සාත්තර ආතා ( 4 )

මෙහි එන නම් ගම් සියල්ල මනඃකල්පිතය

19වන සියවසේ මුල් භාගයේ වැල්ලබඩ පත්තුවේ එක්තරා ග්‍රාමයක සිදුවූ සත්‍ය සිදුවීමක් ආශ්‍රයෙනි .

පසුගිය කොටසින්

" හොඳමයි හාමුදුරුවනේ "

මම විහාරගෙයි යතුරද රැගෙන ගොස් විහාර ගෙයි දොර හැර එයාට ඇතුළු වුණෙමි . ඉතාම අලංකාර චිත්‍ර ඇඳ තිබුණු අතර හිඳි පිළිමයක් සහ හිටි පිළිම වහන්සේලා දෙනමක් එහි වැඩ සිටියහ .

විහාර ගෙයි චිත්‍රත් , පිළිම වහන්සේලාත් බලමින් වටයක් ගමන් කල මම විහාර ගෙයි දොරටුවෙන් දුටුවේ ඈත මිදුලේ සීයාත් තවත් කීප දෙනෙකුත් කොප්කොල අතු සහ කෙසෙල් කොටන් කීපයක් රැගෙන විත් කතා කර කර සිටින ආකාරයයි .

එය දුටු මම ඉක්මන් ගමණින් ගමන් කලේ සීයා ඉන්නා දෙසටය .

අද එතැන් සිට

" මෙන්න මෙතන තමයි තොරණයි පහන් පැලයි දෙකම හදන්න ඕන . තව එක පිදේනි තටුවක් තිබුනම ඇති . තව මට ඕනා කරන අඩුම කුඩුම දේවල් තියෙනවා . ඒවා මම කොලේක ලියලා දෙන්නම් . අකුරු කියවන්න දන්නා කෙනෙක් එන්න මාත් එක්ක " 

සීයා ඔහු සමග පැමිණ සිටි පිරිසට හූනියම කැපීම සඳහා අවශ්‍ය කරන ගොප්කොල තොරණ සහ පෙරේත පිදේනි තටු සැකසීම පිළිබඳව විස්තර කළේය . එම පිරිස අතර මෙම දේවල් සම්බන්ධව හසුරු කෞශල්‍ය ඇති කෙනෙක් අපට මුණගැසිනි . එනිසා කටයුතු වඩාත් පහසු විය . අනතුරුව එම දවසේ වැඩි වෙලාවක් මම ගත කරන ලද්දේ එම පිරිස සමගය . අපට අවශ්‍ය දේවල් ඒ ඒ ආකාරයෙන් සූදානම් කරගැනීමට ඔවුන් මෙහෙයවීමට සීයා මට උපදෙස් දුන්නේය .

සවස්වන විටදී බෙරගල මාමා පන්සලට පැමිණියේය . ඒ වලව්වේ කරත්තයෙනි . බෙරගල මාමා කරත්තයෙන් කෙලින්ම ආවේ පන්සලටය . ඒ නිසා ඔහුට ලැගුම් ගැනීමට පන්සලේම ස්ථානයක් සාදා දීමට පන්සලේ වැඩ බලනු ලබන හිමිනම විසින් කටයුතු සම්පාදනය කළහ .

ජේමිස් දවස පුරාවටම කරත්තය දක්කමින් එහාටත් මෙහාටත් ගමන් කල නිසා නිදිමතේ සිටි හෙයින් ඔහුද කරත්තය ලිහා දමා බෙරගල මාමාට ලැගුම් ගැනීමට සාදා දුන් ස්ථානයේ පසෙකින්ම හාන්සි විය . වැඩි වෙලාවක් යන්නට මත්තෙන් ඔහු ගොරවමින් නින්දට වන්නේය . එක් අතකට අප මෙන්මම ඔවුහූ සියල්ලෝද මෙම කාර්යයන් වලදී එකා මෙන් මහන්සි වෙති . එබැවිනි සීයා ඔවුන්ටද පවුලේ අයට මෙන් සලකනු ලබන්නේ .

