නොපිට ගිය සොහොන් කාලි පූජාව ( 5 ) අවසාන කොටස

මෙහි එන නම් ගම් සියල්ල මනඃකල්පිතය
19 වන සියවසේ මුල් භාගයේ වැල්ලබඩ පත්තුවේ එක්තරා ග්‍රාමයක සිදුවූ සත්‍ය සිදුවීමක් ආශ්‍රයෙනි .

ස යු :- මන්තර , කන්නලවු සියල්ල කියවීමෙන් කිසිඳු දොසක් ඇති නොවේ . මන්තර සියල්ල වෙනස් කර ලියන ලද ඒවා වේ . කතාවේ නියම රසය විඳීමට ඒ සියල්ලම කියවිය යුතු බව මතක් කර සිටිමි .

පසුගිය කොටසින්


පසුව ඒවා එකින් එක ගෙන තටුවේ ඒ ඒ ගැබ් වල පිළිවෙලින් තැම්පත් කලෙමි . මට කලියෙන් සීයා පිළියෙළ කරන ලද තටුවේ වැඩ අවසන් වූ නිසා මා පිළියෙළ කල තටුවේ හරි වැරදි බැලීමට සීයා පැමිණියේය . එක් වරක් වැරදුණු මෙම ගුරුකම නැවත වරක් වරදවා ගැනීම නුවණට හුරු නැති බව සීයාද සිතන්නට ඇත .

සීයා සියලුම දේවල් නැවත පරීක්ෂා කර බලා අංජනම කඩුව සහ කිණිස්ස රැගෙන එන ලෙස මා පිටත් කළේය . ඒවා තිබුණේ බණමඩුවේ අපගේ කළමණා තබා තිබූ ස්ථානයේය . මම ඒ සියල්ල රැගෙනවිත් සීයාට දුනෙමි . සීයා පළමුව අතට ගත්තේ කිණිස්සයි . කිණිස්ස අතට ගත් හෙතෙම සියල්ලන්ම අමතා මෙසේ පැවසීය .

අද එතැන් සිට

" එකෙක් වරද්දගත්ත දේ නිසා ආයෙත් පාරක් වරද්දගත්තොත් අපි හැමෝටම මේකට බිලි වෙන්න වෙනවා කියලා මගේ හිත කියනවා . ඒ නිසා මේක ආයෙත් වරද්දගන්න මම කැමති නෑ . මම අකමැති උනාට බැහැ නෙව ඔය හැමෝමත් එහෙම වෙන්න ඕන . ඒකට කරන්න තියෙන්නේ තමාට පැවරිලා තියෙන රාජකාරිය ඒ ඒ වෙලාවට අකුරටම ඉෂ්ට කරන එක විතරයි . අර පැදුර ගෙනැල්ලා මෙන්න මේ හරියෙන් එලන්න . ඔය පිදේනි තටුවල තියෙන පන්දම් පත්තු කරාට පස්සේ ඒවායේ එළිය පැදුරට වැටෙන්න තියෙනවනම් තමයි වඩාත්ම හොඳ " 

" සීයේ අංජනමයි කඩුවයි ? "

" අංජනම තියන්න මෙන්න මේ කනප්පුව උඩ . කඩුව තියන්න සොහොන් කාලි යක්ෂනියට පුද දෙන තටුව උඩ " 

මම පන්සලේ කඩුව පිදේනි තටුව උඩ තබා අංජනම තවදුරටත් අතේම තබාගෙන සිටියෙමි . සීයා අංජනම තබාගැනීමට කුඩා කනප්පුවක් ඉල්ලාගත්තේ පන්සලේ පොඩි හාමුදුරුවන්ගෙනි . උන්වහන්සේ විටින් විට පැමිණ මේ සියල්ල වෙනුවෙන් අපට හැකි අයුරින් උපකාර කලහ . සවස කනප්පුව සෝදා කහදියර ඉස පිරිසුදු කළේය . දැන් එය අංජනම තැබීමට සුදුසු එකකි . නමුත් මම අංජනම එහි නොතබා අතේම තබාගෙන සිටියෙමි . 

මේ අතරතුර සීයාගේ විධානය අනුව ඇබිත්ත කොලුවා දම්වැල් පිටින්ම ඔසවාගෙන අවුත් පිදේනි ඉදිරියේ තබන ලද පැදුරේ තැබීය . ඔහුට තවම සිහියක් නැත . එහෙමයි කියා පරල වී කෑ ගසන්නේද නැත . බෙර ගසන්නන් සීරුවෙන් බලා සිටින්නේ බෙරය හැඬවීම කොයි වේලාවේ ආරම්භ කිරීම කළයුතුදැයි කියා සීයා විධාන කරන තුරුය . පසෙක , පන්සලේ පොඩි හාමුදුරුවන් එලන ලද සුදු පිරුවටයක් සහිත ආසනයක වැඩ සිටී .

මීට අමතරව ගමේ කීප දෙනෙකුම පන්සල් වත්තේ රැදී සිටී . උදව්වට අදාළ නොවන සියලු දෙනා පන්සල් වත්තෙන් පිටමං කරනවන ලෙස සීයා සියාතු සීයාට කිවේය . ඊට හේතුව වුයේ පෙරේත තටු සහ පිදේනි තටු තබන ස්ථාන වල අනවශ්‍ය ලෙස ගැවසීම අමනුෂ්‍ය දෘෂ්ටීන් වැටීමට ඉඩ කඩ සලසන බැවිනි . සියාතු සීයාගේ හඬට අවනත වූ ඔවුන් පන්සල් වත්තෙන් පිටත් වී ගියේය . දැන් වැඩ රාජකාරි ආරම්භ කිරීමට අවස්ථාවයි . 

" සියාතු මේ ඇබිත්ත කොලුවා නැගිට්ටම බඩට ආපත්ති වෙන මොනවා හරි කාලා ඉන්නවනම් ඒවා වමනේ කරවන්න පොවන්න පොල්ගෙඩි දෙකක විතර මිටි කිරි ඕන වෙනවා . ඊට පස්සේ යහමින් කන්න දෙන්න කිරි හොද්දක් එක්ක බතක් ඕන වෙනවා . ඒවා මෙහෙ හදලා හරියන්නේ නෑ . මොකද ඒවටත් යක්ෂ දිෂ්ටි වැටුනොත් . ඒ නිසා සියාතු වෙන ගෙදරකින් ඒවා හදවලා තියාගන්නනවනම් හොඳයි ඕන වෙලාවට කියලා ගෙන්න ගන්න පුළුවන් තැනකින් " 

" මම එහෙනම් අරනෝලිස් අයියේ අපේ ගෙදරින්ම ඒවා හදවලා තියන්නම් . මම ගෙදරට පණිවිඩයක් යවන්නම් " 

සීයා කහ වතුර පුරවා තබන ලද භාජනය අතට ගෙන පන්සල් වත්තේ දෙහි ගසෙන් දෙහි කොළ හතක් ඇති අත්තක් කඩා එයින් කහවතුර මුළු තොවිල් භූමිය පුරාවටම ඉසින්නට විය . පිදේනි තටු , පහන් පැළ පවා කහ වතුර බිඳිති වලින් පවිත්‍ර විය . අනතුරුව සීයා ගිනි දල්වන ලද කුඩා පන්දමක් රැගෙන පන්සල් වත්තේ හතරකොන සාදන ලද පහන් පැළ හතර වෙන සියාතු සීයාද සමග ගොස් දෙවියන්ට කන්නලව් කළේය . 

