා වෙලා ඉන්න කාලේ .
හොඳ උස මහත ඇඟක් තියෙන නිසා ලී කොටන් උස්සන්න වගේ දේවල් පවා මුන්නැහේ කරලා තියෙනවා . ඒත් මේ හාමුදුරුවෝ වැඩිය බන දහම් ඉගෙනගෙන නැහැ . වැඩිපුරම ඉගෙනගෙන තියෙන්නේ පෞරාණික වෙදකම . කොටින්ම කියනවනම් මහාචාර්යතුමා , වොට්සන් විසින් කරපු පරීක්ෂණ වලින් අපිට හෙළි උනා මේ හාමුදුරුවන් සර්ප විෂ වෙදකම හොඳින් ඉගෙන ගෙන තියෙනවා කියලා .
එයින් පස්සේ මේ හාමුදුරුවෝ ඇබිත්ත කමෙන් අයින් වෙලා මහන වෙලා ඉඳලා තියෙන්නේ පැල්මඩුල්ල රජමහා විහාරයේ . ඒ කාලයේ මේ පන්සලේ හිටපු නායක හාමුදුරුවෝ තමයි හාල්දඬුවන හාමුදුරුවෝ . මේ හාමුදුරුවෝ ඔත්පල උනාට පස්සේ මේ මහන වෙච්ච කෙනා තමයි සේරම ඇප උපස්ථාන කරලා තියෙන්නේ . ඉතින් ඊට පස්සේ මේ විහාරයේ නායක කම ලැබෙන්නේ ඒ හාමුදුරුවන්ට .
පස්සේ කාලෙකදී මේ හාමුදුරුවන්ට තවත් තානාන්තර ලැබෙනවා . මෙහෙම විස්තර හොයනකොට මහාචාර්යතුමා අපේ වොට්සන්ට දැනගන්න ලැබුණා ඉතාම රසවත් කතා දෙකක් . මම නිගමනය කරන්නේ මහාචාර්යතුමා මේ හාමුදුරුවෝ තාමත් ගිහි ජීවිතෙන් මිදිලා නැහැ කියලා . දවසක් මේ හාමුදුරුවෝ කලිසම් කමිස ඇඳගෙන ගිහින් තියෙනවා නිවිතිගල දෑල කියන ගමට . ඒ ගිහින් තියෙන්නේ ජීව විද්‍යාව ප්‍රායෝගික පාඩම් මාලාවක් ඉගෙනගන්න .
හැබැයි මේ හාමුදුරුවන්ට ඒවා හොරෙන් කරගන්න අවස්තාව ලැබුණේ නැහැ . දවසක් එහෙම ගිහින් එනකොට ගමේ කෙනෙක්ට අතටම අහු වෙලා තියෙනවා හාමුදුරුවෝ ගිහි ඇඳුම් ඇඳගෙන තොප්පියකුත් දාගෙන එනවා . ඔහු අඳුරගෙන තියෙනවා මේ එන්නෙ ශ්රී පාදස්ථානයේ නායක හාමුරු කෙනෙක් තමයි කියලා . ඒ නිසා අපි තවදුරටත් විමර්ශනය කරනකොට තමයි දැනගත්තේ මහාචාර්ය තුමා , මේ හාමුදුරුවන්ට නිවිතිගල දෑල ප්‍රදේශයේ පවුල් කීපයක් ඉන්නවා කියලා . ඒ පවුල් වල ළමයිනුත් ඉන්නවා කියලා වාර්තා උනා .
ඔබතුමාට කියන්න මහාචාර්ය තුමා , මේ හාමුදුරුවන්ට තවත් පවුලක් තියෙනවා . ඒ පවුලේ ඉන්නවා ගෑණු ළමයි කීප දෙනෙක් . මේ ගෑණු ළමයි හාමුදුරුවන් ඉන්න රජමහා විහාරයේ වාර්ෂික පෙරහැරේ නර්තනයේ යෙදෙනවා . එක දවසක් ගමේ ජීවත්වෙන පුද්ගලයෙකුගේ අතටම අහුවෙලා තිබෙනවා මේ හාමුදුරුවෝ ඒ ගෙදරට කැවිලි පාර්සලයක් ගෙනත් දෙනවා . පස්සේ තවත් දේවල් එහෙම ගෙනත් දෙනවා කියලා වාර්ථා වෙනවා .