සවස් වන විට කෙමෙන් කෙමෙන් පුළුටු බදින සුවඳත් සමගම තොවිලයක් කියන පසුබිම පන්සල පුරාවටම පැතිරී ගියේය . ඒ අතරේ සීයා විසින් සාත්තර ආතාර මතුරන ලද දෙළුම් ඉස්ම පොවන්නට කටයුතු කළේය . විනයක් වැදී හෝ එවැනි කටයුත්තකදී මරණය ළඟා කරගත් පුද්ගලයින් බේරා ගැනීමට සමත් වටිනා කියනා මන්තරයක් අපගේ පරපුරේ පැවතගෙන ඒ . සීයා එම මන්ත්‍රයද හඬ නගා මතුරණු මට ඇසිණි . එහෙත් සාත්තර ආතා අද අවසන් ගමන් යනවා නියතය . මට එවැන්නක් ඔහුගේ දෑසෙන් පෙනිණි . ඔහු දැන් සැහැල්ලුය . විනය කැපුවායින් පසුව ඔහුගේ සිත සැහැල්ලු වනවා නියතය .

සවස හය හත පමණ වන විට පුළුටු බෙදා පිදෙන්නත් තොරණත් සියල්ල සාදා අවසාන විය . දැන් අමනුෂ්‍යයින් රඟ මඩලට ගෙන්නවා ඔවුන් ලවා වැරදි නිවැරදි කරවා නැවත පිටත් කරවීමට කාලය හරිය . බෙරගල මාමා බෙරය සුදු රෙදි කඩෙන් පිටතට ගෙන තට්ටු කරමින් එය නියම හඬ නිකුත් වන සේ සාදයි . සීයා ඒ අතරේ මා කැඳවා නා පිරිසිදු වීමට කීවේය . අංජනම ඇරිය යුතුය . එනිසාය නා පිරිසිදු වීම අනිවාර්ය වූයේ .

මම පන්සලේ ළිඳෙන් වතුර ඇද නා පිරිසිදු වී එන විට සීයාද නා පිරිසිදු වීමට ළිඳ අසලට පැමිණියේය .

" පුතේ මම වතුර බාල්දි දෙකක් ඇඟට හලාගෙන එනකල් අංජනම අරින්න ලෑස්ති කරන්න . අංජනම ඇරලා කොහොමද කියලා බලලා තමයි මේ වැඩේ කරන්න වෙන්නේ . සාත්තර ගොයියා අද මේක කපනකොටම මැරෙයි කියලා තමයි මම හිතන්නේ . ආපිට කපන්නේ නැතුව පරෙස්සම් කරගන්න බලන්න ඕන . අංජනමෙන් හරියටම දැනගන්න ඕන . ඒ නිසා බලමු මොකද කියන්නේ කියලා . පුතා අංජනම මතුරන්න පටන් ගන්න . මම නාලා කියලා විගහට එන්නම් "

" සීයේ අංජනම කොතනද තියාගන්නේ . මිදුලේම තියාගන්නම් නේද ? . තොරණ හදලා තියෙන තැනින් පුටුව තියාගන්නම් ? "

" ඔව් කොහොමත් විනේ කපන්න ගත්තම අපි දෙන්නට කිට්ටුවෙන් ඉන්න වෙයි අංජනමෙන් බලාගෙන . ඒ නිසා පිදේන්න තියෙන අහළින්ම අංජනමත් තියාගන්න "

" හොඳයි සීයේ "

මම පන්සලට ගොස් මගේ ඇඳුම් දමා තිබුණු මල්ලෙන් සුදු සරමත් කමිසයත් ගෙන එය ඉක්මණින් ඇඟේ ලා අංජනමත් අනෙක් අතින් කඩුවත් රැගෙන කිණිස්ස ඉනේ ගසාගෙන පන්සලේ මිදුලට වන්නෙමි . පන්සලේ වැඩ කටයුතු සඳහා එහා මෙහා දුවන අතර වාරයේ එම ප්‍රදේශයේ සිටි එක්තරා පවුලක පිරිමි දරුවෙකු මාත් සමග වඩාත් කුළුපග විය . හෙතෙම මන්ත්‍ර ශාස්ත්‍රය පිලිබඳ මගෙන් අනවශ්‍ය තරමේ ප්‍රශ්න රාශියක් ඇසූ අතර දිය යුතු සීමාවේ උත්තර පමණක් මම ඔහුට දුන්නෙමි . අංජනම රැගෙන මිදුලට බහින විටදී ඔහු නැවතත් මා අසලට පැමිණියේය .