සාධු! සාධු!! දොහොත් මුදුනේ තබා වැඳ නමස්‌කාර කොට කියනුයේ ශ්‍රීමත් උතුම් ශ්‍රී විෂ්ණු දිව්‍යරාජෝත්තමයාණන් වහන්ස , ඔබ වහන්සේ වෛකුණ්‌ඨ පර්වතයෙහි ගුරුළු වාහනාරූඪව යහතින්ම ශ්‍රී ලංකාද්විපයත්, සම්බුධ ශාසනයත්, මුළු මහත් දඹදිවත්, ද්වීප සතරත්, දහඅට දේශයත්, සතරදේවාලයත්, , දෙවිනුවර උත්පලවර්ණ ශ්‍රී විෂ්ණු මහා දේවාලයත් දිවැස්‌ බලා වැඩ වදාරන්නා වූ උතුම් ශ්‍රී විෂ්ණු දේව දිව්‍යරාජෝත්තමයාණන් වහන්ස·. අසුර යුද්ධයෙන් මාර යුද්ධයෙන් විජය ශ්‍රී ලබා ලෝක සත්වයාට සෙතත් ශාන්තියත් ලබාදී වැඩ වාසය කරන ශ්‍රීමත් සිද්ධ ශ්‍රී විෂ්ණු දෙවි මහා රාජෝත්තමයාණන් වහන්ස මොහුට වැළඳී ඇත්තා වූ දේව දෝෂ යක්ෂ දෝෂ ඇස්‌වහ කටවහ හදි හූනියමකින් ඇතිවූ සියලු දෝසාන්ධකාර දුරුකර දෙවා වදාරා මේ අසරණයාගේ පිනට පිහිට වී පින් ගන්න සේක්‌වායි· ඔබ වහන්සේට කියා සිටින මේ කන්නලව්ව ඔබ වහන්සේගේ දිව්‍ය කර්ණයට වැටී දිව නෙතට පෙනී මොහුගේ සියලු අභිමතාර්ථයන් ඉෂ්ට කර දෙන සේක්‌වායි, ඔබ කීර්ති පස්‌වාන් දහසකට ආයු බොහෝ වේවා·ආයු බොහෝ වේවා·ආයු බොහෝ වේවා·!!!!!

සාධු! සාධු!! දොහොත් මුදුනේ තබා වැන්දෙම්, දෙපා වැන්දෙම්, ශ්‍රීමත් සිද්ධ තේජෝබල පරාක්‍රමාන්විත රණමයුර වාහනාරූඪව රක්‌තවර්ණ ශ්‍රී දේහයකින්ද · මුහුණු සයකින් · විචිත්‍ර නානාවිධ ආයුධ දොළසක්‌ අත් දොළොසේ දරා නිතර කන්දේ වැඩ වාසය කරන තෙද ඇති කතරගම දිව්‍යරාජෝත්තමයාණන් වහන්ස· කතරගමට කිරි වෙහෙරට, මැණික්‌ ගංගාවට, රුහුණු මාගම්පුරට, වැඩිහිටි කන්දට, මුන්නේශ්වරම් දේවාලයට, යහතින් දිවැස්‌ලා බලා වැඩ වාසය කරන සිද්ධ ස්‌කන්ධ නාමෝපලක්‌ක්‍ෂිත කතරගම දෙවි මහා රාජෝත්තමයාණන් වහන්ස· ඔබදෙවි හාමුදුරුවන් වහන්සේට අතනගා අයෑද සිටින්නේ මොහුට සිතින්, කයින්, භාරවීමකින්, අමතක වීමකින් මා අත යම් වරදක්‌ ඇතත්, ඔබ වහන්සේ සමා වී මා විසින් නමස්‌කාරයෙන් කියා සිටින අභිමතාර්ථයන් ඉෂ්ට කරදීමෙන්ද· ඇස්‌වහ, කටවහ, නවග්‍රහ හූනියමකින් වැද පැමිණි සියලු දොaෂ ගසා දුරු කොට පිනට පිහිට වී පින් ගන්නා සේක්‌වා· ඔබ කීර්ති පස්‌වාන් දහසකට ආයු බොහෝ වේවා ආයු බොහෝ වේවා ආයු බොහෝ වේවා !!!!!

තෙද වරම් පස්වාන් දහසකට බුදුවන්ඩ සිද්ද පත්තිනි දේව මාතවුනි . තවද මෙලොව සත්වාරයක් පහල වූ හෙයින් සත් පත්තිනි යන නමින් ප්‍රසිද්ද වන ඔබ දිව්යාන්ගනාවුන් වහන්සේ දෙමට මලෙන් නයි කඳුලෙන් ගිනි ජාලාවෙන් පිනි බින්දුවෙන් සිනා රැල්ලෙන් මවිත අඹෙන් මෙසේ සත් වාරයක් ලොව පහල වූ සත් පත්ත්තිනි දිව්යාන්ගනාවුන් වහන්ස.සුර ලොවින් අසුර ලොවට වරම් ලබා අසුර ලොවින් නාග ලොවට වරම් ලබා නාග මානවිකාවන් දසදහසක් පිරිවරා පුන්කලසක් ශ්‍රී හස්තයෙන් දරාගෙන පිහිටි දිව්‍ය මන්දිරාමානව නවගමුව හිමි දේවාලයට අධිගෘහිතව වැඩ වසන සිද්ද පත්තිනි දිව්යානගනාවුන් වහන්ස.ඔබ වහන්සේගේ දිව්‍යනුභව සිඳලමියි සිතා සක්‍ර දිව්‍ය රාජයෝ සුරලොවින් සතර පැත්ත කපා අට බොරදන් ගා එවූ මල කොස් කණුව පොරකවුලා දළු ඇද තුන් දුමාව පලගන්න වරම් දුන්නා සත්‍යවාදී සැබෑවිනම් පරංගි සමයක් කාරයන්ගේ යුද්දය තුන් මාසයක් කල්තියා දැනගෙන නවගමුව දේවාලයෙන් රුවන් සළඹ සත් නමක් මැදගොඩ ඇල්ලට ඇලිකිඹුලෙක් පිටෙහි වැඩමවා මැදගොඩ ඇල්ලෙහි කෙලිපුද ගන්න වරම් දුන්නා සත්‍යවාදී සැබෑවිනම් තවද ඔබ වහන්සේ අන්දුන්ගිරි පර්වතේ තපස් රකිනවා දැක සක්‍ර දිව්‍ය රාජයා මහලු වෙස්ගෙන අන්දුන්ගිරි පර්වතයට වැඩ නැගෙනියනි මට දානයක් දෙන්නයි කියූ තැනේදී කුමන දානයක්දයි අසු තැනේදී අන්දුන්ගිර පයින් පාගා මඩකර දියෙන් ගිනිගෙන බොජුන් තනා දෙන්නයි කිව තැනේදී අන්දුන්ගිර පාගා මඩකර සුවඳ ඇල් වි ඉස පැලකොට ගොයම් කපා වී කොටා පොලා දියෙන් ගිනි මොලවා සත් පැයෙන් දානය දී හමාර කර මතු බුදු වන්ඩ ප්‍රර්ථනා කර සක්‍ර දිවය රාජයාගේ ආනුභාවයෙන් පඬිපුර අඹ ගෙඩියෙහි පිළිසිඳ පඬි රජුගේ තුන් නෙතින් නළලෙහි නෙත මැකෙන්ඩ වරම් දුන්නා සත්‍ය වාදී සැබෑවිනම් තවද ස්වාමී පාලඟ මැරූ පඩිරජුගේ මාලිගාවට වැඩම කරවා තමා රක්ශාකල පතිදම් ශිලයෙන් වම තනය ඉරා ගලවා මාලිගාවෙහි පොලවේ ගසා පඬි රට ගිනිගන්නට සාප කල හෙයින් පඬිරට එක පෑමුක්කාලෙන් ගිනිගෙන අළු දුලි වන්නට වරම් දුන්නා සත්‍ය වාදී සැබෑවිනම් නම් මේ ආතුරයාආරක්ෂා කර දෙන්නට දැන වදාරා නවගමුව දිව්‍ය මන්දිරයෙහි චිරාත් කාලයක් වැඩවසමින් ලංකාද්වීපය දිව නෙතින් බලා වදාරන්නට සමා වෙනවයි ඔබ කිර්ති පස්වාන් දහසකට ආයුබෝවේවා ආයුබෝවේවා ආයුබෝවේවා !!!!!