මට දැන් කියවලා මහන්සි නිසා මහාචාර්ය තුමා ඉතුරු ටික මම වොට්සන්ට කියන්න භාර දෙනවා "
අනතුරුව මම සොයාගත් කරුණු මහාචාර්ය වයලීනෝ ඉදිරියේ ඉදිරිපත් කලෙමි .
" මහාචාර්ය තුමා . මම මේ බැංකු ගිණුම් අභිරහස විසඳන්න ගොඩක් වෙලාවට කරේ බැංකු ගිණුම්වල අතීත වාර්තා සහ ස්ලිප් කඩදාසි විමර්ශනය කරලා බලපු එක . එක අවස්ථාවකදී මම මේ ස්ලිප් කඩදාසි රසායනික විශ්ලේෂණයට පවා භාජනය කරා . ලැසේන් නිස්සාරකය පිළියෙළ කරලා මේ ස්ලිප් වල කාබනික සංඝටක පවා වෙන් කරා . මේ කඩදාසිවල තිබුණ විස්තර වල හැටියට කාලයක් තිස්සේ ශ්රී පාද අරමුදල නමින් පවත්වාගෙන එන ගිණුමට ශ්රී පාදස්ථානයේ නායක හාමුදුරුවෝ මුදල් බැර කරලා තියෙනවා .
ඒත් පස්සේ කාලෙකදී එක නායක හාමුදුරු කෙනෙක් ඒ ගිණුමට මුදල් බැර කරලා නැහැ . ඒ වෙනුවට කරලා තියෙන්නේ උන්නාන්සේගේ නමට තියෙන ගිණුමකට මුදල් බැර කරපු එක . ඒ නිසා දැන් ඒ මුදල් පෞද්ගලික මුදලක් වගේ තමයි තැම්පත්වෙලා තියෙන්නේ "
" බොහොම අපූරුයි හෝම්ස් මහත්මයා බොහොම අපූරුයි වොට්සන් මහත්මයා . අර රත්තරන් පහන ගන්ටාරය ගැන මොනවද ඔබතුමන්ලා හොයාගත්තේ "
" ඒකගැන මුකුත් හොයාගන්න උනේ නැහැ මහාචාර්ය තුමා . මේ රටේ හිටපු රජ කෙනෙක් ඒවාට වග කියලා ඇති කියලා තමයි අපි විශ්වාස කරන්නේ . . ඒත් ඉදිරි කාලයේ ඒවාට මොකද උනේ කියලා දැනගන්න ලැබේවි කියලා වොට්සනුත් මමත් විශ්වාස කරනවා මහාචාර්ය තුමා "
" ඔබතුමන්ලාට මේ වෙනුවෙන් කොහොම ස්තූති කරන්නද මන්දා . වොට්සන් මහත්මයා , පොඩ්ඩකට ඔබතුමාගේ දුරකථනයේ නීල දන්තය ඔන් කරන්න . මම මගෙ එක්ස්පීරියා ඇල් දුරකථනයෙන් ඔබතුමන්ලාගේ කථාව රෙකෝඩ් කරා . මම ඒක ඔබතුමන්ලාට නීල දන්ත කරන්නම් . එතකොට ඔබලාට පුළුවන් නැවතත් ඒක අහන්න "
" මහාචාර්ය තුමා මාරයිනේ "
" ඔවු හෝම්ස් මහත්මයා . මම මේගැන මගෙ හ්ස්තිනාපුර බ්ලොග් එකේ ලිපියක් ලියන්න තමයි ඉන්නේ "
" එහෙම ලියනවනම් මහාචාර්යතුමා අපිට කියන්න වෙන්නේත් , වෙනදා ඔබතුමා අපිට කියනවා වගේ "
ඔබටත් සමන් දෙවිඳුගේ පිහිට ලැබේවා කියලා තමයි
මෙහි එන නම් ගම් සියල්ල නමට පමණක් මනඃ කල්පිත ය . 21වන සියවසේ සබරගමුව පළාතේ සිදුවූ සත්‍ය සිදුවීම් ආශ්‍රයෙනි ( කියවන්න කලින් මේක ප්...