" අයියා , දැන් මොකද කරන්න හදන්නේ ? "

" දැන් වැඩ පටන් ගන්න හදන්නේ . සීයා නාලා එනකල් මම අංජනම් එළිය අරින්න හදන්නේ . මට ඔය අහල පහළ තියෙන අඹ ගහකින් අඹ දළු අත්තක් කඩාගෙන එන්න "

" හොඳයි අයියේ "

ඔහු වැඩි වෙලාවක් යන්නට මත්තෙන් අඹ දළු සහිත කොළ අත්තක් කඩාගෙන ආවේය .

" මෙන්න අයියේ අඹ කොළ අත්තක් . දැන් මොකද කරන්නේ ? "

" මල්ලි මේ වැඩ වලට කැමතියි වගේ නේද ? "

" එහෙමයි අයියේ . මමත් කැමතියි මේවා ඉගෙන ගන්න . අයියට බැරිද මටත් උගන්වන්න ? "

" එහෙම ඉතින් මේවා උගන්වන්නේ නැහැනේ "

" ඒක තමයි දවසක් සාත්තර ආතාත් කිව්වා මට "

එය අමතක කර දමා මම අංජනම මල් බුලත් පුද සහිත පුටුවේ තබා කට්ට කුමන්ජල් රැගෙන මතුරන්නට වීමි .

..................ඕන් හ්රීන් හවුඩි හලුඩි සෙල්ලුම් ග්‍රමාහි භූමි සෙල්ලුම් කදිර මාලා සෙල්ලුම් වීර හනුමා සෙල්ලුම් වීර පත්‍ර කාලි සකිරණ දෙරණ සෙල්ලුම් වල්ලි අම්මා සෙල්ලුම් භද්‍රකාලි සෙල්ලුම් අංජන දේවී සෙල්ලුම් ශ්‍රියා කාන්තා දෙවි සෙල්ලුම් සබරි කුන්ජරී සෙල්ලුම් තත්‍ර වීර කොන්ඩෙන් හනුමා වෛරෝඩි ගං නමෝ නමඃ ......................

කට්ට කුමන්ජල් මතුරන්නට වූ වහාම පන්සල් භූමියේ සිටි සියල්ලෝම මා සිටිනා අවට රොක් වන්නට විය . මම ඒ කිසිවක් ගණන් නොගෙන කට්ට කුමන්ජල් මතුරා අඟුරු කබලට දැමීමි . පහන් දැල්ල තුළින් හනුමන්තා පෙනී සිටියේය .

හනුමා අංජනමට වඩිනවාත් සමගම සීයාද නා පිරිසිදු වී සුදු ඇඳුමක් හැඳ මා අසලට පැමිණියේය .

" හා මොනවද කියන්නේ ? "

" මම මේ දැන් අංජනම ඇරියා විතරයි සීයේ . මොනවද දැනගන්න ඕන ? . හනුමා ඇවිත් ඉන්නේ "

" අහන්න මෙතන මොකක්ද වෙලා තියෙන්නේ කියලා "

හනුමා එකවරම බෝධීන් වහන්සේ අසල බෝ මළුවේ ඒක ස්ථානයක් පෙන්නුවේය .

" සීයේ . ඔන්න ඔය බෝධිය ඉස්සරහා අර තියෙන පහන් වැට කිට්ටුව තැනක් හනුමා පෙන්නුම් කරනවා . එතන අඩියක් විතර යටට හාරලා බලන්න කියලා කියනවා . එතන ඇතිලු උණ බට පුරුකක දාලා හිර කරපු හූනියමක් "

" ආ එහෙම එකක්ද මෙතන තියෙන්නේ . එහෙනම් අපි වැඩ රාජකාරි වලට ලෑස්ති වෙමු "