ශ්‍රී සිද්ධ බල ඇති සමන්ත කූඨ පර්වතයේ වැඩවසන සුදු ඇත් වාහනයකින් ගමන් යන ශ්‍රී පාද පද්මයට අරක්‌ ගෙන එය ආරක්‍ෂා කරන මහාධීර වීර තේජාන්විත සුමන සමන් දිව්‍ය රාජෝත්තමයාණන් වහන්ස,

අප තිලෝගුරු අමා මෑණි බුදු රජාණන් වහන්සේ මණිඅක්‌ත නාරජුගේ ආරාධනයෙන් කැලණි පුරවරයට වැඩි ගමනේදී ඔබ වහන්සේගේ ඉල්ලීම පිළිගෙන වසර පන්දහස්‌ පන්සියයක්‌ ශ්‍රී ලංකාද්වීපයේ සම්බුද්ධ ශාසනය බැබළෙන බැව් දිව නෙතින් දැක සමන්තකූඨ පර්වත මස්‌තකට වැඩම කොට තමන් වහන්සේගේ ශ්‍රී පාද ලාංඡනය පිහිටුවා වදාලෙන් බුද්ධ ශාසනයට ඔබ වහන්සේගෙන් සිදු වූයේ ඉමහත් සේවයකි.

එවක්‌ පටන් ඔබ වහන්සේ ශ්‍රී පාදස්‌ථානය භාරව සිංහල දේශයත් බුද්ධ ශාසනයත් ආරක්‍ෂා කරනවා සත්‍යයයි. දොහොත් ඒ සත්‍යානුභාව බලයෙන් මුදුන්දී ඉල්ලා සිටින මෙම කන්නලව්ව ඔබ වහන්සේගේ දිවකනින් අසා දිව නෙතින් බලා අප වෙත බලපාන්නා වූ අණ විණ දෝෂාන්ධකාර යක්‍ෂ, භූත ප්‍රේත පිසාචාදීන්ගේ ඇල්ම, බැල්ම, විද්වංශනය කොට දී වාත පිත්ත සෙලෙස්‌මාදියෙන් වන දොෂාන්ධකාර ග්‍රහ දෝෂ හිරු දුටු පිනි මෙන් දූරී භූත කරවා ඔබ වහන්සේගේ පිහිටපතා වැඳවැටී අයදින්නා වූ අපගේ ඉල්ලීම් ඒ ආකාරයෙන් ඉෂ්ඨ සිද්ධ කර දෙන සේක්‌වා කිර්ති පස්වාන් දහසකට ආයුබෝවේවා ආයුබෝවේවා ආයුබෝවේවා !!!!!

පිළිවෙලින් පහන් පැළ හතර දක්වා ගමන් කල සීයා තමාට නියමිත රාජකාරිය අකුරටම ඉෂ්ට කරමින් කන්නලව් කරමින් සෑම පහන්පැලකම ඇති පහන් දැල්වීය . පහන දැල්වූ සීයා පිදේනි තටු අසලට පැමිණ සූනියම් දෙවියන්ට ආරාධනා කරන්නට කන්නලව්ව කියමින් මන්ත්‍ර මතුරන්නට විය .

....................................ඕං ඉන්ද්‍ර නීල සුර රාම දිෂ්ටි නීල හංස ඔඩ්ඩි මස්සිනේ වර වර චන්ද්‍ර සූර්ය දිෂ්ටි නීල වර්ණ දිෂ්ටියෙන් බබළ බබළා වරෙන් කල්ල කූඨ ධාරණී සුර රාම ඔඩ්ඩි මස්සිනේ මාගේ හදවතට ආරූඪව දිෂ්ටි වර වර ඔඩ්ඩියා නීල පාසාන් මා ගිලගන් මා රැකගන්න වර වර නමඃ ඕං රාම ඔඩ්ඩියා පරමේශ්වර කදිර නාරායනේ වර වර කල්ලු කූඨ මස්සිනා වර වර කාකා උපුට උපුටා වර වර මාදෙස බලා මහවිෂ්ණු ආනුභාවෙන් ඔඩ්ඩිමස්සිනේ හනුමා ලෝක ධාරණී වර වර ඔඩ්ඩියානේ මා ගිලගන් මා රැකගන්න වර වර නමඃ ඕං සුර ගුරුළු කල්ලු ගිනි විමානේ උපුට උපුටා වර වර ඔඩ්ඩියා ගර්ජනා කර මුහුදු හතේ කොදෙව් දෙදහසේ නොසිට වර වර ඔඩ්ඩි මස්සිනේ ස්වර්ණ දිෂ්ටි වැටී වර වර මස්සිනා මා ගිලගන් මා රැකගන් වර වර නමඃ ඕං ප්‍රලයං පං කාම රූපනී හං හං වං ත්‍ර එං එං මූර්තු කාකීල ඔඩ්ඩිමස්සිනේ වර වර පිල්ලු පෙරළුසුම් ශූල වර්ණ අවතාර හෙළා දිෂ්ටි වර වර බන්ද බන්ද අයිය ප්පුල්ලේ කල්ලු කූට විමානේ කරකැවි වර වර මස්සිනා උග්‍ර බිම්බේ මා ගිලගන් මා රැකගන්න වර වර නමඃ ඕං ගිනි අල්ලා බ්‍රාඩි හනුමන්තා ගිනි ගිනි විෂ්ණු වර වර ඉර බන්දු කාම රූපී යක්‍ෂණියන් පිරිවරා දඹදිව හිමාල වනය රන් තුඹස පිට වැඩ සිටගෙන මේ නරලොවට ගෙන්නූ ආනුභාවෙන් මා ගිලගන් මා රැකගන්න වර වර නමඃ ඕං හනුමන්තා හුලිංග මලේ කච්චින්තු දළපුර හස්ති කන්ද ස්වාමි අණින් එන්ඩ ඔඩ්ඩි මස්සිනේ වේලා පුරන්දා මා ගිලගන් මා රැකගන්න වර වර නමඃ ඕං ත්‍රිං ත්‍රිං අස්මාරී මහා බල ඔඩ්ඩි මස්සිනේ සාමානි එන්පුරන්දු ශ්‍රී විෂ්ණු ආනුභාවෙන් මා ගිලගන් මා රැකගන්න වර වර නම................................

සාධු සාධු සාධු..........................!

