රත්තරන් කෙන්ඩියේ සිංහ තෙල්

මම ලියන කියන ගොඩක් ඒවා වලට ඉතින් මුල් වෙන්නේ මගේ ඉස්කෝලේ තමයි . මේකත් එහෙම කතාවක් . මම සාපෙළ ඉවරවෙලා මාස 6ක් විතර ගෙදර ඉඳලා උසස්පෙළට ඉස්කෝලෙට ගිය අලුතම අපිට සතියක වැඩකඩයක් තිබ්බා . ඒ කිව්වේ වර්ක්ශොප් එකක් . දවසින් දවස එක එක මාතෘකා වලට තමයි මේක පැවැත්වුනේ . සමහර දවස්වලට උදේ ඉඳන් හවස් වෙනකන්ම ඈනුම් අරිනවා .

එක දවසක් අපිට මේ වැඩකඩය මෙහෙයවන්න ඉස්කෝලේම ටිකක් ලොකු කෙනෙක් තමයි ඉදිරිපත් උනේ . මම හිතුවේ නෑ එතුමා ඒවගේ කෙනෙක් කියලා . මොකද එතුමා මහා නීති කාරයා . 

එතුමා අපිට ඉදිරිපත් කලේ සාර්ථක අධ්‍යාපනයක් ලබාගන්න කරන්න ඕන දේවල් කියාදෙන දේශනයක් . ගොඩක් සාර්ථක උනා ඒ දේශනය . මොකද හැම එකෙක්ම ඒක හොඳට අහගෙන හිටියා  . නිකමට වගේ එදා එතුමා කියපු කරුණු කාරණා ටික මම කොළ කෑල්ලක සටහන් කරගත්තා . ඒක ටිකක් හොඳයි වගේ කියලා පෙනුන නිසා මම ගෙදර ඇවිත් ඒක අයෙත් කොළ කෑල්ලක ලියලා මේස රෙද්ද යට තියලා තිබුණා . ඕක ඉතින් හිටපු ගමන් මම කියවලා බලනවා . ආයෙත් තියනවා . කොහොම හරි මේසෙ රෙද්ද මාරු කලත් 2008 මගේ අතට ආපු මේ කොලය තාම මගේ මේසෙ අතගැටෙන මානයේ තියෙනවා .

මේකේ ලියලා තියෙන ටික මම සටහන් කරනවා ඔන්න .

ඔබට උගත් බුද්ධිමතෙකුවීමට උවමනා නම් ,

ස්ථීර අරමුණක් තිබිය යුතුය .

ආත්ම විශ්වාසය තිබිය යුතුය .

දුප්පත් වේවි ,ලෙඩවේවි , වයසට යාවි කියන බිය නැති කරගත යුතුය .

විවේචනය කරාවි කියන බය නැති  නැති කරගත යුතුය .

පවුලේ කෙනෙක් . හිතවතෙක් තමන්ට නැති වේවි කියන බය නැති කරගත යුතුය .

මරණයට පත්වේවි කියන බය නැති කරගත යුතුය .

දැනුමෙන් පිරිපුන් විය යුතුය .

ඉතිරි කිරීමේ පුරුද්දක් තිබිය යුතුය .

වැඩක් තනිව කිරීමේ හැකියාවක් තිබිය යුතුය .

නිතරම ප්‍රබෝධමත්  විය යුතුය .

පවරන ප්‍රමාණයට වඩා වැඩියෙන් වැඩ කල යුතුය .

වැඩි කාලයක් ඉගෙනීමට යොමු කල යුතුයි .

ආරම්භ කල වැඩක් අවසන් කල යුතුයි .

විනය ආරක්ෂා කල යුතුයි .

මිතුරන් අත්හල යුතුයි .

කල යුතු දේ අමාරුවෙන් හෝ කල යුතුයි .

වෙලාවට වැඩ කල හැකි විය යුතුයි .

තමන්ගේ ගමනට භාධා කරන්නන් අත්හල යුතුයි .

විවේචනය කරන එක හරිම පරිස්සමෙන්  කරන්න ඕන දෙයක් . කෙනෙක්ව යහමගට ගන්න වගේම මේ විවේචන වලින් කෙනෙක්ව මානසිකව වට්ටන්න පුළුවන් . ඒ වගේම මරණයෙන් කෙලවරවෙන තරමේ ආරවුල් ඇතිවෙන්න පුළුවන් . සමහර අය ඉරිසියාවට එක එක්කෙනාව විවේචනය කරනවා . සමහර අය පුරුද්දට විවේචනය කරනවා . 

මේ වැරදි පුරුද්දෙන් එයාලට මිදෙන්න කවදාවත් බැරිවෙනවා . ඊට පස්සේ වෙන්නේ තමන්ට වැඩ කරන තැන උසස්වීම් නැතිවෙනවා , ආයතන ප්‍රධානීන්ගෙන් චෝදනා එල්ලවෙනවා , විවාහය දික්කසාදයකින් කෙලවර වෙනවා . ඔය ඔක්කොටම වඩා හපන් යාළුවො නැත්තටම නැති වෙනවා . ඒ නිසා විවේචනය කරනවා කියන එක හරිම පරිස්සමෙන් කරන්න ඕන .