" ඔය කාන්තා පාර්සවේ උදවිය පන්සල් වත්තෙන් පිටත් වෙනවනම් තමයි හොඳ . පිරිමි ළමයි දෙතුන් දෙනෙක් එන්න මාත් එක්ක . සාත්තර උන්දැව මෙතනට එක්කගෙන එන්න "

සීයා කිහිපදෙනෙකු සමග ගොස් සාත්තර ආතා ඔසවාගෙන අවුත් පැදුරක හාන්සි කරවීය . ඒත් සමගම පන්සලේ නායක හාමුදුරුවන්ද කැඳවාගෙන අවුත් පිදේන්න අසල අසුන් පනවා දුන්නේය . දැන් සියල්ල සූදානම්ය . සීයා වටපිට බලා කිසිවක් අඩු නොවූ බව ප්‍රත්‍යක්ෂ කර බලා ගෙන බෙරගල මාමාටද රඟ මඩලට ආරාධනා කළේය .

සීයා පිදේන්න අසලින් හිඳ ගෙන ඒ අසල තබා තිබුණු අලුපුහුල් ගෙඩිය රැගෙන එය ජීවම් කරන්නට පටන් ගත්තේය . මන්තරේ හඬ වැඩි වනවාත් සමගම බෙරගල මාමාද තම බෙර පදය නියම ගානට ලය වැඩිකරගෙන ආවේය . සීයා දැන් ආවේශයෙන් මෙන් මන්ත්‍ර මතුරාගෙන යයි . මම අංජනම දෙස බලාගත්වනම බලාගෙන සිටියෙමි . හනුමා දැන් පසුබිමේ නැත . එහෙත් අංජනම වැසී ගොස් නැත . මම අවධානයෙන් බලාගෙන සිටියෙමි . එකවරම අංජනම හරහා පෙනී සිටියේ කාලකයට කලින් අප හමුට ආ අමුත්තියකි . ඇය වෙන කවුරුවත් නොව . නම ඇසූ පමණින් මිනිසුන් භය බිරාන්තව ගුලිවන සොහොන් කාලි යක්ෂණියයි .

" සීයේ , මතුරන එක නවත්තන්න කියනවා . සොහොන් කාලි යක්ෂණිය ඇවිත් ඉන්නවා . ඔය මතුරන එක නවත්තන්න කියලා කියනවා "

" අහන්න ඇයි මගේ මන්තරේට බාධා කරන්නේ කියලා "

" සීයේ මේ සේරම දේවල් අරගෙන කනත්තට යන්න කියලා කියනවා "

" කියන්න මේ වෙලාවේ මේ හාමුදුරු නමකුත් ඉන්නා නිසා කරදරයි කියලා "

" සීයේ යක්ෂණිය කියනවා පුහුල් ගෙඩිය අරගෙන සොහොන් පිටියකට ගිහින් දිෂ්ටිය හිරකරගෙන එන්න කියලා . මෙතන මේ දේ කරන්න එපා කියලා කියනවා "

" හොඳයි එහෙනම් යමු කනත්තට . දරුවනේ මෙහෙ වරෙල්ලා මේ පිදේනිය අල්ලන්න අපි කනත්තට යන්න ඕන දැන් "

සීයා පුහුල් ගෙඩිය සුදු රෙදි කඩක ඔතාගෙන දෑතින් ගත් අතර පිදේනි තටුව කිහිප දෙනෙකු විසින් ඔසවා ගන්නා ලදී . අනතුරුව මා පන්සලේ රඳවා සීයා පිදේනි තටුව සහ පුහුල් ගෙඩිය රැගෙන සොහොන් පිටියට නික්ම ගියේය .

මද වෙලාවකට පන්සල් භූමිය නිහඬ විය . මම අංජනම ඇරගෙන නොහොන් පිටියේ වෙන්නේ මොනවාද කියා බලන්නට තීරණය කලෙමි . අනතුරුව මම දිෂ්ටි නවත්තන්නට මතුරා නැවතත් හනුමාට ආරාධනා කලෙමි . පසුව සොහොන් පිටියේ වෙන්නේ කුමක්ද කියා පෙන්වන්න යැයි ඉල්ලා සිටියෙමි . ඒ අතර වාරයේ මට මහත් හිසරදයක්ව සිටි ඉහත කී පිරිමි ළමයා නැවතත් මා අසලට පැමිණියේය .