තෙදවරම් පස්වාන් දහසකට ආයු ලැබ ඉරන්ද නම් වනයේ අජාසත්ත පර්වතයේ යහතින් වැඩ සිටින සිරසමත ධවල ජටාවකින්ද සැඩපලු දහතුනකින්ද පොලොඟුන් දහතුනකින්ද රකුසු මුහුනකින්ද බඳවට නයින් ජාලයක්ද එක උරයක කරවැලුන් හතර දෙනෙක්ද සුරතට වඩිග කඩුවක්ද වමතට ගිනිකබලක්ද ගෙලවට නයෙකුද හිස සිට දෙපතුල දක්වා නාගයන් දෙදෙනෙකුද දරා දිවිසම් වතින් සැරසුන නිල්වන් දේහයකින් යුතුව නිල්වන් අසෙකු පිට පැන නැගී යක්ෂ රාක්ෂ නාග රාජ කුමාරාදී දස අවතාරයකින් පෙනී සිටින දස දෙස විපුල කීර්ති සත්‍යානුභාවයෙන්ද තවද මෙම ශ්‍රී ලංකාද්වීපයේ සහ එක්ලක්ෂ හතලිස්දහසක් ගණ කෝවිල්වලට යහතින් දිවස් ලූ කබලෑවට අරක් ගත් ඔඩ්ඩි වඩිග සිද්ධ සූනියම් දිව්‍ය රාජෝත්තමයානන් වහන්සේට දෙපා වැඳ මා කරන කන්නලවුව ඔබගේ දිව කනින් අසා දිව නෙතින් බලා ඔබවහන්සේ නමින් ඔප්පු කරන සුවඳ දුම් මල් පහන් පුද පූජා පිළිගෙන මේ ආතුර ප්‍රාණ කාරයන්ට වැදී ඇත්තාවූ සකලවිද උවදුරු දුක්ඛාන්ධකාරයන් දුරින් දුර නසා මොවුන් වෙත බැල්ම දිෂ්ටිලා විනකර අම්ලාකර සිටින්නාවූ යක්‍ෂ ප්‍රේත පිසාච කුම්භාණ්ඩ ආදීන් සැනෙකින් පලවා හැර සෙත් සාන්තිකර සකල රෝගාබාද ධූරීභූතකර ආයු රක්ෂාකර දී වැඩ වදාරන සේක්වා !!!

ශිව මස්තු නමෝ රාමඃ
කන්ධ සේනා සමාගමඃ
වඩිගතන්ත්‍ර මණී කණ්ඨ
ඔඩ්ඩි මංගල නමෝ නමඃ

සීයා මන්තර මතුරා කන්නලව් කර සියල්ල අවසානයේ පන්සලේ පොඩි හාමුදුරුවන් ලවා සෙත් පිරිත් දේශනාවක් සිදුකරවා දෙවින්ට පිං අනුමෝදන් කරවීය . අනතුරුව අංජනම ඇරීම සඳහා මන්තර මතුරා අංජනම ඇරීය . අංජනම සහිත කනප්පුව ඉදිරියේ මා හිඳුවා මන්තර මතුරනවිට අංජනම පැහැදිළි වී හනුමන්තා දෘශ්‍යමාන විය . අනතුරුව සීයාගේ විධානයෙන් බෙර වාදනය ආරම්භ විය . රාත්‍රී දහය පමණ වී ඇතත් පන්සලේ ඇසෙන මෙම බෙර ශබ්දය කුමක්දැයි කියා විමසා බැලීමට ගමේ මිනිසුන් විටින් විට එන්නට පටන්ගත් හෙයින් පන්සලේ ගේට්ටුව අසල කෙනෙකු රඳවා තැබූයේ ඔවුන් නැවත හරවා යැවීමටය . දැන් සියල්ල සූදාන්නම්ය . කාලි අම්මාගේ දිෂ්ටිය ගෙන්වාගැනීමට මන්ත්‍ර පිරීම දැන් ආරම්භ විය යුතුය . ඊට පෙර සීයා මා අමතා මෙසේ පැවසීය .

" පුතේ මම මන්තර මතුරනකොට අංජනමෙන් පෙනෙයි සොහොන් කාලි අම්මා මෙතනට වඩිනවද නැත්ද කියලා . ඒ වගක් දැක්ක ගමන් පුතා මට කතා කරලා කියන්න ඕන හොඳද ? "

" හා සීයේ "

සීයා සොහොන් කාලි අම්මා වෙත දීමට සකසා තිබුණු පිදේනි තටුව අසල කුඩා බංකුවක් තබා හිඳගෙන දුම්මල කුඩු සහිත භාජනය කෙනෙකු ලවා තමා අසලට ගෙන්වා ගත්තේය . කුඩා පන්දමක් අතින් ගත් සීයා පිළිවෙලින් දිෂ්ටි මන්ත්‍ර මතුරා අවසානයේ සොහොන් කාලි අම්මා ගෙන්වා ගැනීමට මන්ත්‍රය මැතිරීම ආරම්භ කළේය . මේ දක්වා නිසොල්මනේ සිටි ඇබිත්ත කොලුවා පරල වී කෑගසන්නටද පටන් ගත්තේය .

...............මරුකාම හස්තිරේ වා වා නසී කොන්ඩු වාරුම් වර සොහොන් කාලි අම්මා හෙන ගිනි බන්ධන ඉඩහැරී එන්ඩ සොහොන් කාලී වා අඩා වා................
ආකාශ වාරුන් පාතාල වාරුන් වර සොහොන් කාලි අම්මා වඩිග බන්ධන ඉඩ හැරී එන් සොහොන් කාලී වා අඩා වා .....................
ඇසුර ගිනි රාක්ෂ සොහොන් කාලි  අම්මා රාම ශර බන්ධන ඉඩහැරී එන් සොහොන් කාලී වා අඩා වා ............
සත් ඉර සත්දන්ත කපාල කොන්ඩු විෂ්ණු දළ කඩවර වර සොහොන් කාලි අම්මා පිල්ලි බන්ධන ඉඩ හැරී එන් සොහොන් කාලී වා අඩා වා.......................
සිවාකා මේ කා කා වාරුන් වර සොහොන් කාලි අම්මා රාම බන්ධන ඉඩ හැරී එන් සොහොන් කාලී වා අඩා වා ................
භාගිනි රාක්ෂයා වඩිග හඬ දැරූ ගිනි රාමයෙන් සොහොන් කාලි අම්මා තෙලිඟු බන්ධන ඉඩ හැරී එන් සොහොන් කාලී වා අඩා වා .........................
කල්ලු ගිනි රාක්ෂ දේව ගිනි නීල රාක්ෂ සොහොන් කාලී අම්මා විෂ්ණු බන්ධන ඉඩ හැරී එන් සොහොන් කාලී වා අඩා වා ........................
කයිරප්පාම් රාඩී වර සොහොන් කාලි අම්මා දෙවගිනි බන්ධන ඉඩ හැරී එන් සොහොන් කාලී වා අඩා වා ............
දේව කාම ගුරුළු නීල කොන්ඩු වැරුම් වර සොහොන් කාලි අම්මා දේව බන්ධන ඉඩ හැරී එන් සොහොන් කාලී වා අඩා වා ...................
ගුරු පේසා හැර ගිනි වඩිග කොන්ඩු වැරුම් වර සොහොන් කාලි අම්මා ජාල බන්ධන ඉඩ හැරී එන් සොහොන් කලී වා අඩා වා .................
සූර්ය නීලා කොන්ඩු ප්පේසා සීසා සොහොන් කාලි අම්මා තාරුකා බන්ධන ඉඩ හැරී එන් සොහොන් කාලී වා අඩා වා ......................
රන් ගිනි කුමාර අප්පොච්චී පාතාල නාග වාරුම් සොහොන් කාලි අම්මා චන්ද්‍ර බන්ධන ඉඩ හැරී එන් සොහොන් කාලී වා අඩා වා ....................
කදිර වා පාතාල සොහොන් කාලි අම්මා ග්‍රහ බන්ධන පිපිරී ඉඩ හැරී එන් සොහොන් කාලී වා අඩා වා ..............

මන්ත්‍රය ක්‍රම ක්‍රමයෙන් පැයක් පැය එකහමාරක් පමණ ජප කිරීම සිදුවීමෙන් අවසානයේ සොහොන් කාලි දිෂ්ටිය අප සොයා පැමිණියාය .

" සීයේ ඔන්න ඔතනින් අයින් වෙන්න සොහොන් කාලි අම්මා ඔය තටුව ගාවට ආවා "

සීයා වහා නැගිට අංජනම අසලට පැමිණියේය .

