සාමාන්‍යයෙන් නිවසක් ඉදි කරනවා කියලා කියන්නේ එසේ මෙසේ කරන්න පුළුවන් ලෙහෙසි පහසු දෙයක් නෙවෙයි . ඉස්සර කාලේ නිවෙස් ගැන සලකා බලනකොට සමහර නිවෙස්වල පරම්පරා ගණනාව අද වෙනකල්ම යහතින් ජීවත් වෙනවා දකින්න පුළුවන් . ඒත් සමහර නිවෙස් අපි දැකලා තියෙනවා ඒවායේ පරම්පරා දෙකක් තුනක් හොඳට ජීවත් වෙලා ඊට පස්සේ ඒ පවුල් අභාවයට ගිහින් තියෙනවා . ඒ නිසා වාස්තු විද්‍යාව කියන්නෙත් ජ්‍යෝතිෂ විද්‍යාව වගේම මනුෂ්‍යයාට බලපෑම් කරන විෂයක් .
ගල්යුගයේ ඉඳලා නිවාස ඉදිකරගෙන පදිංචි වීම දක්වා පැවතගෙන ආව නිවාස ඉදිකිරීමේ කාර්යය අද වෙනකොට නවීන විද්‍යාත්මක සංකල්ප එක්ක මිශ්‍ර වෙලා ඉතාමත් ඉහළ තත්වයකට ඇවිත් තියෙනවා . " වේද " කියලා කියන්නේ බාධා වීමක් හරස් වීමක් කියන තේරුම ඇතුව . වේද දෝෂ කියලා කියන්නේ නිවසේ පවතින වාස්තු සමතුලිතයට බාධා කරන බාහිර සාධක අනුව ඇතිවෙලා තියෙන වාස්තු සංකල්පයක් .
වේද දෝෂ කියන දෝෂ තුන්කල් දක්නා නුවණින් සෘෂිවරු විසින් නිර්මාණය කරලා තියෙන්නේ ඒ දෝෂ කොයි කාලයේ වුණත් කොයි ආකාරයෙන් වුණත් මිනිස්සුන්ට බලපෑම් කරන්න පුළුවන් හැකියාවක් තියෙන නිසා . අද කාලේ පාවිච්චි කරන කොන්ක්‍රීට් සහ කම්බි භාවිතා කිරීම නිසා මේ වාස්තු දෝෂ යම් ප්‍රමාණයකට අඩුවෙලා තියෙනවා . ඒත් ඒවායේ අනිසි බලපෑම යම් යම් ප්‍රමාණ වලින් මිනිස්සුන්ට බලපෑම් කරනවා කියලා අත්දැකීමෙන් හඳුනාගෙන තියෙනවා .
නිවාස ඉදිකිරීමේදී ඇතිවන වේද දෝෂ 14 - ජලනිර්ගමන වේද දෝෂය කියන ලිපිය යටතේ අපි සාකච්ඡා කරා ජලනිර්ගමන වේද දෝෂය කියන්නේ මොකක්ද සහ ජලනිර්ගමන වේද දෝෂය ඇතිවෙන්නේ කොහොමද කියලා . අද ලිපියෙන් කියන්නේ මාර්ග වේද දෝෂය කොහොමද ඇතිවෙන්නේ කියලා .
නිවසක ප්‍රධාන දොරටුවක් ඉදිරියෙන් හෝ ඒ ආසන්නයෙන්ම මහා මාර්ගයක් හෝ මහා මාර්ගයක වංගුවක් සහිත කොටසක් ගමන් කිරීම තමයි මේ මාර්ග වේද දෝෂය කියලා හඳුන්වන්නේ . මේ දෝෂයත් සරළ එකක් වගේ පෙනුනට ඇත්තටම මේ දෝෂය නිසා නිවසකට ඇතිවෙන බලපෑම වැඩියි .
මොකද මේ නිසා නිවසේ ඇතුල පිටත පාරේ සිටින අයට පේන නිසා . ඒ නිසා නිවසේ ආරක්ෂාවට , සභ්‍යත්වයට යම් යම් තර්ජන එල්ලවෙන්න පුළුවන් අවස්ථා මේ නිසා ඇතිවෙනවා . ඒ වගේම තමයි මේ දෝෂය නිසා නිවස ඇතුලට දූවිලි ඇතුළු වීමත් වැඩි වෙනවා .
මහා මාර්ගයක වංගු සහිත ප්‍රදේශයක් පිහිටලා තියෙන නිසා අනතුරු ඇතිවෙන්න පුළුවන් අවධානමක් තියෙනවා . ඒ අවධානම නිසා ගොඩක් වෙලාවට අනතුරක් බැරිවෙලා වත් උනොත් විසිවෙන වාහනයක් මේ නිවස පැත්තට එන්න ඉඩ තියෙනවා . ඒ නිසා නිවසම වුණත් විනාශ වෙන්න පුළුවන් ඉඩකඩක් තියෙනවා . ඒ නිසා හොඳම දේ තමයි මේවගේ ස්ථානවල ශක්තිමත් විදියට තාප්ප බැඳලා මේ දෝෂ තරමක් හෝ සමනය කරගන්න උත්සාහ කරන එක . ඊට වඩා හොඳම දේ තමයි මේ දෝෂය රහිත ස්ථානයක නිවසක් හදන්න ඉඩමක් තෝරාගන්නා එක .
තවත් ලිපියකින් හමුවෙමු .
ඔබ සැමට සමන් දෙවිඳුගේ පිහිට ලැබේවා !!
No comments:
Post a Comment