අංජනමෙන් සොහොන් පිටියේ සිදුවන්නේ කුමක්ද කියා පෙන්නුම් කරන අතර වාරයේ මේ කොලුගැටයාගේ බාධා කිරීම නිසා මාගේ ඉහ මොළ රත් වී එන්නා සේ දැනිණි . එහෙත් මම කරබාගෙන සිටියෙමි . අනතුරුව ඔහු මාගේ ප්‍රතික්ෂේප කිරීම තේරුම් ගත් නිසාදෝ පැත්තකට වී බලාගත් අත බලාගෙන සිටි අතර නැවතත් මම සිත සංසුන් කරගෙන සොහොන් පිටියේ සිදුවන දේ පිළිබඳ අවදානය යොමු කළෙමි .

සීයා මිණී වලක් උඩ පැදුරක් එළා , ඒ මත හාන්සි වී මන්ත්‍ර මතුරමින් පුහුල් ගෙඩිය පපුව උද තබාගෙන ජීවම් කරයි . බෙරගල මාමාගේ බෙර ගැසීමද ඒ අතරේ පෙනේ . පැය භාගයක් පමණවත් මෙම මන්ත්‍ර මැතිරීම සිදු වන්නට ඇත . අනතුරුව සීයා පැදුරෙන් නැගිට කිසිවෙකුට කිසිවක්ම නොකියා එම ස්ථානයෙන් පිටත්වී ආවේය . පිදේන්න ඔසවාගත් පිරිසද කරන්නේ කුමක්ද නොදන්නා බැවින් පිදෙන්නද කර තියාගෙන සියා පසුපසම පැමිණියහ .

" කෝ සොහොන් කාලි යක්ෂණිය ඉන්නවද ? "

" නෑ සීයේ යක්ෂණිය ගියා . මම ආයෙත් එන්න කියන්නම් "

මම හනුමන්තා ලවා නැවතත් සොහොන් කාලි යක්ෂණිය අඳුනට ගෙන්වා ගත්තෙමි .

" සීයේ යක්ෂණිය ඇවිත් ඉන්නේ "

" අහන්න මේ විනය කොහොමද කපන්න ඕන කියලා "

" සීයේ ආපිට යන්නම කපන්න වෙනවා කියනවා . ඒ නැතත් සාත්තර ආතාට දීලා තියෙන වරම ඉවර වෙලා තියෙන නිසා තව තුන් වරුවක් විතරයි ඉන්නේ කියලා කියනවා "

" ආපිට කපන්නේ නැතුව වෙනත් විදියක් කරන්න බැරිද කියලා අහන්න "

" සීයේ ආපිට කපන්නම වෙනවා කියලා කියනවා . සාත්තර ආතා මැරුණට පස්සේ සොහොන් කාලි යක්ෂනියගේ යක්ෂ සමාගමයට එක්කාසු වෙනවා කියලා කියනවා "

" හොඳයි එහෙනම් අපි ආපිට කපන්නම් කියලා කියන්න "

සොහොන් කාලි යක්ෂණිය නැවතත් අතුරුදන් විය .

" සීයේ , මොකද දැන් කරන්නේ ? "

" මම මේ පවුකාරයා ලවාම විනේ ගොඩ ගන්නවා . මම මේ විනයට බැඳලා ඉන්න ප්‍රාණ කාරයා සාත්තර උන්දැගේ ඇඟට දාලා ඌ ලවාම මේ විනේ ගොඩ ගන්නවා "

එසේ කියමින් සීයා පුහුල් ගෙඩිය පහන් පැලේ මැද කුටියේ තබා කට්ට කුමන්ජල් රැගෙන ජීවම් කරන්නට පටන් ගත්තේය .