" එහෙනම් පුතේ සොහොන් කාලි අම්මාට පිදේනිය භාරගන්න කියන්න "

සොහොන් කාලි යක්ෂණිය තම පිදේනිය කැප ගත්තාය . එහි අඩංගු දේවල් අත් දෙකෙන්ම අල්ලා කටේ ඔබාගන්නා ආකාරය මම අංජනමෙන් දිටිමි . සැබවින්ම එය ඉතාම භයංකර දර්ශනයකි . බිත්තර කටේ දමා බිත්තර කටු පිටින්ම ගිල දමයි . කුකුලාගේ බෙල්ලෙන් අල්ලා දෙකට කැඩුවාය . එසැනින් මර ලතෝනි දෙමින් සිටි කුකුලා නිශ්ශබ්ධ විය . අංජනමෙන් පෙනෙන දර්ශනය සැබවින්ම දැකීමට කිසිවෙකුට වරම් නොතිබිණි . එය දෘශ්‍ය මාන වූ එක් අවස්ථාවක් නම් මෙම කුකුලා මිය යාමයි . සොහොන් කාලි දිෂ්ටිය මෙම පිදේනිය කැපගන්නා තුරු කිසිවෙක් ඒ සඳහා බාධා කලේ නැත . බෙර ගසන්නෝ සීයාගේ විධානය අනුව බෙර ගැසීම නවතා බල සිටියහ .

" සීයේ දැන් නම් පිදේනිය අරගෙන ඉවරයි වගේ "

" එහෙනම් අහන්න දැන් මේ අපේ සියාතු කරපු වරදට සමාව දෙන්න පුළුවන්ද කියලා ? "

" සීයේ සමාව දෙන්න පුළුවන් කියනවා . ඒත් එක දෙයකට පොරොන්දු වෙන්න කියලා කියනවා "

" අහන්න පුතේ ඒ මොකක්ද කියලා "

" සීයේ , සියාතු සීයාට ආයෙත් ගුරුකම් කරන්න තහංචියි කියලා කියනවා "

" සියාතු ? "

" අරනෝලිස් අයියේ ? "

" මොකද කියන්නේ ? කැමතිද ? "

" කැමතියි අරනෝලිස් අයියේ "

" එහෙනම් කැමතියි කියන්න පුතේ . දිෂ්ටිය අපිව අතෑරලා ගියා කියලා අපි කොහොමද දැනගන්නේ කියලා අහන්න "

" සීයේ , පන්සල් වත්තේ තියෙන අඹ ගහේ අත්තක් බිමට පාත් කරලා දාලා ඉවත් වෙන්නම් කියලා කියනවා "

" හොඳයි එහෙනම් "

බෙරකරුවන්ගේ බෙර වාදනය නැවත ආරම්භ විය . සීයා සොහොන් කාලි දිෂ්ටිය නවතන මන්ත්‍ර මතුරන්නට විය . මද වෙලාවක් යනවිට හමන සුළඟ ප්‍රචණ්ඩ වන බවක් පෙනී ගියේය . පන්සල් වත්තේ ඉදිරිපසට වන්නට සිටුවා තිබුණු අඹ ගසේ විශාල අත්තක් " බෝස් " හඬ නවමින් බිමට පතිත විය . සොහොන් කාලි දිෂ්ටිය යන්නට ගොසින්ය . තිබූ ලොකුම අවදානම අවසන්ය .

" මගේ සොහොන හදලා තියපල්ලා . තොපි සේරම මරණවා දැනගනිල්ලා . මම රජ්ජුරුවන් වහන්සේ එක්ක රජ මාලිගාවේ වැඩ කටයුතු කරපු නිළමේ . තොපි මගේ සොහොන ආයෙත් ගොඩනගාපියවූ...."

ඇබිත්ත කොලුවාගේ ශරීරයට නිළමේ තුමාගේ ආත්මය ආවේශ වී ඇත . එයද දැන් නිවැරදි කලයුතු ගැටළුවකි . අප සිතුවේ අබිත්තයාගේ ශරීරයට ආවේශ නොවී නිළමේ තුමාගේ දිෂ්ටිය වෙනමම ගෙන්වා ගැනීමටය . එහෙත් බන්ධනය කැඩී ඇබිත්ත කොලුවා ආවේශ වී ඇත .

" සියාතු , මේ නිළමේ තුමාව බන්ධනය කළා කියලා උඹ කිව්වා නේද ? "

" අරනෝලිස් අයියේ , ඒ බන්ධනයත් පූජාව අතපසුවෙලා නිසා කැඩිලා ගිහින් කියලා තමයි මම හිතන්නේ . මම අහගෙන හිටියා අරනෝලිස් අයියා කිව්ව මන්තර . ඒවාට අනුව මේ බන්ධනය ලේසියෙන්ම කැඩෙන්න පුළුවන් "

" හ්ම්ම්ම් , ඒකත් එහෙමද ? "

නිළමේ තුමාට කැප කිරීමට සාදන ලද පෙරේත තටුව අසල හිඳගත් සීයා ප්‍රේතයාට පිදේනිය කැප කිරීම සඳහා මන්තර මතුරා පිදේනිය කැප ගැනීමට අවසර දෙන ලදී . නිළමේ තුමාගේ ප්‍රේතාත්මය පිදේනිය කැපගන්නා ආකාරය මාහට අඳුන හරහා පෙනේ . ඔහුට නිළමේ කෙනෙකුගේ හුළඟක් හෝ වැදී  තිබුණු බක් නොපෙනේ . තටුවේ තබා ඇති ආහාර අත් දෙකෙන්ම රැගෙන කටේද මුහුණෙද හැම තැනම ගාගනිමින් කන අයුරු ඉතාම අප්‍රසන්නය .

පිදේනිය කැපගත් බව දැන්වූ පසු සීයා තම හඬ අවධි කළේය .

" නිළමේ තුමා දැන් බඩ කට පිරෙන්න කෑවද ? "

" ඔව් "

" එහෙනම් දැන් මේ ප්‍රාණකාරයා අතාරලා යන්න ඕන . අපිට කරදර කරන්නේ නැතුව "

" එහෙම බෑ . මේ මගේ වත්ත . මගේ කනත්ත තියෙන්නෙත් මෙතන . මමත් ඉන්නේ මෙතන . මගේ සොහොන හදලා දෙනකල් මම ප්‍රාණකාරයා  දාලා යන්නේ නෑ "

" තෝ දැනගනින් , තෝ මොන මහ නිළමේ කෙනෙක් උනත් මට කමක් නෑ . මම තෝව ගිනියම් වෙවී ඉන්න මතුරනවා . මතුරලා බෝතලේක දාලා හිර කරලා මුහුදේ දානවා දැනගනින් . මේ ඉඩමයි මේ ප්‍රාණ කාරයයි අතෑරලා යනවා හොඳයි මගේ යකා අවුස්සන්නේ නැතුව "

තමන් මෙතෙක් වූ මහන්සිය හා තෙහෙට්ටුව නිසාදෝ මෙවර සීයාට කේන්ති ගොස් තිබිණි . ඇබිත්ත කොලුවා නිහඬ විය .

" ගනින් ඔය කහ වතුර භාජනය "

උදව්වට සිටි අයෙකු ගෙනැත් දුන් කහ වතුර භාජනය අතට රැගෙන සීයා පැයක් පමණ නොනවත්වාම මැතිරුවේය . මන්ත්‍ර මතුරන අතර වාරයේ ඇබිත්ත කොලුවා නිළමේ තුමා ලෙස නැවතත් තම හඬ කළේය .