ඒ වගේම තමයි විවේචන වලට මූණ දෙන එක , සමහර අය තවත් අය විවේචනය කරන්නේ තමන් තමයි මේ ලෝකේ තියෙන ඔක්කොම දන්න පුද්ගලයා කියලා හිතාගෙන . ඒත් කවදාවත් මේ ලෝකේ සියල්ලම ඉගෙනගෙන ඉවර කරන්න කාටවත් බෑ . කලාතුරකින් පහළවෙන බුදු කෙනෙකුට හැර . ඒ වගේ මහා ඥානයක් තියෙන උතුම් පුද්ගලයෙකුගේ චරිතයටත් විවේචන ආපු එකේ ඉතින් තව මොනවද ? නේද ?.

මට අර අපේ ඉස්කෝලේ දේශනයේ ඒ දේශකයා කිව්ව තව දෙයක් මතක් වෙනවා . කවදාවත් තමන්ව පහත් කරලා අනිත් අය එක්ක කතා කරන්න එපා . මම වැරදිද ? මම චාටර් නේද ? මම කලේ මහා බලු වැඩේ , වගේ කතා කරන්න එපා . ඒ වගේම තමයි තමන් කරන දේවල්වල වැරද්දක් කියනකොට සාවදානව අහන් ඉඳලා උත්තර දෙන්න ස්තූති කරන්න .

එයා තවතවත් වනයක් වගේ විවේචනය කරනවානම් පොඩ්ඩක් කරුණු පහදන්න . පිළිගන්නේ නැත්නම් මෝඩයෙක් කියල අතෑරලා දාන්න . ඒ වගේම නිහඬවම තමන්ගේ වැරැද්ද හදා ගන්න . තමන් කරන දේ හරිනම් ඒක දියුණු කරගන්න උපදෙස් දෙන අයගෙන් ඒකට උපදෙස් ගන්න . ඒ උපදෙස් ගන්නකොට හොඳට කල්පනාවෙන් කරන්න ඕන . තමන්ට විශ්වාස අයගෙන් විතරක් උපදෙස් ගන්න .

මම මේ කියන්නේ ඉතින් හැම කෙනාම නෙවෙයි . තමන්ට හොඳ නරක තේරෙන වයසකනම් ඉන්නේ අම්මා තාත්තා කියන දේවල් අහගෙන හොඳින් ඉන්න . එතකොට ඔය කාගේ කාගේ විවේචන ආවත් කිසිම අවුලක් නෑ . මොකද පිහිට වෙන්න අම්මා තාත්තා ඉන්න නිසා . 

අම්මලා තාත්තලාගේ කොන්ඩේ පැහුනේ අකලට නෙවෙයිනම් අම්මලා තාත්තලා සමාජය ගැන හොඳ දැනුමක් තියෙන අය වෙන්න ඕන . සමහර ගම්බද පොතපත  ඉගෙන නොගත් අම්මලා තාත්තලා  උනත් සමාජයේ ඉඳලා අපිට වඩා අත්දැකීම් වලින් පිරිපුන් වෙලා ඉන්න නිසා එයාල කියන දේවල් වරදින්න විදියක් නෑ  .  

කතාවක් තියෙනවා උගත් තරුණයා වැඩිහිටයෙක් කියලා . ඒ කියන්නේ ජීවිතයේ වැඩිපුරම වටින්නේ තමන් සමාජයෙන් ඉගෙනගත් අත්දැකීම .

බුදු හාමුදුරුවොත් කියලා තියෙන්නේ අත්තානංඋපමන් කත්වා නහනේයියනගාතයේ කියලා . තමන්ට තමාව උපමාවක් කරගන්න කියලා .

නැපෝලියන් හිල් කියන පුද්ගලයා රචනා කරලා තියෙන law of success කියන පොතේ තියෙනවා Golden law කියලා නියමයක් .

 “ අනුන් ඔබට කරනු දකින්නට නොකැමැති දෙය ඔබ අනුන් හට නොකළ යුතුය “  ඕක තමයි ඒ නියමය .

මේ ටික කියාගෙන යනකොට මට හොඳ ගීතයක් මතක් උනා . සිරිල් ඒ සීලවිමල මහතා රචනා කරපු වික්ටර් රත්නායක මහතා ගායනා කරන .

මෝහෙන් මුලා වෙලා මානෙන් උදම් වෙලා

තණ්හාව ක්‍රෝධ ද්වේශ පාරේ

මිනිසා කොහේද මේ

රත්තරන් කෙණ්ඩියේ සිංහ තෙල් වගේ  

මිනිස් ගුණේ සැමදා බැබලේ

එය රැකීම අප උරුමේ - වේ

කේළම් කීමෙන් ඕපදූපුයෙන්

රට කොටවන වැඩ අවදානම්

උඩින් මිතුරු වී යටින් හතුරු වී

උගුල් අදින්නා යයි දිය වී

බොරුවෙන් රට පිරිහේවී

මා හරි උගතා මා හරි ජගතා

සිතනා මිනිහා මෝඩයෙකී

අනුන් හෙළන්නට වලක් කපන්නා

ඒ තුළ වැටිලා මිය යන්නා

කළ දේ පල දේ එලෙසේ

අන්තිමටම කියන්න තියෙන්නේ තමන් කරන දේ හරි කියලා දන්නවනම් එක එකා කියන ඒවා කනට ගන්නෙපා කියලා .

තවත් ලිපියකින් හමුවෙමු .

ඔබ සැමට සමන් දෙවිඳුගේ පිහිට ලැබේවා !