................................ශැක්ක්‍රම් අරුපන් ශකකම් ඉරපිදා ශැක්ක්‍රම් උරුතාල් ශැක්ක්‍රම් පත්තුඩුළුසුවන්නේ කට්ටි කාබල් ඉරිමුත්තුඩ ළුසුවනේ කට්ටි කාබිල් ඉරිමුත්තුඩල් එමුක් කොල් පෙරිය වානේ කට්ටුනක්කානයි ලාඟ කට්ටි මුක්ක්‍ර මුකකු කොල කට්ට ඉක්කා ඉරිනාල් කට්ටි ඉන්ද ඉරිශ්‍රිශ්‍රතයි කතොත් සංකර දුක දරනි කට්ටු ශැර විශ්නු ගිනි කරනේ කට්ටු නකකානයි ලන්ග කට්ටි මුක්කා මුක්කු කෙල් කට්ටි ඉක්කා ඉරිනාල් කට්ටි ඉන්ද ඉරිශ්‍රශ්‍රතයි කනෙත් ශංකං රදුතදරති කට්ටු ශැර විශ්නු ගිනි තට්ටු ශෙන්ගු පලශෙකුං දෙවි කට්ටු වයි රඩ වාහ ගුරුන්චර කාකට්ටු පුර වින්දුන දෙවි කට්ටු පිත් රොම දිට්ඨි ගුරු දෙවි කට්ටු ඉරමුන්නයි කට්ටු සුක්‍රාශ්‍රදිර කට්ටු යන් කින් නාරනි කට්ටු....................................

සීයා මෙසේ කට්ටකුමන්ජල් මතුරා දුම් කබල රැගෙන ගොස් සාත්තර ආතා හාන්සි වී සිටින පැදුර අසල හිඳගෙන නැවත මතුරමින්දුම් අල්ලන්නට විය . ඒත් සමගම නායක ස්වාමීන් වහන්සේට වැසි සිටින අමනුෂ්‍යයා කලබලයට පත්වී නායක ස්වාමීන් වහන්සේ පරල වන්නට විය .

" පලයවූ තොපි සේරම පන්සල් වත්තෙන් එළියට . පලයවූ "

සීයා මහා හඬින් පන්සලේ සිටි ගමේ සියල්ලටම කා ගැසුවේය . නායක ස්වාමීන් වහන්සේ පරළ වී සිවුර බිම දමා අඳනය පමණක් ශරීරයේ ඇතිව නටමින් පහන් පැළ අසලට පැමිණියහ . අනතුරුව පුහුල් ගෙඩියට අත තියන්නට සැරසෙනවාත් සමගම සීයා නැවතත් කේන්තියෙන් කා ගැසුවේය .

" අත ගනින් පරයා පුහුල් ගෙඩියෙන් . මම උඹව ගිණි තියනවා කල්ප කාලාන්තරේකට නිවෙන්නේ නැතිවෙන්න . අත ගනිං "

මේ වනවිට පන්සල් වත්තේ සිටින්නේ පන්සලේ සිටින අනෙක් හාමුදුරුවරුන් සහ සීයාත් මමත් බෙරගල මාමාත් ආදී මෙම කටයුත්තට අත්‍යාවශ්‍යම අය පමණි. සීයාගේ ගිගිරීමත් සමගම ගමේ සියල්ලෝම පන්සල් වත්තෙන් පිටත් විය . නායක ස්වාමීන් වහන්සේ පරල වීම ගමේ අය දැකගත යුතු නැත . එය උන්වහන්සේගේ චරිතයට නොහොඳ කාරණාවක් නිසාවෙන් ගමේ අය ඒවා දැකගත යුතු නැත . සීයා ඒ නිසාවෙන් ගමේ අය එළවන්නට ඇත .

" හා දැන් මොකද කියන්නේ . ඔය පරාණ කූඩුවෙන් පිටත් වෙලා මේ පරාණ කූඩුවට එන්න හොඳයි "

" මම එන්නේ නැහැ................ මාව බන්දලා තියෙන්නේ කිසිම ගුරුකමකට යටත් වෙන්න එපාය කියලා.................මාව අයින් කරන්න කාටවත් බෑ................................. "

හාමුදුරුවන්ට වැසී සිටින අමනුෂ්‍යයා ගොරහැඩි හඬින් සීයාට අවනත නොවූවාක් සේ කීවේය .

" එහෙනම් බලාගනිං මං උඹට කරන දේ "



ඊළඟ කොටසින් හමුවෙමු

ඔබ සැමට සමන් දෙවිඳුගේ පිහිට ලැබේවා !