" අනේ මාව ගිනි ගන්නවා වගේ . මාව නිදහස් කරන්න . මට ඉන්න බැහැ . හතරවටින්ම මාව ගිනි ගන්නවා වගේ . මන්තර මතුරන එක නවත්තන්න . මම යන්නම් "

" දැන් තේරෙනවනේ ඔහේගේ මාන්නෙට වඩා මගේ මන්තරේ ලොකු විත්තිය . ඔහේ යන්නම් කිව්වට මට විශ්වාස කරන්න බැහැ . ඒ නිසා ඔහෙට නිදහසේ ඉන්න තැනක් මම පිළියෙළ කරලා දෙන්නම් "

සීයා දැන් සූදානම් වන්නේ නිළමේ තුමාගේ ප්‍රේතාත්මය කනත්තට රැගෙන ගොස් ඇණ ගැසීමටය . මෙවන් ප්‍රේත ඇණ ගැසීමකට කලින් වතාවකද මා සහභාගී වී තිබිණි . සීයා ප්‍රේතයින් ඇණ ගසන්නේ කනත්තකදීය . කනත්තේ ගසකට පෙරේත තටුව සමග ගෙනගොස් තබා එයට මතුරන ලද කහ දියර ඉසීමෙන් මෙම ඇණ ගැසීම සිදු කරනු ලබයි . එහිදී ප්‍රේතයා එම ස්ථානයට හිර වන අතර එම බන්ධන කඩා දැමීමෙන් පමණක් නැවත නිදහස් කිරීමට හැකියාව තිබේ . එය විශේෂ ගුරුකම් වලින් පමණක් සිදු කරනු ලබන නිසා නැවතත් ප්‍රේතයා පැමිණේය යන බිය කිසිවිටෙක ඇතිවන්නේ නැත .

" ළමයිනේ ඔන්න ඔය ඇබිත්ත කොලුවා පැදුරත් එක්ක ඔතාගන්න සොහොන් පිටියට අරගෙන යන්න . තව කීප දෙනෙක් මෙන්න මේ පෙරේත තටුව පෙරලෙන්නේ නැතිවෙන්න කරතියාගන්න . චූටි පුතේ ඔයා අංජනම වහන්න , මන්තර මතුරලා . පස්සේ අංජනම හාමුදුරුවන්ගේ අතට පරෙස්සමට තියාගන්න කියලා දීලා එන්න මාත් එක්ක කනත්තට යන්න "

මම අංජනම වැසීමට මන්තර මතුරා අඳුන වසා අඳුන් පෙට්ටිය හාමුදුරුවන්ගේ අතේ තැබීමි .

" හාමුදුරුවනේ . කිලි කුණු අහුවෙන්නේ නැතිවෙන තැනක තියන්න "

මම සීයා සමග කනත්තට යාමට පිටත් වීමි . කනත්ත පිහිටා තිබුණේ ගමේ පැත්තකය . පයින්ම ගමන්ගත් අපට පාර පෙන්වන ලද්දේ පන්දම් ආලෝකයයි . කනත්තට පිවිසි අප අවසානයේ නිලමේතුමාගේ ප්‍රාණය සහිත ඇබිත්ත කොලුවා බිම තබා පෙරේත තටුවද ඒ අසලින් තබා ඇණගැසීමේ කාර්යය ආරම්භ කලේය .

සීයා කහ දියර කලය මැතිරුවේය . මතුරා දෙහි කොළ ඇත්තෙන් ඇබිත්ත කොලුවාට කහ දියර ඉස්සේය .

" මාව හිර කරන්න එපා ! "

ඒ ඔහුගේ අවසාන වාක්‍යයයි . කහ දියර ඉසිත්ම හේ නිහඬ විය . සියල්ල සිදුකර හමාරය . ඉතිරි කහ දියර ටිකද සීයා ඇබිත්ත කොලුවාගේ ඇඟටත් පෙරේත තටුවටත් ඉස්සේය . ඉසේ ඉස එම කලය එතැනම පොළවේ ගසා තම කාර්යයේ අවසානය සනිටුහන් කළේය .

        

" එහෙනම් සියාතුවේ ඒ කාරියත් ඉවරයි . උඹ නිදහස් , ඇබිත්ත කොලුවත් නිදහස් . හාමුදුරුවන්වත් මැරෙන්න කලින් නිදහස් කරන්න තිබ්බා මේ වගක් කලින් දැනගෙන හිටියනම් . මොනවා කරන්නද . හාමුදුරුවන්ගේ පූරුවේ කරුමයක් වෙන්න ඇති "

සියාතු සීයා බිම බලා සිටියේ නිහඬවය .

" එහෙනම් හැමෝම ආයෙත් පන්සලට යමු . මේ ඇබිත්ත කොලුවට තාම සිහියක් ඇවිත් නැති හැඩයි . ඒකව පන්සලටත් අරගෙන යමු මේ අරගෙන ආවා වගේම "

අපි නැවතත් පන්සලට පැමිණියෙමු . සියල්ල සංසුන්ය . ඇබිත්ත කොලුවාගේ දම්වැල් සියල්ල ගලවා දැමීය . පසුව පැන් කලයක් මතුරා මුහුණට ඉස්සේය . ටිකෙන් ටික දෑස් විවර කල ඇබිත්ත කොලුවා වටපිට බලා මගේ බඩ රිදෙනවා වගේ කියා සෙමෙන් මිමිණුවේය .

ඔය පොල්කිරි භාජනය ගෙනෙල්ලා මේකට පොවන්න . සීයා ඇබිත්ත කොලුවාගේ හිස ඔසවා අල්ලගෙන පොල් කිරි සියල්ල එක  " හුස්මට බීපන් පුතේ " කියා පෙව්වේය . කිරි භාජනයේ භාගයක් පමණ බීගත් ඇබිත්ත කොලුවා බීගත් ප්‍රමාණයට වඩා වමනේ දමා පිට කළේය . දෙවෙනි වරටද මේ ක්‍රියාව කල පසු ඔහුගේ බඩේ තිබුණු ආපත්ති වූ සියලු ද්‍රවය ඉවත් විය . පසුව සියාතු සීයාගේ නිවසෙන් රැගෙන ආ කෑම භාජන ඔහු ඉදිරියේ තබ්බවා

" උඹට කමති තරමක් කාපන් පුතේ " කියා සීයා කීවේය .

ඇබිත්ත කොලුවා බඩ කට පුරා කෑවේය . ඔහුගේ කෑමත් සමගම සියලු කාරණා අවසාන විය .

" මේ සොහොන් කාලි පිදේන්නත් කනත්තට ගිහින් දාන්න . මේ යාතුකර්මයට ගත්ත අනිත් ගම දේම ගඟට දාන්න . කවුරුවත් මොකවත්ම ගන්න එපා හොඳද ? "

පසුව සීයා පහනකට තෙල් ස්වල්පයක් ගෙන ආරක්ෂා මන්ත්‍රයක් මතුරා එහි සිටි සියල්ලන්ගේම නළලේ තිලක තැබීය . හාමුදුරුවන්ගේ නළලේ පවා තිලක තැබීය .

පසුව පන්සලේ පොඩි හාමුදුරුවන්ට නමස්කාර කල මම සීයා සහ සියාතු සීයා ගත යුතු සියල්ල රැගෙන පන්සලෙන් නික්ම සියාතු සීයාගේ නිවසට පැමිණියෙමු . සියාතු සීයාගේ බිරිඳ අපට නිදාගැනීමට කාමරයක් පිළියෙළ කර තිබූ හෙයින් මුහුණ අත පය සෝදාගෙන සීයාද මමද නිදාගත්තෙමු . මෙතෙක් දවස් පුරාවට අප වූ මහන්සිය නිසාදෝ ඇඳට වැටුණු වහාම අප දෙදෙනාටම නින්ද ගියේය .

