සාමාන්‍යයෙන් නිවසක් ඉදි කරනවා කියලා කියන්නේ එසේ මෙසේ කරන්න පුළුවන් ලෙහෙසි පහසු දෙයක් නෙවෙයි . ඉස්සර කාලේ නිවෙස් ගැන සලකා බලනකොට සමහර නිවෙස්වල පරම්පරා ගණනාව අද වෙනකල්ම යහතින් ජීවත් වෙනවා දකින්න පුළුවන් . ඒත් සමහර නිවෙස් අපි දැකලා තියෙනවා ඒවායේ පරම්පරා දෙකක් තුනක් හොඳට ජීවත් වෙලා ඊට පස්සේ ඒ පවුල් අභාවයට ගිහින් තියෙනවා . ඒ නිසා වාස්තු විද්‍යාව කියන්නෙත් ජ්‍යෝතිෂ විද්‍යාව වගේම මනුෂ්‍යයාට බලපෑම් කරන විෂයක් .
ගල්යුගයේ ඉඳලා නිවාස ඉදිකරගෙන පදිංචි වීම දක්වා පැවතගෙන ආව නිවාස ඉදිකිරීමේ කාර්යය අද වෙනකොට නවීන විද්‍යාත්මක සංකල්ප එක්ක මිශ්‍ර වෙලා ඉතාමත් ඉහළ තත්වයකට ඇවිත් තියෙනවා . " වේද " කියලා කියන්නේ බාධා වීමක් හරස් වීමක් කියන තේරුම ඇතුව . වේද දෝෂ කියලා කියන්නේ නිවසේ පවතින වාස්තු සමතුලිතයට බාධා කරන බාහිර සාධක අනුව ඇතිවෙලා තියෙන වාස්තු සංකල්පයක් .
වේද දෝෂ කියන දෝෂ තුන්කල් දක්නා නුවණින් සෘෂිවරු විසින් නිර්මාණය කරලා තියෙන්නේ ඒ දෝෂ කොයි කාලයේ වුණත් කොයි ආකාරයෙන් වුණත් මිනිස්සුන්ට බලපෑම් කරන්න පුළුවන් හැකියාවක් තියෙන නිසා . අද කාලේ පාවිච්චි කරන කොන්ක්‍රීට් සහ කම්බි භාවිතා කිරීම නිසා මේ වාස්තු දෝෂ යම් ප්‍රමාණයකට අඩුවෙලා තියෙනවා . ඒත් ඒවායේ අනිසි බලපෑම යම් යම් ප්‍රමාණ වලින් මිනිස්සුන්ට බලපෑම් කරනවා කියලා අත්දැකීමෙන් හඳුනාගෙන තියෙනවා .
නිවාස ඉදිකිරීමේදී ඇතිවන වේද දෝෂ 12 - රාජ වේද දෝෂය කියන ලිපිය යටතේ අපි සාකච්ඡා කරා රාජ වේද දෝෂය කියන්නේ මොකක්ද සහ රාජ වේද දෝෂය ඇතිවෙන්නේ කොහොමද කියලා . අද ලිපියෙන් කියන්නේ පංක වේද දෝෂය කොහොමද ඇතිවෙන්නේ කියලා .
මේකත් සරළ වේද දෝෂයක් . පංක වේද දෝෂය ඇතිවෙන්නේ නිවසක ඉදිරිපස දොරටුව ආසන්නයේ විශාල මඩවලක් පිහිටීම නිසා . නිවස සෑදීමෙන් අනතුරුව මූලික බිම් සැකැස්ම අනුව බලනකොට නිවසේ ඉදිරිපස මඩ එකතුවෙන්නේ නැති විදියට මිදුල පිළියෙළ කරන්න ඕන . වතුර රැඳීම අඩු විදියට වතුර බැස්ම හදන්නත් ඕන . එතකොට මේ දෝෂය ඇතිවෙන්නේ නැහැ .
නිවාස ඉදිරිපස මඩ වළක් තියෙනකොට විසබීජ එකතුවීම වැඩියෙන් වෙනවා . ඒ විසබීජ වාතය ඔස්සේ නිවසට ඇතුළු වෙනවා වගේම තමයි කකුළට පෑගිලා එන මඩත් එක්ක විසබීජ නිවසට ඇතුළුවෙනවා . මේ නිසා ඇතිවෙන සෞඛ්‍ය ගැටළු නිසා නිවසේ ප්‍රශ්න වැඩි වෙනවා .
ඒවගේම තමයි මේ ගැටළුව නිසා උදේම ගමනක් යනකොට මඩ පෑගිලා තමන් අපහසු තාවයට පත් වෙනවා . නිවසට ඇතුළු වෙන්න කලිනුත් මඩ පෑගිලා තමන්ට පිළිකුල් සහගත තත්වයක් ඇතිවෙනවා . ඒ නිසා මේ දෝෂය වළක්වාගෙන තමයි නිවසක් හදනවානම් හදන්න ඕන .
පහත් බිම් ගොඩ කරලා නිවාස හදන අය ඒ පහත් බිම ගොඩ කිරීම සම්බන්ධව ලොකු අධ්‍යනයක් විශේෂඥ අය ලවා කරවාගන්න ඕන . මොකද ඒ වගේ තැනක අසම්පූර්ණ ගොඩ කිරීම් කරලා නිවසක් හදනවානම් ඒ නිවසේ මිදුලේ පසුකාලීනව ගිලා බැසීම් වෙලා ඒ තැන්වල වතුර එකතු වෙන්න ඉඩ තියෙනවා .
මේ දෝෂය නම් මගහරවාගන්න සරළ විසඳුම් තියෙනවා . ඒ නිසා මේ වගේ දෝෂ තමන්ගේ නිවසේ තියෙනවානම් ඒවා ඉක්මණටම පිළිසකර කරගන්න .
තවත් ලිපියකින් හමුවෙමු .
ඔබ සැමට සමන් දෙවිඳුගේ පිහිට ලැබේවා !
No comments:
Post a Comment