උදෑසන සීයාට ප්‍රථමව මම අවදි වීමි . අවදිවී මද වෙලාවක් සිටි මා සීයාට ඇහැරෙන නිසාවෙන් සද්ද ඇතිනොවන ලෙස ඇඳෙන් බිමට බැස සියාතු සීයාගේ නිවසේ සාලයට පැමිණියෙමි . සියාතු සීයා මා පැමිණෙන විට සාලයේ පැත්තක කොපි පොත් සහ පුස්කොල පොත් ගොඩක් වටේට තබාගෙන බලාගත් අත බලාගෙන සිටියේය .

" සියාතු සීයේ . මොකද මේ පොත් ටික එලියට ඇදගෙන ? "

" මම පොරොන්දු ඉෂ්ට කරන්න හදනවා පුතේ . මම ගුරුකම නවත්තනවා . මගේ හත්මුතු පරම්පරාවේම නමට මේ වෙච්ච දේ පරහකට හිටියා . අපේ තාත්තා සීයා මුත්තා කවුරුවත් ජීවිතයක් හානි කරගත්තේ නෑ ගුරුකම නිසා . ඒත් නායක හාමුදුරුවෝ අපවත් උනේ මම නිසා කියලා හිතෙනකොට මට හැමදේම එපා වෙලා ගියා "

" දැන් සීයා මොකද කරන්න හදන්නේ ? "

" ඉන්නකෝ සීයා නැගිට්ටම අපි කතා කරමු "

මම සියාතු සීයාගේ නිවසේ මිදුලට බැස වටපිට සෝදිසි කර බැලීමි . ඒ අතරවාරයේ සීයා අවදි වී මිදුලට ආවේය .

" සියාතු සීයා මන්තර පොත් ටික එළියේ දාලා තියෙනවා දැක්කා . සියාතු මට තවම මුණගැහුනේ නෑ . මොකද දන්නේ නෑ දැන් කරන්න හදන්නේ ? "

" ගුරුකම අතාරිනවා කිව්වා සීයේ "

සීයා දෑස් විශාල කර මාදෙස බැලුවේය .

" පොත් ටික එලියට ඇදගෙන මේ මනුස්සයා මොනවා කරන්න හදනවද දන්නේ නෑ . බලමුකෝ "

" සීය නැගිට්ටම කියන්නම් කිව්වේ "

ඒ අතර වාරයේ සියාතු සීයා මිදුලට පැමිණියේය .

" අරනෝලිස් අයියේ පොඩ්ඩක් ගේ ඇතුලට ආවනං "

" මොකද සියාතු ? "

" ආවනම් මම කියන්න මොකටද කියලා "

මමද සීයාද සියාතු සීයා සමග නිවාස තුලට පිවිසියෙමු . සියාතු සීයා අප කැඳවාගෙන ගියේ තමාගේ පොත් ගොඩ අසලටය .

" අරනෝලිස් අයියේ , මම තීරණය කරා මේවට නැවතුම තියන්න . මම පොරොන්දු වෙච්චි එකේ ආයෙත් මේවා කරන්න මට වරං නැහැ . මේ පොත් සේරම මගේ හත්මුතු පරම්පරාවෙන් මට උරුම වෙච්ච දේවල් . මට පුතාල නැති විත්තිය අරනෝලිස් අයියා දන්නවනේ . දුවත් දැන් ඉන්නේ එයාගේ මනුස්සයාගේ ගෙදර නිසා අපේ ගෙදර දැන් මේවා වෙනුවෙන් කවුරුවත් ඇත්තේ නැහැ . මෙච්චර ඉක්මනට මට මේවා නවත්තන්න වෙයි කියලා මම හිතුවේ නෑ . ඒත් දැන් නවත්තන්න කාලේ හරි . මම පාන්දර ගෙදර ආව වෙලාවේ ඉඳලා මේ පොත් සේරම පෙරල පෙරලා බැලුවා . පවුලෙන් පිටට දෙන්න බැරි පොත් කීපයක් තියෙනවා . මේ තියෙන්නේ ඒවා . මම ඒවාට දැන්මම ගිනි තියනවා "

සීයා නිහඬව බලා සිටියේය . සියාතු සීයා එම පුස්කොල පොත් මිටිය අතට රැගෙන අපත් සමග මිදුලට පැමිණියේය . ඔහුගේ දෙනෙතින් කඳුළු බිංදුවක් රූරා වැටෙනු මම දුටුවෙමි . මෙය පරපුරක අවසානය සනිටුහන් කරන අවස්ථාවක්හෙයින් මගේ සිතේ තදින්ම එම සිදුවීම් මාලාව සටහන්විය .

" අරනෝලිස් අයියේ . මට මේකට ගින්දර තියන්න අත ඉක්මන් වෙන්නේ නැහැ . මම වෙනුවෙන් , අපේ පරම්පරාව වෙනුවෙන් හිතේ කහටක් තියාගන්නේ නැතිව මේ පොත් ටිකට ගින්දර තියන්න "

සීයා කාගේ වුවද ගුරු කමට ගරු කරන පුද්ගලයෙක් බව මා දනී . එහෙයින් හෙතෙම එම පුස්කොල පොත් මිටිය අතට ගෙන සියාතු සීයාගේ මිදුලේ තබා දෑත් එක්කොට නමස්කාර කළේය . සියාතු සීයාගේ ඇස් දෙකෙන්ම කඳුළු කැට කඩා හැලුනද ඔහු අඬන්නට තරම් ලාමක පුද්ගලයෙකු නොවීය .

සීයා ගිනි කූර ගසා පොත් මිටියට ගින්දර තැබීය . පසුව කෝටුවක් ගෙන එම පොත් විසිරුවමින් ගිණිබත් වනතුරුම එහා මෙහා පෙරලීය . සියාතු සීයා එම රාජකාරිය අවසාන වන්නට මත්තෙන් නිවස තුලට පිවිසියේ තමා පන මෙන් මෙපමණ කාලයක් ආරක්ෂා කල මෙම පොත් ගිනි ගන්නවා බලා සිටීමට නොහැකි වූ හෙයින් විය යුතුය .

පොත් සියල්ල ගිනිගෙන අවසාන වීමත් සමගම සීයාද මමද නිවස තුලට පිවිසියෙමි .

" අරනෝලිස් අයියේ උදේ කෑම ලැස්ති කරලා තියෙන්නේ . මුණ කට හෝදගෙන ආවනම් "

මමද සීයාද මුහුණ කට සෝදා පිරිසිදු වී පැමිණ උදෑසන ආහාරය ගත් පසු සියාතු සීයා නැවත අප කැඳවීය .

" අරනෝලිස් අයියේ . මේවා ඔක්කොම මට නැති කරලා දාන්න හිත දෙන්නේ නෑ . මේ පොත් ටික අරනෝලිස් අයියා ගන්න . ඒවායේ තියෙන දේවල් මේ දරුවට උගන්නන්න . සමහර දේවල් අරනෝලිස් අයියගේ ගුරුකම් වලට වඩා මේ පොත් වල තියෙන ඒවා වෙනස් . ඒ නිසා මේවත් මේ දරුවට උගන්නන්න . අපේ පවුලේ නොවුනත් අරනෝලිස් අයියාගේ ගෙදර වගේ තැනක මේවා ආරක්ෂා වෙලා තියෙන නිසා මට හිත හදාගෙන මැරෙන්න පුළුවන් . බෑ කියන්නේ නැතිව මේ ටික භාරගන්න . මේ පොත් දාලා තිබ්බෙ පොඩි ලී පෙට්ටගමක . ඒකත් මම කරත්තයට පටවලා දෙන්නම් . අරනෝලිස් අයියා පෙට්ටගම පිටින්ම පොත් ටික අරගෙන යන්න "

" සියාතුවේ . මේ ගැන තව කල්පනා කරලා බැලුවනම් නරකද . මේ පළාතටම තව කෙනෙක් නැති එකේ කෙනෙක් පුහුණු පුරුදු කරලා උගන්නලා ගත්තනම් නරකද මම අහන්නේ . පවුලේ නොවුනත් විශ්වාස වන්ත කෙනෙක් නැද්ද මේවා උගන්නන්න ? "

" දැන් හැදෙන උන් විශ්වාස කරන්න බැහැ . අනික අයියේ මේවා උගන්නන්න ඕන ඒවා ලේ වලටම කාවැදිලා තියෙන කෙනෙක්ට . මේවා අරනෝලිස් අයියා භාරගන්න . ගිනි තිබ්බ ඒවා දෙන්න කොහෙත්ම විදියක් නැහැ , මොකද මම ඒවා ගන්නකොට පිටට දෙන්නේ නෑ කියලා පොරොන්දු උන නිසා . ඒ නිසා මේ ටිකවත් භාරගන්න . මම මගේ ඉඩකඩම් ටික බලාගෙන කුඹුරු කොටාගෙන ජීවත් වෙනවා "

" හොඳයි එහෙනම් සියාතු . සියාතුට මේ පුණ්‍ය කර්මය හේතු කරගෙන දුකක් අතුරු ආන්තරාවක් නැතිව ජීවත් වෙන්න වාසනාව දහිරිය ලැබෙන්න ඕන කියලා මම ප්‍රාර්ථනා කරනවා . චූටි පුතේ මට නෙවෙයි  , මේවා ඔයාට . සියාතු සීයාට වැඳලා මේ ටික භාර ගන්න "

" මම සියාතු සීයාට වැන්දෙමි "

ඔහු මගේ හිස අතගා

" මම දන්නවා පුතාට මේ ගුරුකමත් හොඳට පිහිටනවා කියලා . වගකීමෙන් වැඩකරන්න පුතේ . ජීවිතයක් කියන්නේ මහා වගකීමක් . අපිට හැප්පෙන්න වෙලා තියෙන්නේ පෙනෙන නොපෙනෙන ජීවිත අතරේ "

" හොඳමයි සීයේ . සීයාට ගොඩාක් පිං . පුළු පුළුවන් වෙලාවට සීයා වලව්වට ඇවිත් යන්න එන්න . අපිත් එන්නම් සීයා බලලා යන්න "

සියාතු සීයාගේ දෙනෙත දිළිසෙමින් තිබිණි . සියල්ල අවසානයේ සියාතු සීයා තම කාමරයේ තිබුණු පෙට්ටගම මාත් සමග සාලයට රැගෙනවිත් පොත් සියල්ල එහි පිළිවෙලකට අඩුක්කර පියන වසා අගුලු ලා යතුර මා අත තැබීය .

අනතුරුව සීයා සහ මම නැවත වලව්ව බලා පිටත් වීමට සූදානම් වීමු . වලව්වේ කරත්තකරු සමග සියාතු සීයා පොත් පෙට්ටගම කරත්තයට ඔසවා තැබීය . මම සියාතු සීයාගේ බිරිඳට වැන්දෙමි .

" ඔය පොත් ටික මෙයා පණ වගේ ආරස්ස කලේ දරුවෝ . අනේ මන්දා මේවා ඉතින් "

" ආච්චිඅම්මත් සියාතු සීයා එක්ක එන්න වලව්ව පැත්තේ ඇවිල්ලා ටික දවසක් ඉඳලා යන්න . බුදු සරණයි ආච්චි අම්මේ "

" බුදුසරණයි පුතේ "

සීයා සහ මම වලව්වේ කරත්තයට ගොඩ වූ අතර සියාතු සීයා ඔහුගේ කරත්තයට ගොඩ විය . සියාතු සීයාගේ නිවසට සමුදුන් අපි අනතුරුව ගමන් කලේ පන්සලටය . පන්සලේ පොඩි හාමුදුරුවන් අප පිළිගත්තේය .

" ගුරුන්නාන්සේ හැබෑම දක්ෂයෙක් කියලා ඊයේ තමයි මම දැනගත්තේ "

" ඒක සුළු දෙයක් හාමුදුරුවනේ . මම මේ ගම රට බලා යන්න කියලා . තකහනියෙම පන්සලට ගොඩවුණේ එක දැනමුතුකමක් දීලා යන්න . හාමුදුරුවනේ පුළුවන් නම් මේ නිළමේ තුමාට පිං අනුමෝදන් වෙන්න දානයක් දෙන්න . මොනවා උනත් මේ ඉඩකඩම් පන්සලට පූජා කරපු උත්තමයෙක් නෙව "

" ඒක ඇත්ත . මම මේ පන්සලට එහා ගමේ පන්සලේ දෙවෙනි හාමුදුරුවන් වැඩියයින් පස්සෙන් පහු ඒ වෙනුවෙන් දානයක් දෙන්නම් "

" කෝ හාමුදුරුවනේ ඇබිත්ත කොලුවා ? "

" ඔන්න දන් ගෙයි පැත්තේ හිටියා "

" අපි එහෙනම් ඒ පැත්තට ගිහින්ම බලන්නම් හාමුදුරුවනේ . අපිට යන්න අවසර "

" සුවපත් වේවා ! "

දන් ගෙට යනවිට ඇබිත්ත කොලුවා එහි හිඳ දවල් බුද්ධ පූජා බන්දේසිය පිළියෙළ කරමින් සිටියේය . සීයා දුටු හෙතෙම දිව විත් සීයාට වැන්දේය .

" ආ ඉලන්දාරියා දැන් ඇඟට අමාරුවක් එහෙම දැනෙන්නේ නැහැනේ නේද ? "

" නැහැ ගුරුන්නාන්සේ "

" හ්ම්ම් එහෙනම් අපි මේ ගම රට බලා යන්නය කියලා . අපි ගිහින් එන්නම් දරුවෝ . ඔය දරුවට බුදු සරණයි ! "

ඇබිත්ත කොලුවා නැවත සීයාට වැන්දේය . පසුව අප පන්සලේ දිවා බුද්ධ පූජාව පූජා කිරීමෙන් අනතුරුව හාමුදුරුවන්ගෙන් ආශිර්වාද ලබාගෙන පන්සලෙන් පිටත් වීමු . සියාතු සීයාද කරත්තය පසුපස පන්සලේ ගේට්ටුව තෙක් පයින් පැමිණියේය .

" සියාතුවෝ........................ මම උඹව මරණවා " ඒ ඇබිත්ත කොලුවාගේ කට හඬය . සියල්ලෝම හැරී එකවරම පන්සල දෙස බැලීය .

ඇබිත්ත කොලුවා ආවාස ගෙය ඉදිරිපස සිට සිනහවක් පෑවේය .

              කොටස් පහක් පුරාවට දිව ආ නොපිට ගිය සොහොන් කාලි පූජාව මෙසේ සමාප්ත කරමි .

මෙම කතා මාලාවේ ඊළඟ කතාව මලයාල නාග වෛරෝඩිය ලෙස නම් කරමි . 

( හැබැයි තවම හිතලා තියෙන්නේ නම විතරයි හරිය . ඒ නිසා කතාව එන්න තව කල් යයි ) 

( මියැසියේ රසකතා එක්ක දිගටම රැදී ඉන්න  ) 

හස්තිනාපුරය පැත්තටත් ගොඩවෙලා යන්න 

ඔබ සැමට සමන් දෙවිඳුගේ පිහිට ලැබේවා !